សាខាកាកបាទក្រហមកម្ពុជា ខេត្តកោះកុង រៀបចំពិធីបំពាក់កន្សែង និងបើកវគ្គប្តណ្តុះបណ្តាលវិជ្ជាសង្គ្រោះបឋម ជូនយុវជនកាកបាទក្រហមកម្ពុជា ប្រចាំស្រុកថ្មបាំងថ្មី ចំនួន២៥នាក់
ខេត្តកោះកុង៖សាខាកាកបាទក្រហមកម្ពុជា ខេត្តកោះកុង បានរៀបចំពិធីបំពាក់កន្សែង និងបើកវគ្គប្តណ្តុះបណ្តាលវិជ្ជាសង្គ្រោះបឋមជូនយុវជនកាកបាទក្រហមកម្ពុជា ប្រចាំស្រុកថ្មបាំងថ្មី ចំនួន២៥នាក់ នៅវិទ្យាល័យ អនុវិទ្យាល័យឬស្សីជ្រុំនៅព្រឹកថ្ងៃពុធ ០១រោច ខែអាសាឍ ឆ្នាំកុរ ឯកស័ក ព.ស. ២៥៦៣ ត្រូវនឹង ថ្ងៃទី១៧ ខែកក្កដា ឆ្នាំ២០១៩ ក្រោមអធិបតីភាព លោក អន សុធារិទ្ធ ប្រធានគណៈកម្មាធិការអនុសាខាស្រុកថ្មបាំង តំណាង លោកជំទាវ មិថុនា ភូថង ប្រធានគណៈកម្មាធិការសាខាខេត្ត ដែលមានការអញ្ញើញចូលរួមពី ក្រុមប្រតិបត្តិសាខា គណៈកម្មាធិការអនុសាខាស្រុកថ្មបាំង លោកគ្រូ អ្នកគ្រូ សិស្សានុសិស្ស និងយុវជនកក្រក សមាជិកសសយក ស្រុកសរុបចំនួន១០៦នាក់ ស្រី៥១នាក់។
នៅក្នុងឱកាសនោះដែរ លោក អន សុធារិទ្ធ ប្រធានគណៈកម្មាធិការអនុសាខាស្រុកថ្មបាំង បានពាំនាំនូវប្រសាសន៍ផ្ដាំផ្ញើសួរសុខទុក្ខ និងសេចក្ដីកោតសរសើរ ពីសំណាក លោកជំទាវ មិថុនា ភូថង ប្រធានគណៈកម្មាធិការសាខា ពិសេស សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ព្រមទាំងបានផ្ដល់នូវអនុសាសន៍សំខាន់ៗមួយចំនួនជូនដល់យុវជនដែលមានវត្តមាន
ក្នុងពិធីនោះរួមមាន៖
១-សូមបន្ដខិតខំប្រឹងប្រែងរៀន សូត្រ ដើម្បីពង្រឹង និងពង្រីកចំណេះដឹងរបស់ខ្លួនឱ្យកាន់តែប្រសើរឡើងថែមទៀត ស្របតាមស្ថានភាពរីកចម្រើនរបស់ប្រទេសជាតិ ក្រោមការដឹកនាំដ៏ឈ្លាសវៃ របស់ សម្ដេចតេជោនាយករដ្ឋមន្ដ្រី។
២- បន្ដពង្រឹង និងពង្រីកបណ្ដាញយុវជន កក្រក ពីក្នុងចំណោមនិស្សិតនៅសាកលវិទ្យាល័យ ដើម្បីផ្ដល់ឱកាសឱ្យពួកគេចូលរួមការងារមនុស្សធម៌ ជាប់ជាប្រចាំ។
៣- សូមយកចិត្តទុកដាក់ចំពោះសិស្ស និស្សិត និងយុវជនកាកបាទក្រហមកម្ពុជា ដែលមានជីវភាព ខ្វះខាត ហើយកំពុងសិក្សានៅក្នុងសាកលវិទ្យាល័យជាមុន និងសិស្ស និស្សិត កុមារកំព្រា ចាស់ជរា នៅតាមសហគមន៍ជាក្រោយ។
៤-បន្តលើកទឹកចិត្តដល់សមាជិកយុវជន កក្រក ដែលសកម្មនឹងការងារទៅតាមលទ្ធភាព ដើម្បីឱ្យពួកគេមានឆន្ទៈបន្ដសកម្មភាពមនុស្សធម៌នានាឱ្យបានកាន់តែច្រើនថែមទៀត។
៥-បន្ដលើកកម្ពស់នូវវប្បធម៌ចែករំលែក មិត្តអប់រំមិត្ត អ្នកចេះច្រើនបង្រៀនអ្នកចេះតិច អ្នកចេះតិចបង្រៀនអ្នកមិនចេះសោះ ទៅកាន់សិស្ស និស្សិត និងយុវជន កក្រក នៅក្នុងសាកលវិទ្យាល័យ និងសហគមន៍នានា។
៦-សូមបន្ដធ្វើសកម្មភាពទាំងឡាយណា ដែលផ្ដល់ប្រយោជន៍ដល់សង្គមជាតិ ដោយធ្វើខ្លួនជាកូនល្អ និស្សិតល្អ និងពលរដ្ឋល្អ ចៀសវាងចាញ់បោកការឃោសនារបស់ជនអគតិមួយក្ដាប់ តូចដែលតែងតែបំពុលសង្គមតាមគ្រប់រូបភាព៕
