ឯកឧត្តម ស្វាយ សំអ៊ាង អភិបាលខេត្តមណ្ឌលគិរី ដឹកនាំមន្រ្តីក្រោមឱវាទ នាំយកទៀនព្រះវស្សាប្រគេនព្រះសង្ឃ គង់នៅវត្តចំនួន២៩ទូទាំងខេត្ត
ខេត្តមណ្ឌលគិរី៖នារសៀលថ្ងៃទី១២ ខែកក្កដា ឆ្នាំ២០១៩ ឯកឧត្តម ស្វាយ សំអ៊ាង អភិបាល នៃគណៈអភិបាលខេត្តមណ្ឌលគិរី និងលោកជំទាវ និងឯកឧត្តម ម៉ែន ង៉ុយ ប្រធានក្រុមប្រឹក្សាខេត្ត រួមទាំងមន្រ្តីក្រោមឱវាទ បាននាំយកទៀនព្រះវស្សា និងគ្រឿងឧបភោគបរិភោគ និងបច្ច័យមួយចំនួន ប្រគេនព្រះសង្ឃគង់នៅវត្តចំនួន២៩ ទូទាំងខេត្តមណ្ឌលគិរី ។
នាឱកាសនោះដែរ ថ្នាក់ដឹកនាំខេត្ត បានប្រគេនទេយ្យទាន និងគ្រឿងឧបភោគបរិភោគមួយចំនួនដល់ព្រះសង្ឃទាំង២៩វត្ត នៅចំណុចវត្តសែនមនោរម្យ ស្ថិតនៅក្រុងសែនមនោរម្យ ខេត្តមណ្ឌលគិរី។ទេយ្យទាន និងគ្រឿងឧបភោគបរិភោគដែលត្រូវប្រគេនព្រះសង្ឃ ក្នុង១វត្ត ទទួលបាន ទៀនព្រះវស្សា១គូ គ្រឿងឧបភោគបរិភោគ និងបច្ច័យ៨០ម៉ឺនរៀល លោកតាអាចារ្យចំនួន៣៩នាក់ ក្នុងម្នាក់ៗ ទទួលបានថវិកា៧ម៉ឺនរៀល ចំណែក យាយជី តាជី ចំនួន១២នាក់ ក្នុងម្នាក់ៗ ទទួលបានថវិកា២ម៉ឺនរៀលផងដែរ។
ឆ្លៀតក្នុងឱកាសនោះដែរឯកឧត្តម ស្វាយ សំអ៊ាង អភិបាលខេត្ត បានមានប្រសាសន៍ថា ការនាំយកទៀនព្រះវស្សា និងទេយ្យទានផ្សេងៗ មកប្រគេនព្រះសង្ឃនេះ ត្រូវបានធ្វើឡើងនៅគ្រប់វត្តអារាមនៅទូទាំងខេត្ត ពីព្រោះព្រសង្ឃមិនអាចនិមន្តចេញទៅបិណ្ឌបាតនៅទីណាបានទេ ក្នុងរយៈពេលបីខែនេះ។
ឯកឧត្តម បានបន្តថា ពិធីបុណ្យចូលព្រះវស្សានេះ ពុទ្ធបរិស័ទតែងតែនាំយក ទេយ្យទានផ្សេងៗ ទៅប្រគេនព្រះសង្ឃតាមទីវត្តអារាម ដើម្បីឧទ្ទិសកុសលដល់វិញ្ញាណក្ខ័ន្ធ អ្នកដែលបានចែកឋានទៅកាន់លោកខាងមុខ ក៏ដូចជាការចែករំលែកនូវការខ្វះខាតរបស់ព្រះសង្ឃនៅក្នុងវត្តអារាម និងការលើកតម្កើងប្រជាពលរដ្ឋអោយចេះធ្វើបុណ្យទានអោយបានច្រើន ដើម្បីចូលរួមចំណែកការកសាង សមិទ្ធផលផ្នែកវិស័យព្រះពុទ្ធសាសនា និងផ្នែកអាណាចក្រឲ្យមានរីកចំរើនរុងរឿងផងដែរ៕