រដ្ឋបាលខេត្តកំពត បញ្ចប់វគ្គតម្រង់ទិសស្តីពី «ការគ្រប់គ្រងរដ្ឋបាលរាជធានី ខេត្ត តាមបែបវិមជ្ឍការ» សម្រាប់ក្រុមប្រឹក្សា ក្រុង ស្រុក
ខេត្តកំពត៖នាព្រឹកថ្ងៃព្រហស្បត្តិ៍១០កើត ខែអាសាឍ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី១១ ខែកក្កដា ឆ្នាំ២០១៩ លោក វ៉ិត វឌ្ឍនា នាយករដ្ឋបាលខេត្តកំពត តំណាងដ៏ខ្ពង់ខ្ពស់ ឯកឧត្តម ជឹង ផល្លា ប្រធានក្រុមប្រឹក្សាខេត្ត បានអញ្ជើញជាអធិបតីក្នុងពិធីបញ្ចប់វគ្គតម្រង់ទិសស្តីពី «ការគ្រប់គ្រងរដ្ឋបាលរាជធានី ខេត្ត តាមបែបវិមជ្ឍការ» សម្រាប់ក្រុមប្រឹក្សាក្រុង ស្រុក ដែលទើបជាប់ឆ្នោតថ្មីក្នុងអាណត្តីទី៣ និងមិនធ្លាប់កាន់តំណែងពីមុន។
សូមជំរាបដែរថា៖ការបញ្ចប់វគ្គបណ្តុះបណ្តាលនាពេលនេះ មានរយៈពេល០២ថ្ងៃ គឺថ្ងៃទី១០ ទី១១ ខែកក្កដា ឆ្នាំ២០១៩ ដោយមានការសហការជាមួយ អគ្គនាយកដ្ឋានរដ្ឋបាល ក្រសួងមហាផ្ទៃ និងមានអញ្ជើញចូលរួមពី លោក លោកស្រីក្រុមប្រឹក្សាក្រុង ស្រុក ខេត្តកំពត និង តាកែវ ដែលមានសមាសភាពចូលរួមចំនួន៩២នាក់។
បញ្ជាក់៖វគ្គបណ្តុះបណ្តាលនេះក្នុងគោលបំណង ដើម្បីធានាឲ្យក្រុមប្រឹក្សាជាប់ឆ្នោតថ្មី អាចបំពេញការងាររបស់ខ្លួនស្របតាមច្បាប់ ស្តីពីការគ្រប់គ្រងរដ្ឋបាលរាជធានី ខេត្ត ស្រុក ខណ្ឌ និងគោលនយោបាយវិមជ្ឍការ និងវិសហមជ្ឍការរបស់រាជរដ្ឋាភិបាលកម្ពុជា ដែលសម្រេចបានជាលទ្ធផលដូចខាងក្រោម៖
១.សិក្ខាកាមមកពីខេត្តគោលដៅមានសមត្ថភាពយល់ដឹងពីគោលនយោបាយ និងច្បាប់គួរឲ្យកត់សំគាល់។
២.សិក្ខាកាមមានការចូលរួមច្រើន ដែលធ្វើអោយវគ្គនេះប្រព្រឹត្តទៅដោយរលូន។
៣.សិក្ខាកាមមានការយកចិត្តទុកដាក់ និងមានសំណួរច្រើនទៅកាន់អ្នកសម្របសម្រួល ដែលឆ្លុះបញ្ចាំងពីការចូលរួម។
៤.សិក្ខាកាមមានសីលធម៌ខ្ពស់ចំពោះការគោរពគ្នាទៅវិញទៅមក ក៏ដូចជាអ្នកសម្របសម្រូល។
៥.សិក្ខាកាមមានសាមគ្គីភាព និងការរឹតចំណងមិត្តភាពគ្នាបានល្អ៕