កម្លាំងចម្រុះខេត្តសៀមរាប ចុះបង្ក្រាបបទល្មើសជលផល ដោយរឹបអូស និងដុតបំផ្លាញសាច់មងរ៉ាវ បង្គោលចំរឹង និងក្បាលបរចំនួន១៥ក្បាល នៅស្រុកជីក្រែង
ខេត្តសៀមរាប៖ដោយយោងតាមអនុសាសន៍ណែនាំដ៏ខ្ពង់ខ្ពស់ របស់សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងក្រោមការបញ្ជាផ្ទាល់ពីឯកឧត្តម ទៀ សីហា អភិបាល នៃគណៈអភិបាលខេត្ត និងជាប្រធានគណៈបញ្ជាការឯកភាពខេត្ត នាព្រឹកថ្ងៃទី១ ខែកក្កដា ឆ្នាំ២០១៩ កម្លាំងចម្រុះរួមមាន៖លោកនាយករងរដ្ឋបាលខេត្ត កងកម្លាំងប្រដាប់អាវុធ មន្ទីរ និងអ្នកពាក់ព័ន្ធ បានចុះបង្ក្រាបបទល្មើសជលផល ស្ថិតនៅក្នុងភូមិសាស្ត្រភូមិមាត់ខ្លា ឃុំអន្លង់សំណរ ស្រុកជីក្រែង។
ជាលទ្ធផលកម្លាំងសមត្ថកិច្ច រឹបអូសបាននូវវត្ថុតាងមួយចំនួនរួមមាន៖
១/សាច់មងរ៉ាវ ប្រវែងប្រមាណ១១ ០០០ម៉ែត្រ
២/បង្គោលចំរឹង ចំនួន៦៨០០ដើម
៣/ក្បាលបរ ចំនួន១៥ក្បាលបរ ក្រោយពីបង្ក្រាបកម្លាំងបានធ្វើការដុតបំផ្លាញចោលនៅនឹងកន្លែងតែម្តង។
ជាមួយគ្នានេះដែរឯកឧត្តមអភិបាលខេត្ត បានណែនាំឲ្យកម្លាំងជំនាញពាក់ព័ន្ធ រៀបចំផែនការចុះបង្រ្កាបបទល្មើសជលផលជាប់ជាប្រចាំ និងណែនាំឲ្យសមត្ថកិច្ច និងអាជ្ញាធរមូលដ្ឋានបង្កើនការអប់រំ និងការណែនាំ ដល់ប្រជាពលរដ្ឋមិនអោយនេសាទល្មើសច្បាប់កំណត់ក្នុងរដូវបិទនេសាទ។
សូមបញ្ជាក់ផងដែរថា រដ្ឋបាលជលផល នៃក្រសួងកសិកម្ម រុក្ខាប្រមាញ់ និងនេសាទ បានប្រកាសអំពីរដូវបិទនេសាទសម្រាប់ឆ្នាំ២០១៩នេះ គឺនឹងចាប់ផ្ដើមពីថ្ងៃទី១ ខែមិថុនា រហូតដល់ថ្ងៃទី៣០ខែកញ្ញា៕
