ផ្ទះប្រជាពលរដ្ឋចំនួន៣ខ្នង នៅស្រុកតាំងគោក ត្រូវបានអគ្គីភ័យឆាប
ខេត្តកំពង់ធំ៖កាលពីវេលាម៉ោង១២ថ្ងៃត្រង់ ថ្ងៃសុក្រ ៣រោច ខែអាសាឍ ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹង ថ្ងៃទី១៩ ខែកក្កដា ឆ្នាំ២០១៩ មានករណីអគ្គីភ័យមួយបានលេបត្របាក់ផ្ទះរបស់ពលរដ្ឋចំនួន៣ខ្នង ស្ថិតក្នុងភូមិត្រដកពង ឃុំពង្រ ស្រុកតាំងគោក ខេត្តកំពង់ធំ បណ្តាលឲ្យខ្នងខូចខាតទ្រព្យសម្បតិ្ដ លុយជាច្រើនពាន់ដុល្លារ មាស៨ជី និងសម្ភារៈមួយទៀត។
បើតាមសមត្ថកិច្ចបានឲ្យដឹងថា នៅក្នុងហេតុការណ៍ ចុះពន្លត់អគ្គីភ័យនោះដែរ កម្លាំងសមត្ថកិច្ច ដឹកនាំដោយលោក ហាក់ ម៉ុងហួត អភិបាលស្រុកតាំងគោក បាននាំយកនូវ រថយន្តអគ្គិភ័យរបស់អធិការដ្ឋាននគរបាលស្រុកបារាយណ៍ចេញអន្តរាគមន៍១គ្រឿង និងរថយន្តអគ្គិភ័យរបស់អធិការដ្ឋាននគរបាលស្រុកសន្ទុក១គ្រឿង ដោយប្រើប្រាស់ទឹកសរុបចំនួន០៥រថយន្តស្មើនិង២០ម៉ែត្រគុប ទើបគ្រប់គ្រងបានទាំងស្រុង។
កម្លាំងដែលចុះជួយអន្តរាគមន៍មានសរុបចំនួន៥៤នាក់រួមមាន:កម្លាំងអធិការដ្ឋាននគរបាលស្រុកបារាយណ៍ចំនួន១០នាក់,កម្លាំងប៉ុស្តិ៍ចំនួន០៧នាក់,កម្លាំងអធិការដ្ឋាននគរបាលស្រុកសន្ទុកចំនួន០៥នាក់,កម្លាំង PMចំនួន១២នាក់,ប្រជាការពារចំនួន២០នាក់។
សមត្ថកិច្ចបញ្ជាក់ថា ម្ចាស់ផ្ទះរងគ្រោះដោយសារ អគ្គីភ័យលេបត្របាក់ផ្ទះនោះរួមមាន៖ទី១-ឈ្មោះ សាយ កុសល់ ភេទប្រុស៤៤ឆ្នាំ ប្រពន្ធឈ្មោះ សៀង គឹមហ៊ាន់ អាយុ៣៩ឆ្នាំ ផ្ទះទំហំ៧គុណ១២ម៉ែត្រ ប្រក់ក្បឿងជញ្ជាំងក្តារខូចខាត ឆេះផ្ទះមួយខ្នងទាំងស្រុងទំហំ៧គុណ១២ម៉ែត្រ ,ទូរទស្សន៍ចំនួន១គ្រឿង ,បាស្តចំនួន១គូ, ប្រាក់ដុល្លារចំនួន ៣០០០ដុល្លារ ,មាសចំនួន ៨ជី,សម្ភារ:ប្រើប្រាស់ក្នុងផ្ទះមួយចំនួនទៀត។
ទី២-ម្ចាស់ផ្ទះឈ្មោះ អៀន អឿន ភេទប្រុស អាយុ ៥០ឆ្នាំ ប្រពន្ធឈ្មោះ សំភាន់ អាយុ៤០ឆ្នាំ ផ្ទះទំហំ៦គុណ៨ម៉ែត្រ ប្រក់ក្បឿង ជញ្ជាំងក្តារ ខូចខាត ឆេះផ្ទះប្រហែល២០% និង។
ទី៣-ម្ចាស់ផ្ទះឈ្មោះ សាយ មី ភេទស្រី អាយុ៦៩ឆ្នាំ ផ្ទះទំហំ៦គុណ៨ម៉ែត្រ ប្រក់ក្បឿង ជញ្ជាំងក្តារខូចខាត ឆេះផ្ទះប្រហែល២០%៕