គម្រោងសាងសង់ផ្សាររាត្រី នៅខេត្តកែប នឹងចាប់ផ្តើម នៅពេលខាងមុខនេះ
ខេត្តកែប៖គម្រោងសាងសង់ផ្សាររាត្រី ស្ថិតក្នុងរមណីយដ្ឋានឆ្នេរកែប នឹងចាប់ផ្តើមបញ្ចេញរូបរាង នៅពេលខាងមុខនេះហើយ។
នេះបើយោងតាមការបញ្ជាក់អះអាងពី លោក វ៉ៅ សុខា ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តកែប បានលើកឡើងកាលពីរសៀលថ្ងៃទី១៧ ខែកក្កដា ឆ្នាំ២០១៩ម្សិលមិញ។
លោកប្រធានបានបញ្ជាក់ផងដែរថា ដោយផ្អែកតាមសំណើរសុំដាក់ទុនវិនិយោគលើទីតាំងផ្សាររាត្រី ស្ថិតចំណុចក្បែរផ្សារក្តាម នៃសង្កាត់ព្រៃធំ ក្រុងកែប ខេត្តកែប និងអនុលោមតាមចរាចរណែនាំលេខ០០៤ សហវ ចុះថ្ងៃទី០៤ ខែកុម្ភៈ ឆ្នាំ២០១៤ របស់ក្រសួងសេដ្ឋកិច្ច និងហិរញ្ញវត្ថុ លើមូលដ្ឋានវាយតម្លៃរបស់គណៈកម្មការចម្រុះ ក្រសួងសេដ្ឋកិច្ច និងហិរញ្ញវត្ថុ សូមសម្រេចផ្នែកហិរញ្ញវត្ថុនៃគម្រោងសាងសង់នេះ ដោយចំណាយដើមទន់វិនិយោគចំនួន ៦៩៦.៥៥២ដុល្លារ អាមេរិក សម្រាប់សាងសង់ផ្សារ ចំណតជលយានទេសចរណ៍ និងហេដ្ឋារចនាសម្ព័ន្ធគាំទ្រដទៃទៀត។
លើសពីនេះ រដ្ឋបាលខេត្តត្រូវបន្តនីតិវិធី ដូចមានចែងតាមចរាចរណែនាំខាងលើ ព្រមទាំងទទួលខុសត្រូវរាល់បាតុភាព ដែលកើតមានឡើងជាយថា ហេតុចំពោះគម្រោងនេះផងដែរ។
បន្ទាប់ពីមានគម្រោងបង្កើតឲ្យមានផ្សាររាត្រី នៅតំបន់ទេសចរណ៍ឆ្នេរកែប មហាជន បានសម្តែងការរីករាយ ដោយពួកគាត់បានលើកឡើងផងដែរថា ពេលណាខេត្តកែបមានបង្កើតផ្សាររាត្រី ពិតជាផ្នែកមួយជួយបង្កើនសោភ័ណភាពខេត្តទេសចរណ៍បន្ថែមមួយកម្រិតទៀត ដើម្បីទាក់ទាញក្រុមអ្នកទេសចរណ៍ចូលមកសម្រាក លម្ហែ កម្សាន្តកាន់តែច្រើនឡើងៗ។
យ៉ាងណាមិញ ការបង្កើតឲ្យមានផ្សារាត្រីនៅខេត្តកែប ក្រៅពីបង្កើនភាពទាក់ទាញលើផ្នែកទេសចរណ៍កាន់តែមាននិរន្តរភាព នេះក៏អាចចាត់ទុកជាសមិទ្ធផលថ្មីសន្លាងមួយរបស់ខេត្តកែបផងដែរ។
មហាជនបានរំពឹងទុកថា បន្ទាប់ពីមានការសាងសង់ផ្សាររាត្រីនៅខេត្តកែប ភ្ញៀវទេសចរណ៍នឹងសម្រុកមកសម្រាក លម្ហែ កម្សាន្តកាន់តែច្រើនឡើងដើម្បីស្រូបយកខ្យល់អាកាសដ៏បរិសុទ្ធនៅទីនេះ ពិសេសបានភ្លក្សរសជាតិអាហារគ្រឿងសមុទ្រយ៉ាងឆ្ងាញ់ពិសារ ដែលអ្នកផងទាំងពួងនិយមចូលចិត្តទៀតផង។
សូមបញ្ជាក់ថា៖គម្រោងសាងសង់ផ្សាររាត្រីនៅខេត្តកែប គឺជាគម្រោងមួយដែលរដ្ឋបាលខេត្តកែប បានដាក់សំណើជូនមន្ត្រីជំនាញក្រសួងហិរញ្ញវត្ថុ ចូលរួមវាយតម្លៃលើផ្នែកហិរញ្ញវត្ថុ នៃគម្រោងដាក់ទុនវិនិយោគលើទីតាំងផ្សារាត្រី ស្ថិតក្នុងសង្កាត់ព្រៃធំ ក្រុងកែប ខេត្តកែប តាមលិខិតលេខ ១៣៤២ សហវ.អទច ចុះថ្ងៃទី២៦ ខែកុម្ភៈ ឆ្នាំ២០១៩ របស់ក្រសួងសេដ្ឋកិច្ច និងហិរញ្ញវត្ថុ៕
