ឯឧត្ដម វ៉ា ថន អភិបាលខេត្តក្រចេះ ដឹកនាំមន្រ្កីក្រោមឱវ៉ាត នាំយកទៀនចំណាំព្រះវស្សា និងទេយ្យវត្ថុប្រគេនព្រះសង្ឃចំនួន១២វត្ត នៅក្នុងក្រុងក្រចេះ
ខេត្តក្រចេះ៖នៅព្រឹកថ្ងៃសៅរ៍ ៤រោច ខែអាសាឍ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី២០ ខែកក្កដា ឆ្នាំ២០១៩នេះ ឯឧត្ដម វ៉ា ថន អភិបាលខេត្តក្រចេះ និងលោកជំទាវ ព្រមទាំងថ្នាក់ដឹកនាំមន្ទីរអង្គភាពជុំវិញខេត្ត បាននាំយកទៀនចំណាំព្រះវស្សា និងទេយ្យវត្ថុមួយចំនួនទៅវេរប្រគេនព្រះសង្ឃ ដែលគង់ចាំព្រះវស្សា នៅវត្តចំនួន១២វត្ត នៅក្នុងក្រុងក្រចេះ ដើម្បីទុកប្រើប្រាស់សម្រាប់អុជបំភ្លឺក្នុងរដូវចូលវស្សារយៈពេលបីខែ និងដើម្បីបង្ហាញពីទឹកចិត្តគោរពស្រឡាញ់ប្រតិបត្តិ ទៅតាមគន្លងប្រពៃណីព្រះពុទ្ធសាសនាដែលជាសាសនារបស់រដ្ឋ របស់ថ្នាក់ដឹកនាំជាតិ អាជ្ញាធរខេត្ត មន្ត្រីរាជការទាំងអស់គ្នាផងដែរ។
សម្ភារៈបរិក្ខាដែលបានប្រគេននាឱកាសនោះក្នុង១វត្តទទួលបានរួមមាន:ទៀនអុជចំណាំវស្សា០១គូ,ប្រេងម៉ាស៊ូត៣០លីត្រ,គ្រឿងឧបភោគ បរិភោគមួយចំនួន និងចប្ច័យចំនួន៣០ម៉ឺនរៀល។ក្នុងការចំណាយថវិកាសរុប១៧លាន ២៣៨ពាន់រៀល ក្នុងនោះថវិកាឯកឧត្ដមកិតិបណ្ឌិត ពេជ្រ ប៊ុនធិន ៥លាន ៥៥០ពាន់រៀល ឯកឧត្ដម វ៉ា ថន ២លាន៤១៨ពាន់រៀល និងថវិកាក្រុមការងារចុះជួយក្រុង និងសាលាក្រុង ៩លាន ២៧០ពាន់រៀល។
ក្នុងឱកាសនោះឯកឧត្ដម វ៉ា ថន អភិបាលខេត្តក្រចេះមានប្រសាសន៍ឱ្យដឹងថា៖ ពេលនេះ គឺជារដូវកាលបងប្អូនពុទ្ធបរិស័ទដែលកាន់សាសនាព្រះពុទ្ធ ត្រូវធ្វើការប្រតិបត្តិ ក្នុងកំឡុងដែលព្រះសង្ឃចូលព្រះវស្សា អស់កាលត្រីមាស ហើយក៏ជាតម្រូវការចាំបាច់របស់ព្រះភិក្ខុសង្ឃគ្រប់អង្គ ត្រូវការចាំបាច់ក្នុងការប្រើប្រាស់នូវទេយ្យទានទាំងនេះផងដែរ៕