មេបញ្ជាររង កងរាជអាវុធហត្ថ ស្រុកចន្ទ្រាម្នាក់ ជិះម៉ូតូបុកសត្វឆ្កែ ដួលបោក បណ្តាលឲ្យស្លាប់យ៉ាងអាណោចអាធម៌
ខេត្តស្វាយរៀង៖មេបញ្ជាការរងកងរាជអាវុធហត្ថ ស្រុកចន្ទ្រា ខេត្តស្វាយរៀងម្នាក់ បានស្លាប់បាត់បង់ជីវិតនៅនិងកន្លែង បន្ទាប់ពីជិះម៉ូតូបុកសត្វឆ្កែដែលកំពុងរត់កាត់ពេញទំហ៊ឹង។
ករណីនេះបានកើតឡើងកាលពីវេលាម៉ោង១៤និង៥០នាទីរសៀល ថ្ងៃទី០១ ខែកក្កដា ឆ្នាំ ២០១៩ នៅតាមបណ្តោយផ្លូវជាតិលេខ១ ចន្លោះគីឡូម៉ែត្រ ១៤២/១៤៣ ស្ថិតក្នុងភូមិដើមពោធិ ឃុំ ស្វាយតាយាន ស្រុកកំពង់រោទ៌ ខេត្តស្វាយរៀង។
សមត្ថកិច្ចមូលដ្ឋានបានឲ្យដឹងថា ជនរងគ្រោះមានឈ្មោះ គង់ ឆែល ភេទប្រុស អាយុ៥៣ឆ្នាំ មុខរបរ កងរាជអាវុធហត្ថ មានឋានៈជាមេបញ្ជាការរង រស់នៅភូមិពោធិ ឃុំមេស ថ្ងក ស្រុកចន្ទ្រា ខេត្តស្វាយរៀង បើកបរ ម៉ូតូម៉ាកហុងដាសេ១២៥ ស៊េរីឆ្នាំ២០១៦ ពណ៌ខ្មៅ ស្លាកលេខ ស្វាយរៀង ១H ៦៦៧០ បានជួបគ្រោះថ្នាក់ចរាចរណ៍ ដោយបុកសត្វឆ្កែ បណ្តាលឲ្យដួលស្លាប់នៅនឹងកន្លែងកើតហេតុ។
បើតាមប្រភពព័ត៌ពីកន្លែងកើតហេតុបានឲ្យដឹងថា នៅមុនពេលកើតហេតុគេឃើញមានបុរសម្នាក់ បានជិះម៉ូតូក្នុងគោលដៅពីលិចទៅកើត លុះមកដល់ចំណុចកើតហេតុខាងលើ ស្រាប់តែមានសត្វឆ្កែ រត់កាត់ផ្លូវ ក៏បុកពេញទំហ៊ឹង បណ្តាលឲ្យបុរស ជាអ្នកបើកបរដួលបោកទៅនិងថ្នល់ប្រកាច់ស្លាប់ភ្លាមៗនៅនិងកន្លែងតែម្តង។
ក្រោយកើតហេតុសមត្ថកិច្ចជំនាញមូលដ្ឋាន បានចុះធ្វើកោសល្យវិច្ឆ័យ រួចប្រគល់សាកសពជូនក្រុមគ្រួសារ ដើម្បីយកទៅធ្វើបុណ្យតាមប្រពៃណី៕