ក្មេងប្រុសម្នាក់បានស្លាប់ ឯក្មេងស្រីរងរបួសយ៉ាងដំណំ ដោយសាររថយន្តបុកម៉ូតូ ពីក្រោយពេញទំហឹង
ខេត្តកែប៖ក្មេងប្រុសជាសិស្សសាលាម្នាក់បានស្លាប់ភ្លាមៗនៅកន្លែងកើតហេតុ រីឯក្មេងស្រីជំទង់ម្នាក់ទៀតបានរងគ្រោះយ៉ាងធ្ងន់ធ្ងរ ដោយសាររថយន្តម៉ាកLx-300បើកបុកម៉ូតូពីក្រោយពេញទំហឹង ស្ថិតលើកំណាត់ផ្លូវជាតិលេខ៣៣។
ហេតុការណ៍ដ៏រន្ធត់នេះបានកើតឡើងកាលពីវេលាម៉ោង១៦ និង៤០នាទីល្ងាច ថ្ងៃទី១០ ខែកក្កដា ឆ្នាំ២០១៩ ត្រង់ចំណុចមុខប៉ុស្តិ៍នគរបាលសង្កាត់ព្រៃធំ ស្ថិតក្នុងភូមិដំណាក់ចង្អើរ សង្កាត់ព្រៃធំ ក្រុងកែប ខេត្តកែប ចន្លោះគីឡូម៉ែត្រ១៨-១៩។
តាមប្រភពព័ត៌មានពីសមត្ថកិច្ចមូលដ្ឋានបានឲ្យដឹងថា មុនពេលកើតហេតុ មានក្មេងសិស្សសាលាពីរនាក់ជិះម៉ូតូម៉ាកស្មាស់ ពណ៌សលាយខ្មៅ ពាក់ស្លាកលេខ កែប 1B-0247 ឌុបគ្នាចេញពីសាលារៀនគោលបំណងទៅផ្ទះវិញ ដោយបើកបរក្នុងទិសដៅពីលិចទៅកើត លុះមកដល់ចំណុចកើតហេតុក៏មានរថយន្ត១គ្រឿងម៉ាកលុចស៊ីស Lx-300 ពណ៌ស ពាក់ស្លាកលេខ ភ្នំពេញ 2AI-1307 ដោយបានបោះពួយយ៉ាងលឿនក្នុងួស ស្រាប់តែជ្រុលទៅបុកម៉ូតូរបស់ក្មេងសិស្សសាលា បណ្តាលឲ្យក្មេងប្រុសអ្នកជិះពីក្រោយបានស្លាប់ភ្លាមៗនៅកន្លែងកើតហេតុ រីឯក្មេងស្រីជំទង់អ្នកបើកបរម៉ូតូបានទទួលគ្រោះថ្នាក់យ៉ាងដំណំ ហើយក៏ត្រូវបានក្រុមគ្រួសារដឹកទៅសង្គ្រោះនៅឯមន្ទីរពេទ្យភ្លាមៗ។
សមត្ថកិច្ចបានបញ្ជាក់ទៀថា ក្រោយពីកើតហេតុរថយន្តបង្កបានព្យាយាមបើកគេច ទើបសមត្ថកិច្ចបើកម៉ូតូ និងរថយន្តដេញតាមពីក្រោយរហូតតាមទាន់នៅចំណុចភូមិសាស្ត្រ ភូមិចំការបី(ភ្នំវល្លិ៍) ប៉ុន្តែខណៈនោះម្ចាស់រថយន្តបានដាក់មេផាយបាត់ស្រមោលឈឹងទៅហើយ។
នគរបាលបានឲ្យដឹងទៀតថា ជនរងគ្រោះដែលស្លាប់បាត់បង់ជីវិត មានឈ្មោះ ទី អរុណ ភេទប្រុស អាយុ១១ឆ្នាំ អ្នករួមដំណើរ ស្លាប់នៅកន្លែងកើតហេតុ។ចំណែកក្មេងស្រីដែលបើកម៉ូតូ ឈ្មោះ យ៉ោង ភូ ពេជ្រមុនី ភេទស្រី អាយុ១៤ឆ្នាំ របួសធ្ងន់ អ្នកទាំងពីររស់នៅភូមិដំណាក់ចង្អើរ សង្កាត់ព្រៃធំ ក្រុងកែប ខេត្តកែប។
បច្ចុប្បន្នក្មេងប្រុសរងគ្រោះដែលស្លាប់បាត់បង់ជីវិត ត្រូវបានអាណាព្យាបាលដឹកទៅកាន់លំនៅដ្ឋាន ដើម្បីរៀបចំធ្វើបុណ្យតាមប្រពៃណី។ដោយឡែកមធ្យោបាយពាក់ព័ន្ធ សមត្ថកិច្ចបាននាំយកទៅរក្សាទុកនៅក្នុងអធិការដ្ឋាននគរបាលក្រុងកែប ដើម្បីរង់ចាំម្ចាស់រថយន្តចូលខ្លួនមកដោះស្រាយគ្នាទៅតាមច្បាប់ចរាចរណ៍ផ្លូវគោក៕