រថយន្តធុនធំ បុកនឹងកិនម៉ូតូ១គ្រឿង បណ្តាលឲ្យមនុស្ស២នាក់ស្លាប់ក្នុងថ្លុកឈាម បន្ទាប់ពីបើកបរវ៉ាងជែងមិនផុត
ខេត្តកណ្តាល៖កាលពីវេលាម៉ោង០៩ និង២៩នាទី ថ្ងៃអង្គារ ១៥កើត ខែអាសាឍ ឆ្នាំកុរ ឯកស័កព.ស២៥៦៣ ត្រូវនឹងថ្ងៃទី១៦ ខែកក្កដា ឆ្នាំ២០១៩ មានករណីគ្រោះថ្នាក់ចរាចរណ៍ដ៏គួរឲ្យរន្ធត់មួយបានកើតឡើងរវាងម៉ូតូនឹងរថយន្តធំ នៅលើកំណាត់ផ្លូវជាតិលេខ៥ ចន្លោះគីឡូម៉ែត្រលេខ២៦-២៧ ភូមិទួលអំពិល ឃុំពញាឮ ស្រុកពញាឮ ខេត្តកណ្តាល បណ្ដាលឲ្យមនុស្សចំនួន២នាក់ បានស្លាប់បាត់បង់ជីវិត នៅនឹងកន្លែងកើតហេតុ។
បើតាមកម្លាំងសមត្ថកិច្ចបានឲដឹងថា មុនពេលកើតហេតុខាងលើ មានម៉ូតូមួយគ្រឿងម៉ាក SUZUKI SMASH REVO C110 ពណ៌ខ្មៅ ពាក់ផ្លាកលេខ សៀមរាប 1F-6205 បើកបរដោយឈ្មោះ និត ភេទប្រុស អាយុ២៥ឆ្នាំ មានទីលំនៅខេត្តព្រៃវែង (មិនពាក់មួកសុវត្ថិភាព ស្លាប់ អូសម៉ូតូនិងអ្នកបើកបរជាប់នឹងរថយន្ត)។
មានអ្នករួមដំណើរម្នាក់ ឈ្មោះ ធី វណ្ណថង ភេទប្រុស អាយុ២១ឆ្នាំ មានទីលំនៅភូមិចន្លោះ ឃុំគគីរ ស្រុកកៀនស្វាយ ខេត្តកណ្តាល(មិនពាក់មួកសុវត្ថិភាព ស្លាប់នៅកន្លែងកើតហេតុ)។
ដែលបើកបរមានទិសដៅពីត្បូង ទៅជើង (ភ្នំពេញ-បាត់ដំបង) លុះបើកបរមកដល់ចំណុចកើតហេតុខាងលើ អ្នកបើកបរម៉ូតូបានបើកឡើងវ៉ាជែងរថយន្តតូចមួយគ្រឿងដែលកំពុងបើកបរស្របទិសនៅខាងមុខ វ៉ាមិនផុតបានបុកចំស្តុបខាងឆ្វេងនៃរថយន្តនោះ បណ្តាលអោយដួលខ្ទាតម៉ូតូអ្នកបើកបរ និងរួមដំណើរនៅលើកណ្តាលទ្រូងផ្លូវ ស្របពេលនោះក៏មានរថយន្តមួយគ្រឿងម៉ាកHYUNDAI ពណ៍ស+ខៀវ ពាក់ផ្លាកលេខ ត្បូងឃ្មុំ 3A-1508 បើកបរដោយឈ្មោះ ហ៑ុន សាន្ត ភេទប្រុស អាយុ២៥ឆ្នាំ មានទីលំនៅសព្វថ្ងៃភូមិវិហារខ្ពស់ ឃុំសួង ក្រុងសួង ខេត្តត្បូងឃ្មុំ (អ្នកបើកបរឃាត់ខ្លួន)។
មានអ្នករួមដំណើរចំនួន០២នាក់
១/-ឈ្មោះ ណែម សុធុល ភេទប្រុស អាយុ ២៦ឆ្នាំ មានទីលំនៅភូមិវិហារខ្ពស់ ឃុំសួង ក្រុងសួង ខេត្តត្បួងឃ្មុំ។
២/-ឈ្មោះ ម៉ី សាម៉ន ភេទប្រុស អាយុ៣៣ឆ្នាំ មានទីលំនៅភូមិត្នោត ឃុំត្នោត ស្រុកកញ្រ្ជាច ខេត្តព្រៃវែង។
អ្នកបើកបររថយន្តនោះជាន់ហ្វ្រាំងមិនទាន់បានកិនពីលើ អ្នករួមដំណើរម៉ូតូស្លាប់នៅកន្លែងកើតហេតុ រឺឯអ្នកបើកបរ និងម៉ូតូអូសជាប់នៅក្រោមរថយន្ត ដែលព្យាយាមបើករត់គេចរហូតជិតដល់សាលាឃុំកោះចិន អ្នកបើកបររថយន្តបានឈប់រថយន្តរួចរត់គេចខ្លួន តែត្រូវបានសមត្ថកិច្ចធ្វើការ សហការគ្នាដេញចាប់ឃាត់ខ្លួនបាន ដើម្បីយកមកសាកសួរ និងបំពេញនីតិវិធីច្បាប់។
ក្រោយពីកើតហេតុ សពជនរងគ្រោះទាំងពីរនាក់ ត្រូវបានប្រគល់ជូនក្រុមគ្រួសារ ដើម្បីយកទៅធ្វើបុណ្យតាមប្រពៃណី។
ចំណែកមធ្យោបាយពាក់ព័ន្ធករណី ត្រូវបានយកមករក្សាទុកបណ្តោះអាសន្ននៅអធិការដ្ឋានស្រុកពញាឮ ដើម្បីបន្តនីតិវិធី៕