អាវុធហត្ថ ខេត្តក្រចេះ បន្តដុតបំផ្លាញរថយន្ដបាកុង ដឹកឈើចំនួន៧គ្រឿង ដែលឈ្មួញ លាក់ទុកក្នុងចំការ ក្រោយផ្ទះប្រជាពលរដ្ឋ
ខេត្តក្រចេះ៖នារសៀលថ្ងៃទី១៣ ខែកក្ដដា ឆ្នាំ២០១៩ លោកឧត្ដមសេនីយ៍ត្រី សាន្ដ ប៊ុនថាន មេបញ្ជាការអាវុធហត្ថខេត្តក្រចេះ បានដឹកនាំកម្លាំងបន្តដុតបំផ្លាញចោលរថយន្ដបាកុង សម្រាប់ស្ទួចឈើ ឬដឹកឈើចំនួច៧គ្រឿងទៀត ដែលឈ្មួញលាក់ទុកក្នុងចំការក្រោយផ្ទះប្រជាពលរដ្ឋ ស្ថិតនៅភូមិអូរព្រះ ឃុំអូរគ្រៀង ស្រុកសំបូរ ខេត្តក្រចេះ។
លោក ឡុង យឹង មេបញ្ជាការរងអាវុធហត្ថខេត្តក្រចេះ បានឲ្យដឹងថា ដោយក្រោមបញ្ជាផ្ទាល់ពីនាយឧត្ដមសេនីយ៍ សៅ សុខា ប្រធានគណៈកម្មការជាតិដើម្បីទប់ស្កាត់ និងបង្រ្កាបបទល្មើសធនធានធម្មជាតិ កាលពីយប់ថ្ងៃទី១២ ខែកក្ដដា ឆ្នាំ២០១៩ កម្លាំងកងរាជអាវុធហត្ថខេត្តក្រចេះ សហកាជាមួយអាវុធហត្ថស្នាក់ការសន្តិសុខ៧០៨ ស្នាក់ការសន្តិសុខ៧១០អាវុធហត្ថស្រុកសំបូរ បានរុករកប្រទះឃើញរថយន្ដបាកុង សម្រាប់ស្ទូចឈើ និងដឹកជញ្ជូនឈើចំនួន៧គ្រឿង ដែលក្រុមឈ្មួញលាក់ទុកក្នុងចំការខាងក្រោយផ្ទះប្រជាពលរដ្ឋ បន្តដុតបំផ្លាញចោលនៅនិងកន្លែងទាំងអស់៕
