អភិបាលខេត្តកំពត ដឹកនាំកិច្ចប្រជុំ ពាក់ព័ន្ធនឹងការកែលម្អ សោភ័ណភាពក្រុង ដើម្បីត្រៀមរៀបចំបុណ្យសមុទ្រ លើកទី៨ ជុំទី២ ឆ្នាំ២០១៩ នាពេលខាងមុខនេះ
ខេត្តកំពត៖នាព្រឹកថ្ងៃពុធ ១០កើត ខែអសាឍ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី១០ ខែកក្កដា ឆ្នាំ២០១៩ រដ្ឋបាលខេត្តកំពតដឹកនាំឯកឧត្តម ជាវ តាយ អភិបាល នៃគណៈអភិបាលខេត្តកំពត បានបើកកិច្ចប្រជុំពាក់ព័ន្ធ នឹងការកែលម្អសោភ័ណភាពក្រុង ដើម្បីត្រៀមរៀបចំបុណ្យសមុទ្រលើកទី៨ ជុំទី២ ឆ្នាំ២០១៩ នាពេលខាងមុខនេះ។
ដោយមានការអញ្ជើញចូលរួម ឯកឧត្តម លោកជំទាវអភិបាលរងខេត្ត នាយកនាយករងរដ្ឋបាលសាលាខេត្ត នាយកទីចាត់ការចំណុះសាលាខេត្ត ប្រធានមន្ទីរអង្គភាពជុំវិញខេត្ត លោកអភិបាល-អភិបាលរងក្រុងកំពត និងចៅសង្កាត់ទាំង៥ នៃក្រុងកំពតសរុបចំនួន២១រូប។
ឯកឧត្តមអភិបាលខេត្ត បានមានប្រសាសន៍ក្នុងអង្គពិធីទាំងមូលដែលមានដូចខាងក្រោម៖
១-ស្នើលោកចៅសង្កាត់ទាំង៥ ត្រូវមានឆន្ទះទទួលខុសត្រូវ លើការសំអាតអនាម័យ ក្នុងដែនសមត្ថកិច្ចរបស់ខ្លួន រួមទាំងសំអាតស្មៅ និងកាត់មែកឈើ តាមដងផ្លូវឲ្យបានស្រលះ។
២-ស្នើអង្គការអភិរក្សធនធានធម្មជាតិ បញ្ជូនមនុស្ស១០នាក់ ក្នុងមួយសង្កាត់ ដើម្បីសំអាតអនាម័យជាប្រចាំ តាមបណ្តាសង្កាត់ទាំង៥។
៣-ឯកឧត្តមអភិបាលខេត្ត នឹងចេញចំណាយទិញ កុងទីណឺ ចំនួន៥ ដើម្បីដាក់សំរាមតាមបណ្តាសង្កាត់ទាំងប្រាំ សម្រាប់ជាទីតាំងមួយងាយស្រួលក្នុងការប្រមូលសំរាម។
៤-ស្នើ អភិបាលក្រុងកំពត ពិនិត្យនិង ណែនាំឲ្យម្ចាស់ការដ្ឋានសំណង់ទាំងអស់ ត្រូវអនុវត្តតាមបទដ្ឋានបច្ចេកទេស ឲ្យបានត្រឹមត្រូវ។
៥-ស្នើឯកឧត្តមអភិបាលរងខេត្ត និងអភិបាលក្រុងកំពត ត្រូវចុះពិនិត្យសំណង់បេតិកភណ្ឌមានវ័យចំណាស់ និងទ្រុឌទ្រោមក្នុងក្រុងកំពត ដោយត្រូវជូនដំណឹងដល់ម្ចាស់ផ្ទះ ឈប់ស្នាក់នៅក្នុងផ្ទះនោះទៀត ជៀសវាងមានគ្រោះថ្នាក់ក្នុងប្រការណាមួយ៕
