មេបញ្ជាការអាវុធហត្ថ ខេត្តបន្ទាយមានជ័យ ដឹកនាំកិច្ចប្រជុំ ត្រួតពិនិត្យការអនុវត្តន៍ តួនាទី-ភារកិច្ច ការងារប្រចាំខែកក្កដា ឆ្នាំ២០១៩ និងទិសដៅការងារបន្តខែសីហា ឆ្នាំ២០១៩
ខេត្តបន្ទាយមានជ័យ៖នាថ្ងៃព្រហស្បត្តិ៍ ១០កើត ខែអាសាឍ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី១១ ខែកក្កដា ឆ្នាំ២០១៩ លោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្ត បន្ទាយមានជ័យ បានដឹកនាំកិច្ចប្រជុំត្រួតពិនិត្យការអនុវត្តន៍តួនាទី-ភារកិច្ច ការងារកងរាជអាវុធហត្ថប្រចាំខែកក្កដា ឆ្នាំ២០១៩ និងទិសដៅការងារបន្តខែសីហា ឆ្នាំ២០១៩ និងផ្សព្វផ្សាយការណែនាំ ស្តីពីការងារជំនាញកសាងកម្លាំង និងផ្សព្វផ្សាយប្រសាសន៍ណែនាំ ០៥ចំណុច របស់លោកនាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស ពាក់ព័ន្ធការងារជំនាញគ្រឿងញៀន។
សូមជំរាបដែរថា៖កិច្ចប្រជុំប្រព្រឹត្តិទៅនៅបញ្ជាការដ្ឋានកងរាជអាវុធហត្ថ ខេត្តបន្ទាយមានជ័យ ដោយមានការអញ្ជើញចូលរួមពីសំណាក់ លោកមេបញ្ជាការរង នាយរងសេនាធិការ ប្រធាន អនុប្រធានមន្ទីរ លោកនាយការិយាល័យ លោកមេបញ្ជាការមូលដ្ឋានកងរាជអាវុធហត្ថក្រុង-ស្រុកទាំង៩ នាយទាហាន-នាយទាហានរងអាវុធហត្ថ ជាច្រើនរូបផងដែរ។
ថ្លៃងក្នុងឱកាសនោះដែរលោកឧត្តមសេនីយ៍ត្រី មេបញ្ជាការ បានមានប្រសាសន៍ថា នាពេលមានសភាពការចាំបាច់ត្រូវរាយការណ៍សុំគោលការណ៍ថ្នាក់លើ -ត្រៀមលក្ខណៈរួចជាស្រេច ២៤ម៉ោង លើ២៤ម៉ោង ដើម្បីត្រៀមអន្តរាគមន៍ឲ្យបានទាន់ពេលវេលា នៅពេលមានហេតុការណ៍កើតឡើងជាយថាហេតុ ហើយអាវុធហត្ថគ្រប់រូប ត្រូវអនុវត្តន៍ឲ្យបានសមស្រប ប្រកាន់ខ្ជាប់នូវសីលធម៌ ម៉ឺងម៉ាត់ គោរពវិន័យ និងអាកប្បកិរិយាល្អក្នុងពេលបំពេញភារកិច្ច ជាពិសេសគោរពច្បាប់ គោរពសិទិ្ធមនុស្ស និងក្រមសីលធម៌របស់កងយោធពលខេមរភូមិន្ទ ចាត់តាំងកម្លាំងចេញល្បាតការពារសន្តិសុខ សុវត្ថិភាព សណ្តាប់ធ្នាប់សាធារណៈ ដើម្បីទប់ស្កាត់ឲ្យបានទាន់ពេលវេលា រាល់បទល្មើសដែលកើតមានឡើង -គ្រប់មូលដ្ឋានក្រុង/ស្រុក និងស្នាក់ការសន្តិសុខត្រូវបង្កើនកិច្ចសហការជាមួយស្ថាប័នមានសមត្ថកិច្ច អាជ្ញាធរដែនដីឲ្យបានល្អ និង ត្រៀមជួយសង្រ្គោះគ្រប់សភាពការណ៍ដែលកើតឡើងជាយថាហេតុ ដើម្បីផ្តល់សន្តិសុខ សុវត្ថិភាពជូនប្រជាពលរដ្ឋ ផងដែរ ។
ជាមួយគ្នានេះ លោកឧត្តមសេនីយ៍ត្រី មេបញ្ជាការ បានផ្តាំផ្ញើដល់កងកម្លាំងទាំងអស់ ត្រូវបន្តអនុវត្តន៍ឲ្យបានម៉ឺងម៉ាត់នូវរាល់បទបញ្ញត្តិ និងបទបញ្ជារបស់ថ្នាក់លើ និងក្ដាប់រាល់សភាពការណ៍ក្នុងភូមិសាស្ត្រទទួលខុសត្រូវរបស់ខ្លួន៕