សម្ពោធបើកការដ្ឋាន ស្ថាបនាផ្លូវកៅស៊ូDBST ដាក់លូទឹក រៀបចំសួនច្បារ លើកំណាត់ផ្លូវលេខ៥០ និងផ្លូវលេខ៤៦ នៅក្រុងបានលុង
ខេត្តរតនគិរី៖នាព្រឹកថ្ងៃអង្គារ ៧រោច ខែអាសាឍ ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី២៣ ខែកក្កដា ឆ្នាំ២០១៩ ឯកឧត្តម សុខ ហម សមាជិកក្រុមប្រឹក្សាខេត្ត និងឯកឧត្តម ថង សាវុន អភិបាល នៃគណៈអភិបាលខេត្តរតនគិរី បានអញ្ជើញជាអធិបតី ក្នុងពិធីសម្ពោធបើកការដ្ឋានស្ថាបនាផ្លូវកៅស៊ូDBST ដាក់លូទឹក រៀបចំសួនច្បារ លើកំណាត់ផ្លូវលេខ៥០ និងផ្លូវលេខ៤៦ ស្ថិតនៅសង្កាត់បឹងកន្សែង ក្រុងបានលុង ខេត្តរតនគិរី។
ក្នុងពិធីនោះដែរក៏មានការអញ្ជើញចូលរួមពីសំណាក់ឯកឧត្តម លោកជំទាវ អភិបាលរងខេត្ត ប្រធាន អនុប្រធានមន្ទីរ អង្គភាព សិស្សានុសិស្ស ប្រជាពលរដ្ឋជាច្រើននាក់ផងដែរ។
មានប្រសាសន៍ក្នុងឱកាសនោះ ឯកឧត្តមអភិបាលខេត្តលើកឡើងថា៖ផ្លូវមួយខ្សែនេះ ជាសមិទ្ធផលក្រោមគំនិតផ្តួចផ្តើមរបស់ឯកឧត្តមព្រឹទ្ធាចារ្យ ប៊ូ ថង ទោះបីពេលនេះឯកឧត្តមកំពុងសម្រាកព្យាបាលជំងឺ ប៉ុន្តែឯកឧត្តមតែងតែគិតគូរ និងផ្ញើសេចក្តីនឹករលឹកជូនបងប្អូនប្រជាពលរដ្ឋ នៅក្នុងខេត្តរតនគិរី។
ទន្ទឹមនោះឯកឧត្តមស្នើឱ្យបងប្អូនប្រជាពលរដ្ឋ ព្រមទាំងមន្ត្រូរាជការតាមមន្ទីរ អង្គភាពចូលរួមថែរក្សា សមិទ្ធផលរួមរបស់ជាតិតាមរយៈការមិនចោលសំរាមក្នុងលូ តាមដងផ្លូវ និងមិនរំលោភលើចិញ្ចឹមផ្លូវសាធារណៈ ពលកម្មសំអាតអនាម័យ ព្រោះបញ្ហាអនាម័យបរិស្ថាន គឺជាកាតព្វកិច្ចចូលរួមរបស់ពលរដ្ឋម្នាក់ៗ។
ក្នុងនាមអាជ្ញាធរសូមទទួលយកការទិទៀន ប៉ុន្តែការទិទៀននោះត្រូវផ្អែកលើមូលដ្ឋានកែលម្អរ មិនមែនជាការបន្ទោសបង្អាប់ បរិហារបង្ខូចកេរ្តិ៍ឈ្មោះនោះទេ៕
