អ្នករត់ម៉ូតូឌុបនៅក្បាលស្ពាន ប៉ះទង្គិចគ្នាមួយប្រាវជាមួយក្រុមសន្តិសុខ ម៉ូតូឌុបប្រចាំកាស៊ីណូក្រោនស្ទីង ប៉ោយប៉ែត
ខេត្តបន្ទាយមានជ័យ៖នាវេលាម៉ោងប្រមាណជា១០ព្រឹក ថ្ងៃសុក្រ ៣រោច ខែ ឆ្នាំកុរ ឯកស័ក ពុទ្ធសករាជ ២៥៦៣ត្រូវនឹងថ្ងៃទី១៩ ខែកក្កដា ឆ្នាំ២០១៩នេះ មានករណីផ្ទុះសារាយគ្នាមួយបានកើតឡើងរវាង ម៉ូតូឌុប ប្រចាំនៅក្បាលស្ពានច្រកទ្វារអន្តរជាតិប៉ោយប៉ែត និងម៉ូតូឌុប ដែលគ្រប់គ្រង និងបង់លុយឲ្យសន្តិសុខ កាស៊ីណូក្រោនស្ទីង បង្កឲ្យមានការភ្ញាក់ផ្អើល។
តាមសេចក្តីរាយការណ៍បានឲ្យដឹងថា មូលហេតុដែលឈានដល់ការផ្ទុះសារាយគ្នា បង្កឲ្យមានហិង្សា នៅច្រកទ្វារអន្តរជាតិប៉ោយប៉ែត គឺផ្ដើមចេញពីការនិយមបក្សពួក នឹងទាក់ម៉ូយខុសកន្លែងដែលខ្លួនបង់លុយ។
បើតាមប្រភពពីអ្នករត់ម៉ូតូឌុបដូចគ្នា នៅលើស្ពានមិត្តភាពកម្ពុជា-ថៃ បានប្រាប់អ្នកសារព័ត៌មានថា ក្រុមសន្តិសុខ និងក្រុមអ្នករត់ម៉ូតូឌុប ពាក់អាវកាក់ព្រុំ២០១ ប្រចាំនៅស៊ីណូក្រោនស្ទីង បានធ្វើសកម្មភាពចាប់វាយ និងផ្ដួលម៉ូតូ ព្រមទាំងចាប់វាយខ្នោះ នៅលើផ្លូវសាធារណៈ ខាងមុខស៊ីណូក្រោនស្ទីង មាត់ច្រកទ្វារអន្តរជាតិប៉ោយប៉ែត ដូចជាចោរប្លន់អញ្ចឹង។
ប្រភពដដែលបន្តថា ជនរងគ្រោះដែលត្រូវបានក្រុមសន្តិសុខ និងអ្នករត់ម៉ូតូឌុបប្រចាំនៅកាស៊ីណូក្រោនស្ទឹង ចាប់វាយខ្នោះធ្វើបាបដូចអ្នកទោស រួចនាំយកទៅប៉ុស្តិ៍ក្នុងកាស៊ីណូរបស់ខ្លួននោះមានឈ្មោះ ម៉ុង អាយុ២៤ឆ្នាំ ជាអ្នករត់ម៉ូតូឌុបប្រចាំនៅក្បាលស្ពាន ច្រកទ្វារអន្តរជាតិប៉ោយប៉ែត។
ក្រោយពីទទួលបានព័ត៌មាននេះភ្លាម កម្លាំងសមត្ថកិច្ចអន្តោប្រវេសន៍ច្រកទ្វារអន្តរជាតិប៉ោយប៉ែត បានចុះទៅធ្វើការសម្របសម្រួល រហូតមកដល់វេលាម៉ោងជាង១១ ទើបធ្វើការដោះលែងមកវិញ។
ពាក់ព័ន្ធទៅនឹងការប្រើអំពើហិង្សាពីសំណាក់សន្តិសុខ និងអ្នករត់ម៉ូតូឌុបប្រចាំនៅកាស៊ីណូក្រោនស្ទីងខាងលើ ត្រូវបានមហាជនលើកឡើងថា ជារឿងឃោរឃៅព្រៃផ្សៃបំផុត គ្រាន់តែរឿងចាប់ម៉ូយសោះ បែរជាចាប់ផ្តួលម៉ូតូ វាយខ្នោះមើលតែអ្នកទោសទៅហើយនោះ៕