ឯកឧត្តម គួច ចំរើន អភិបាលខេត្តព្រះសីហនុបានដឹកនាំមន្ត្រីក្រោមឱវាទ បើកយុទ្ធនាការសំអាត អនាម័យ បរិស្ថាន នៅទូទាំងក្រុងព្រះសីហនុ
ខេត្តព្រះសីហនុ៖នាព្រឹកថ្ងៃសៅរ៍ ១២កើត ខែអាសាឍ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី១៣ ខែកក្កដា ឆ្នាំ២០១៩ ឯកឧត្តម គួច ចំរើន អភិបាល នៃគណៈអភិបាលខេត្តព្រះសីហនុ បានដឹកនាំក្រុមការងារ បើកយុទ្ធនាការសំអាតសំរាមនៅទូទាំងក្រុងព្រះសីហនុ ដោយបែងចែកជាបួនគោលដៅរួមមាន:ក្រុមទី១ នៅឆ្នេរអូឈើទាល មុខភូមគ្រឹះសម្ដេចតេជោនាយករដ្ឋមន្ត្រី,ក្រុមទី២ នៅឆ្នេរឯករាជ្យ បរិវេណសួនច្បារឆ្នេរឯករាជ្យ ,ក្រុមទី៣ សួនមហោស្រប មុខមន្ទីរទេសចរណ៍ និងក្រុមទី៤ នៅវិទ្យាល័យនិងបឋមសិក្សាហ៊ុន សែនឃ្លាំងលើ ដោយមានការចូលរួមពីមន្ត្រីរាជការ កងកម្លាំងប្រដាប់អាវុធ អ្នកស្មគ្រ័ចិត្ត ក្រុមហ៊ុនឯកជន និងបងប្អូនប្រជាពលរដ្ឋជិត៥.០០០នាក់ នឹងគ្រឿងចក្រជិត២០០គ្រឿង ដើម្បីដឹកជញ្ជូនទៅកាន់ទីលានចាក់សំរាម។
ឯកឧត្តមអភិបាលខេត្តបានបញ្ជាក់ថា សំរាមដែលនៅ សេសសល់ក្នុងខេត្តព្រះសីហនុ ពិតជាមានចំនួនយ៉ាងច្រើន សំរាមកើនឡើងដោយសារតែមនុស្សជាអ្នកប្រើប្រាស់ រយៈពេលកន្លងមក សំរាមពិតជាលើសពីតម្រូវការ នៃការដឹកជញ្ជូនចេញ ធ្វើឲ្យសំរាមនៅសេសសល់ជាបន្តបន្ទាប់។
ឯកឧត្តមបានបន្តថា:ខ្ញុំជឿជាក់ថា លោកអភិបាលក្រុង និងប្រធានមន្ទីរបរិស្ថាន បានរៀបចំបែងចែក ទៅតាមគោលដៅគំនរសំរាមនៅក្នុងក្រុងរបស់យើងមានសម្ភារៈ ឧបករណ៍ផ្សេងៗទៀត ដើម្បីសម្អាតសំរាមក្រុងព្រះសីហនុ។
សំរាមមិនមែនជាករណីដែលគួរស្អប់ខ្ពើមនោះទេ តែអ្នកដែល ប្រើប្រាស់ចោលសំរាមតាមដងផ្លូវសាធារណទើបជារឿងដែលយើង ស្អប់ខ្ពើម។
ឯកឧត្តមអភិបាលខេត្តបានបន្តទៀតថា: វិធានការសំអាតសំរាម តាមរយៈការអប់រំ ការវេចខ្ចប់សំរាមឱ្យបានត្រឹមត្រូវ ប៉ុន្តែយើងនៅខ្វះយន្តការសហការគ្នា និងការចូលរួមពីគ្រប់មជ្ឈដ្ឋានទាំងអស់ ប៉ុន្តែសំរាមនូវរាយប៉ាយនៅតាមដងផ្លូវសាធារណៈ មុខគេហដ្ឋានរបស់ប្រជាពលរដ្ឋ ធ្វើឲ្យមានផលប៉ះពាល់ដល់កម្មវិធីសម្អាតសំរាម ប៉ះពាល់ភាពស្អាត នៃទីក្រុងរបស់យើង។
សុំឲ្យបងប្អូនប្រជាពលរដ្ឋ អ្នកស្ម័គ្រចិត្តបន្តការអប់រំ ផ្សព្វផ្សាយឱ្យបានទូលំទូលាយដល់ប្រជាពលរដ្ឋ ដែលជាអ្នកបង្កើតសំរាមនៅទូទាំងក្រុងព្រះសីហនុរបស់យើង ឱ្យពួកគាត់ចូលរួមវេចខ្ចប់ គ្រប់គ្រងសំរាមឱ្យមានអនាម័យ បរិស្ថានល្អ ចាប់ពីពេលនេះតទៅ ។
សំរាមធ្វើឲ្យបរិស្ថានមិនស្អាត ធ្វើឱ្យប៉ះពាល់ដល់សោភ័ណភាព សំរាមបង្កគ្រោះថ្នាក់ដល់សុខភាពសាធារណៈរបស់យើងគ្រប់គ្នា ផ្តើមចេញពីបញ្ហានេះ វានឹងក្លាយ ជាបញ្ហាប្រឈមដល់សុខភាព កើតនូវជំងឺផ្សេងៗ មេរោគផ្សេងៗ គ្រោះថ្នាក់ដល់សុខភាព សំរាមធ្វើឲ្យប៉ះពាល់ដល់ស្ថានភាពសេដ្ឋកិច្ចប្រជាពលរដ្ឋនៅទីនេះផងដែរ ព្រោះថាអ្នកទេសចរទាំងឡាយ អ្នកធ្វើដំណើរទាំងឡាយ អ្នកធ្វើជំនួញទាំង ឡាយ គេពិតជាមិនចង់ឱ្យមានផលប៉ះ ពាល់សុខភាពរបស់គេនោះទេ ។
ជាមួយគ្នានោះដែរ ឯកឧត្តមបានសូមណូមពរឱ្យបងប្អូនទាំងអស់ ក្លាយខ្លួនទៅជាកម្លាំងចលករមួយយ៉ាងសំខាន់ក្នុងការគ្រប់គ្រងសំរាមនៅក្នុងក្រុងព្រះសីហនុ របស់យើងក្នុងការប្រមូល និងដឹកសំរាមចេញ អ្វីដែលសំខាន់ គឺការអប់រំ ផ្សព្វផ្សាយឱ្យបានទូលំទូលាយទៅដល់បងប្អូនប្រជាពលរដ្ឋ ក្នុងការវេចខ្ចប់ទុកដាក់សំរាម និងការបញ្ចេញសំរាមទាន់ពេលវេលា៕