ចាប់ឃាត់ខ្លួនជនសង្ស័យ០២នាក់ នៅខណ្ឌពោធិ៍សែនជ័យ ពាក់ពន្ឋ័ករណីជួញដូរគ្រឿងញៀន
រាជធានីភ្នំពេញ៖កម្លាំងនគរបាលខណ្ឌពោធិ៍សែនជ័យ ដឹកនាំបញ្ជាផ្ទាល់ដោយលោកវរសេនីយ៍ឯក យឹម សារ៉ាន់ អធិការនគរបាលខណ្ឌ បានស្រាវជ្រាវ រហូតឈានដល់ការឃាត់ខ្លួនមុខសញ្ញាជួញដូរគ្រឿងញៀនចំនួន០២នាក់ នៅវេលាម៉ោង៩និង៣០នាទី ថ្ងៃទី១២ ខែកក្កដា ឆ្នាំ២០១៩ នៅចំណុចផ្ទះជួល ភូមិប៉ប្រកខាងត្បូង សង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញ។
លោកអធិការ បានឱ្យដឹងថា ជនសង្ស័យដែលត្រូវចាប់ឃាត់ខ្លួនមាន
ឈ្មោះ ពេជ្រ ប៊ុនសេង ហៅម៉ាប់ ភេទប្រុស អាយុ៣០ឆ្នាំ ទើបចេញពីគុកថ្ងៃទី២៨ ខែមិថុនា ឆ្នាំ២០១៩ ស្នាក់នៅផ្ទះជួល ភូមិប៉ប្រកខាងត្បូង សង្កាត់កាកាបទី១ ខណ្ឌពោធិ៍សែនជ័យ និងឈ្មោះ សុខ ធាវី ភេទស្រី អាយុ៥០ឆ្នាំ មុខរបរនៅផ្ទះមើលកូនតូច ស្នាក់នៅជាមួយគ្នា ភូមិប៉ប្រកខាងត្បូង សង្កាត់កាកាបទី១ ខណ្ឌពោធិ៍សែនជ័យ។
វត្ថុតាងដកហូតបានមាន ៖ ក្រាមសថ្លាចំនួន ០៥កញ្ចប់ធំល្មម សង្ស័យជាសារធាតុញៀន។ បច្ចុប្បន្នជនសង្ស័យ បានបញ្ជូនទៅកាន់ផ្នែកជំនាញ នៃអធិការដ្ឋាននគរបាលខណ្ឌពោធិ៍សែនជ័យ ដើម្បីសួរនាំ និងឃុំខ្លួនជាបណ្តោះអាសន្ន កសាងសំណុំរឿង បញ្ជូនទៅតុលារការចាត់ការតាមនីតិវិធី៕
