សម្តេចក្រឡាហោម ស ខេង នឹងដាក់ចេញវិធានការថ្មី សម្រាប់អ្នកជិះម៉ូតូ អត់ពាក់មួកសវត្ថិភាព
ខេត្តព្រៃវែង៖សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានមានប្រសាសន៍បែបនេះ ក្នុងឱកាសដែលសម្តេចអញ្ជើញជាអធិបតីក្នុងពិធីបុណ្យបញ្ចុះខណ្ឌសីមាព្រះវិហារ និងឆ្លងសមិទ្ធផលនានា នៅវត្តបុញ្ញខេត្តារាម(ហៅវត្តថ្មី) ស្ថិតក្នុងភូមិលេខ៨ សង្កាត់កំពង់លាវ ក្រុង/ខេត្តព្រៃវែង នាព្រឹកថ្ងៃទី១៣ ខែកក្កដា ឆ្នាំ២០១៩។
ក្នុងពិធីនេះសម្តេចក្រឡាហោម ស ខេង បានលើកឡើងថា អត្រាគ្រោះថ្នាក់ចរាចរណ៍នៅកម្ពុជាមិនមានការថមថយនោះឡើយ ហើយក្នុងរយៈពេល៦ខែ ឆ្នាំ២០១៩នេះ គ្រោះថ្នាក់ចរាចរណ៍បានកើនជាង១០០ករណី បើធៀបរយៈពេលដូចគ្នាទៅនឹងឆ្នាំ២០១៨។
សម្តេចក្រឡាហោម បានបញ្ជាក់ទៀតថា ចំនួនអ្នកស្លាប់ និងរបួសក្នុងហេតុការណ៍គ្រោះថ្នាក់ចរាចរណ៍នេះនៅតែមានការកើនឡើង។
សម្តេចក្រឡាហោម បានមើលឃើញថា គ្រោះថ្នាក់ចរាចរណ៍នេះ គឺបណ្តាលមកពីការមិនគោរពច្បាប់ចរាចរណ៍របស់អ្នកបើកបរ ហើយក៏បានកត់សម្គាល់ដែរថា ចំនួនអ្នកបើកបរម៉ូតូមិនពាក់មួកសុវត្ថិភាពនៅតែមានចំនួនច្រើនផងដែរ។
បើតាមសម្តេចក្រឡាហោម ស ខេង វិធានការថ្មីដែលដាក់ចេញនេះ គឺនឹងឱ្យមន្ត្រីនគរបាលចរាចរណ៍ឃាត់ខ្លួនរាល់អ្នកបើកបរម៉ូតូមិនពាក់មួកសុវត្ថិភាព។តែមិនយកម៉ូតូទៅណានោះទេ ទុកឱ្យម្ចាស់ម៉ូតូមើលថែខ្លួនឯង ហើយត្រូវទាក់ទងទៅសាច់ញាតិ ឬរកវិធីណារកមួកសុវត្ថិភាពមកពាក់ ឱ្យបានសិនទើបអនុញ្ញាតឱ្យធ្វើដំណើរទៅមុខបន្ត៕