ប្រទះឃើញសពបុរសម្នាក់ នៅចំណុចស្ពានព្រែករូងទី២ សង្ស័យករណីប្លន់សម្លាប់យករថយន្ត
ខេត្តកណ្តាល៖កាលពីព្រឹកថ្ងៃទី៣០ ខែមិថុនា ឆ្នាំ២០១៩ មានករណីដែលបង្កឲ្យមានការភ្ញាក់ផ្អើលមួយបានកើតឡើង ដោយប្រជាពលរដ្ឋបានប្រទះឃើញសាកសពបុរសម្នាក់ ដែលផ្លុងចោលនៅចំណុចស្ពានព្រែករូងទី២ ផ្លូវជាតិលេខ៨ ចន្លោះគីឡូម៉ែតលេខ ២៨-២៩ ភូមិអន្លុង ឃុំព្រែកតាមាក់ ស្រុកខ្សាច់កណ្តាល ខេត្តកណ្តាល។
ក្រោយពីទទួលព័ត៌មាននេះភ្លាមសមត្ថកិច្ចជំនាញបានចុះពិនិត្យ និងធ្វើកោសល្យវិច័យ សង្ស័យជាករណីឃាតកម្មសម្លាប់ប្លន់យករថយន្តពីជនរងគ្រោះ។វត្ថុតាងនៅកន្លែងកើតហេតុដែលសមត្ថកិច្ចរកឃើញរួមមាន៖រ៉ូឡូភ្លើងពណ៌លឿង០១ មានខ្សែភ្លើងពណ៌លឿងមួយកំណាត់ប្រវែង២,៦៤ម៉ែត្រ ជាប់នឹងរ៉ូឡូ,ខ្សែក្រវ៉ាត់ក្បាលដែកមានរូបក្បាលខ្មោច០១មានប្រវែង១,០៩ម៉ែត្រនិងខ្នើយ០១។
បើតាមលោក អ៊ាវ ចំរើន ស្នងការដ្ឋាននគរបាលខេត្តកណ្តាលបានឲ្យដឹងថា៖ជនរងគ្រោះមានឈ្មោះ មឿក សុភ័ណ ភេទប្រុស អាយុ៣៧ឆ្នាំ ជនជាតិខ្មែរ មានទីលំនៅភូមិចំបក់ ឃុំបឹងបេង ស្រុកម៉ាឡៃ ខេត្តបន្ទាយមានជ័យ។
លោកបញ្ជាក់ថា៖ករណីនេះជាអំពើសម្លាប់ប្លន់យករថយន្តពីជនរងគ្រោះ ដែលបានជួលដឹកមនុស្សចេញពីក្រុងប៉ោយប៉ែត ហើយខណៈនេះកម្លាំងជំនាញកំពុងធ្វើការតាមដាននិងស្រាវជ្រាវ ដើម្បីស្វែងរកឃាតករយកមកផ្តន្ទាទោសតាមច្បាប់។
បច្ចុប្បន្នជនរងគ្រោះក្រោយពីពិនិត្យ និងធ្វើកោសល្យវិច្ច័យ រួចប្រគល់ឲ្យក្រុមគ្រួសារធ្វើបុណ្យតាមប្រពៃណី៕