ព្រះភិក្ខុ កក្កដា សុភ័ណ្ឌ សម្រេចលាចាកសិក្ខាបទ (សឹក) បន្ទាប់ពីទទួលកំហុសឆ្គង រឿងសម្តែងវីដេអូអប់រំ
រាជធានីភ្នំពេញ៖កាលពីយប់ថ្ងៃអាទិត្យ ៥រោច ខែអាសាឍ ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី២១ ខែកក្កដា ឆ្នាំ២០១៩ ព្រះភិក្ខុ កក្កដា សុភ័ណ្ឌ គង់នៅកុដិលេខ២៥ វត្តសារាវ័ន្តតេជោ ខណ្ឌដូនពេញ រាជធានីភ្នំពេញ បានសម្រេចលាចាកសិក្ខាបទ (សឹក) ហើយ។
យោងតាមសាលាគណរាជធានីភ្នំពេញ បានប្រកាសឱ្យដឹងថា បន្ទាប់ពីមានហេតុការណ៍ភ្ញាក់ផ្អើលកាលពីថ្ងៃទី២១ ខែកក្កដា ឆ្នាំ២០១៩កន្លងទៅនេះ នៅតាមបណ្តាញសង្គម Facebook ថា ព្រះតេជគុណ កក្កដា សុភ័ណ្ឌ ត្រូវបានគេប្លន់សម្លាប់ ជាមួយរូបភាពជាច្រើនសន្លឹក។
ក្រោយមកទើបមានការបញ្ជាក់ថា រូបភាពទាំងនោះ គ្រាត់តែជារូបភាពសម្តែងក្នុងវីដេអូអប់រំមួយដែលថតនៅក្នុងខេត្តសៀមរាបតែប៉ុណ្ណោះ។
បន្ទាប់មកសាលាអនុគណខណ្ឌដូនពេញ បាននិមន្តព្រះភិក្ខុ កក្កដា សុភ័ណ្ឌ មកដោះស្រាយតាមធម៌វិន័យ។ជាលទ្ធផលព្រះតេជគុណ កក្កដា សុភ័ណ្ឌ បានទទួលស្គាល់នូវការធ្វើឱ្យមានកំហុសឆ្គង ក្នុងធម៌វិន័យរបស់ព្រះសង្ឃ និងបានសុំលាចាកសិក្ខាបទ តាមកិច្ចព្រមព្រៀងនៃកិច្ចសន្យា ដែលព្រះអង្គបានធ្វើនាពេលកន្លងទៅមក៕
