ជនសង្ស័យ១នាក់ ពាក់ពន្ធ័ករណីលួចយកម៉ូតូ ត្រូវបានកម្លាំងប៉ុស្តិ៍រដ្ឋបាលភ្នំពេញថ្មី ធ្វើការឃាត់ខ្លួន
រាជធានីភ្នំពេញ៖នាថ្ងៃអាទិត្យ ៥រោច ខែអាសាឍ ឆ្នាំកុរ ឯកស័ក្ក ពុទ្ធសករាជ ២៥៦៣ ត្រូវនឹងថ្ងៃទី២១ ខែកក្កដា ឆ្នាំ២០១៩ នាវេលាម៉ោង២០ និង៣០នាទីយប់ កម្លាំងប៉ុស្តិ៍រដ្ឋបាលភ្នំពេញថ្មី បានធ្វើការឃាត់ខ្លួនជនសង្ស័យម្នាក់ ពាក់ពន្ឋ័ករណីអំពើលួចយកម៉ូតូ នៅចំណុចមុខតូបលក់ចាប់ហួយ ផ្លូវបេតុង ស្ថិតនៅភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។
ប្រភពពីសមត្ថកិច្ចបានឲ្យដឹងថា ជនសង្ស័យមាន ឈ្មោះ ហូ ធុង ភេទប្រុសអាយុ២០ឆ្នាំ មុខរបរមិនពិតប្រាកដ ជនជាតិខ្មែរ ស្នាក់នៅបន្ទប់ជួល ផ្លូវបេតុង ភូមិរោងចក្រ១ សង្កាត់គោកឃ្លាង ខណ្ឌសែនសុខ (មានសារធាតុញៀន) ។
រីឯជនរងគ្រោះមាន ឈ្មោះ ហេង លីហួត ភេទប្រុសអាយុ២០ឆ្នាំ មុខរបរនិស្សិត ជនជាតិខ្មែរ ស្នាក់នៅបន្ទប់ជួល ផ្លូវបេតុង ភូមិរោងចក្រ១ សង្កាត់គោកឃ្លាង ខណ្ឌសែនសុខ ។
សម្ភារៈដែរដកហូតបានរួមមាន:ម៉ូតូ០១គ្រឿងម៉ាកសេ១២៥ ពណ៌ខ្មៅ ផលិតឆ្នាំ២០១៨ ពាក់ស្លាកលេខកំពង់ស្ពឺ 1L-9152 របស់ជនរងគ្រោះ និងកង់០១គ្រឿង របស់ជនសង្ស័យ។
សមត្ថកិច្ចបានបន្ដថា នៅមុនពេលកើតហេតុ ជនរងគ្រោះបានទុកម៉ូតូរបស់នៅចំណុចកើតហេតុខាងលើ កំពុងទិញឥវ៉ាន់ ស្រាប់តែមានជនសង្ស័យ បានជិះកង់មកដល់ចំណុច កើតហេតុរួចធ្វើសកម្មភាពលួចយកម៉ូតូជិះបានបន្តិច តែត្រូវជនរងគ្រោះឃើញ ស្រែកថាចោរៗ និងនាំគ្នាដេញចាប់បានជនសង្ស័យ ប្រគល់ឲ្យសមត្ថកិច្ចប៉ុស្តិ៍ភ្នំពេញថ្មី រួចជនរងគ្រោះដាក់ពាក្យបណ្តឹងចោទប្រកាន់ជនសង្ស័យតែម្តង ។
បច្ចុប្បន្ន ជនសង្ស័យកំពុងឃាត់ខ្លួននៅអធិការដ្ឋាននគរបាលខណ្ឌសែនសុខ ដើម្បីអនុវត្តតាមនិតិវិធី៕
