នាយឧត្តមសេនីយ៍ គន់ គីម អញ្ជើញចុះពិនិត្យករណីបាក់ច្រាំងទន្លេ ស្រុកស្ទឹងត្រង់ ខេត្តកំពង់ចាម
ខេត្តកំពង់ចាម៖ឯកឧត្តមនាយឧត្តមសេនីយ៍ គន់ គីម ទេសរដ្ឋមន្ត្រី ទទួលបន្ទុកបេសកកម្មពិសេស អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ អមដំណើរដោយឯកឧត្តមអ៊ុន ចាន់ដា អភិបាល នៃគណៈអភិបាលខេត្តកំពង់ចាម ព្រមទាំងមន្ត្រីសាលាខេត្ត បានអញ្ជើញចុះពិនិត្យមើលករណីបាក់ច្រាំងទន្លេក្នុងភូមិសាស្ត្រ ភូមិព្រះអណ្តូង ឃុំព្រះអណ្តូង និងភូមិពាម ឃុំពាម កោះស្លា ស្រុកស្ទឹងត្រង់ ខេត្តកំពង់ចាម នាព្រឹកថ្ងៃទី១០ ខែក្កដា ឆ្នាំ២០១៩។
បើយោងតាមអាជ្ញាធរខេត្តកំពង់ចាមបានឱ្យដឹងថា កាលពីរដូវទឹកសម្រកទន្លេមេគង្គឆ្នាំ២០១៨កន្លងទៅ ចាំងទន្លេនៅភូមិសាស្ត្រខាងលើ ពិសេស នៅចំណុចមុខសាលាបឋមសិក្សាព្រះអណ្តូង ទទួលរងនូវការបាក់ស្រុតជាបន្តបន្ទាប់ ដែលបណ្តាលឱ្យផ្លូវខេត្តលេខ២២៣ ប្រវែង៣០០ម៉ែត្រ ប្រឈមនឹងការបាក់ស្រុតដែលអាចនាំឱ្យកាត់ផ្តាច់ចរាចរណ៍ពី ស្រុកស្ទឹងត្រង់ ខេត្តកំពង់ចាម ទៅស្រុកព្រែកប្រសព្វ ខេត្តក្រចេះ ហើយដោយសាររដ្ឋបាលខេត្តពុំមានបច្ចេកទេស និងថវិកាគ្រប់គ្រាន់ក្នុងការសិក្សាលក្ខណៈបច្ចេកទេស ដើម្បីបញ្ចៀសការបាក់ស្រុតច្រាំង ទន្លេដែលនឹងឈានដល់ការកាត់ផ្តាច់ចរាចរណ៍នៅត្រង់ចំណុចខាងលើ ពិសេសនៅមុនរដូវទឹកឡើង ឆ្នាំ២០១៩នេះ អាជ្ញាធរខេត្ត បានសុំកិច្ចអន្តរាគមន៍ដល់ក្រសួងធនធានទឹក និងឧតុនិយម ក្នុងការចុះ សិក្សាលក្ខណៈបច្ចេកទេស ដើម្បីទប់ស្កាត់ការបាក់ស្រុតផ្លូវខេត្តលេខ២២៣ នៅត្រង់ចំណុចប៉ះពាល់ ខាងលើឱ្យបានទាន់ពេលវេលា។
ក្នុងឱកាសនៃការអញ្ជើញចុះពនិត្យច្រាំងទន្លេបាក់នេះ ឯកឧត្តមនាយឧត្តមសេនីយ៍ គន់ គីម បានអំពាវនាវដល់ពលរដ្ឋប្រមាណ១៣០គ្រួសារ ដែលទទួលរងនូវផលប៉ះពាល់ពីការបាក់ច្រាំងទន្លេឱ្យ មានការប្រុងប្រយ័ត្នខ្ពស់ ដើម្បីបញ្ចៀសនូវគ្រោះថ្នាក់ ជាពិសេសនៅពេលទឹកឡើងក្នុងពេលណាមួយនោះ ខណៈដែលបច្ចុប្បន្ននេះច្រាំងទន្លេនៅទីនោះបានបាក់ចាប់ពី១០ ទៅ៣០ម៉ែត្ររួចមកហើយនោះ៕
