សម្តេចកិត្តិព្រឹទ្ធបណ្ឌិត អញ្ជើញនាំយកទៀនព្រះវស្សា បច្ច័យ ទេយ្យទាន សម្ភារ បរិក្ខាជាច្រើនមុខ ប្រគេនព្រះសង្ឃដែលគង់ចាំព្រះវស្សា នៅវត្តមុនីសុវណ្ណ
រាជធានីភ្នំពេញ៖ក្នុងឱកាសថ្ងៃបុណ្យចូលព្រះវស្សា សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងសហការី ព្រមទាំងក្រុមគ្រួសារ បានអញ្ជើញនាំយកទៀនព្រះវស្សា បច្ច័យ ទេយ្យទាន សម្ភារ បរិក្ខាជាច្រើនមុខ ប្រគេនព្រះសង្ឃដែលគង់ចាំព្រះវស្សា នៅវត្តមុនីសុវណ្ណ (ហៅ ចំពុះក្អែក) នារសៀលថ្ងៃពុធ ១រោច ខែអាសាឍ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី១៧ ខែកក្កដា ឆ្នាំ២០១៩ ស្ថិតនៅក្នុងសង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ។
នៅក្នុងឱកាសបុណ្យចូលព្រះវស្សាឆ្នាំនេះ លោកមហាឧបាសិកា ប៊ុន ស៊ាងលី ព្រមទាំងកូនចៅ ដែលរួមមានសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ព្រមទាំងក្រុមគ្រួសារ បងប្អូន កូនចៅ របស់លោកមហាឧបាសិកា បានចាត់ចែងវេរទៀនព្រះវស្សាដល់វត្តនៅទូទាំង២៥ រាជធានី-ខេត្ត សរុបចំនួន១៣០គូ ដែលក្នុងវត្តនីមួយៗ មានទៀន០១គូ សម្ភារ បរិក្ខាជាច្រើនមុខ និងបច្ច័យ ក្នុង០១វត្ត៥០ម៉ឺនរៀល។
ដោយឡែកសម្រាប់វត្តមុនីសុវណ្ណ (ហៅចំពុះក្អែក) ជាមួយនឹងទៀនព្រះវស្សា សម្ភារ បរិក្ខា២៤មុខ។ សម្តេចកិត្តិព្រឹទ្ធបណ្ឌិត ក៏បាននាំបច្ច័យ យកប្រគេន សម្តេច និងព្រះសង្ឃដែលយាង និងនិមន្តចូលរួមជាង២០០អង្គ និងបានប្រគេនបច្ច័យសម្រាប់ការកសាងវត្ត ដែលបានមកពីការចូលរួមរបស់ លោកជំទាវ ឯកឧត្តម លោក លោកស្រី នៅក្នុងឱកាសនេះ សរុបមានប្រាក់ដុល្លារជិត០៨ពាន់ដុល្លារអាមេរិក និងប្រាក់រៀលចំនួន ៣០លានរៀលផងដែរ។
គួរបញ្ជាក់ដែរថា៖បុណ្យចូលព្រះវស្សា គឺជាពិធីបុណ្យមួយដែលមានសារសំខាន់ក្នុងព្រះពុទ្ធសាសនា ជាពេលវេលា ដ៏សំខាន់ សម្រាប់ភិក្ខុសង្ឃ និងសាមណេបានរៀនធម៌ និងវិន័យយ៉ាងខ្ជាប់ខ្ជួនតាមពុទ្ធឱវាទ។បងប្អូនដែលអ្នកមានជំនឿទៅលើព្រះពុទ្ធសាសនា តែងតែនាំគ្នាប្រារព្ធពិធីបុណ្យដោយនាំយកជាសាដក អង្ករ ភេសជ្ជ: និងរបស់ប្រើប្រាស់ផ្សេងៗ ទៅប្រគេនព្រះសង្ឃតាមលទ្ធភាព។
ពិធីបុណ្យចូលព្រះវស្សា គឺជាការរៀបចំឱ្យឈប់សម្រាកនៅទីណាមួយ ឬក្នុងវត្តអារាមណាមួយ ក្នុងរយៈពេល៣ខែ ក្នុងរដូវធ្លាក់ភ្លៀង និងមិនអនុញ្ញាតឱ្យនិមន្តទៅទីឆ្ងាយ ដោយដាច់រាត្រីឆ្លងថ្ងៃនោះឡើយ លើកលែងតែមានភារកិច្ចសំខាន់ចាំបាច់ ដូចជាឪពុកម្តាយឈឺធ្ងន់ ឬនិមន្តទៅសម្តែងធម៌ជាដើម ដោយ តាំងចិត្ត ត្រលប់មកវិញក្នុងរយៈពេល៧ថ្ងៃ។
ពិធីបុណ្យចូលព្រះវស្សា ប្រារព្ធធ្វើឡើងជារៀងរាល់ឆ្នាំ ចាប់ពីថ្ងៃ១រោច ខែអាសាធ ដល់ថ្ងៃ១៥កើត ខែអស្សុជ។តែពិធីត្រូវបានចាប់ផ្តើមនៅល្ងាចថ្ងៃទី ១៥កើត ខែអាសាឍ ដោយមានការចូលរួមពីសំណាក់ បងប្អូន ចាស់ទុំ ចំណុះជើងវត្ត នាំគ្នាហែរទៀនវស្សា សំពត់ សាដក និងសម្ភារប្រើប្រាស់ផ្សេងៗ ហែរជុំវិញព្រះវិហារ និងបន្ទាប់មកសម្តែងធម៌ទេសនា និងវេរទៀនវស្សា សម្ភារប្រគេនព្រះសង្ឃ៕