ឧត្តមសេនីយ៍ឯក ហ៊ុន ម៉ាណែត អញ្ជើញជាអធិបតីភាព ក្នុងពិធីសម្ពោធអគារស្នាក់នៅចំនួន១០ខ្នង នៅទីបញ្ជាការវរសេនាតូចលេខ១
ខេត្តកំពង់ធំ៖នៅសៅរ៍ ៦កើត ខែជេស្ន ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី០៨ ខែមិថុនា ឆ្នាំ២០១៩ ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការកងទ័ពជើងគោក បានអញ្ជើញជាអធិបតីភាព ក្នុងពិធីសម្ពោធអគារស្នាក់នៅចំនួន១០ខ្នងនៅទីបញ្ជាការវរសេនាតូចលេខ១ នៃបញ្ជាការដ្ឋានតំបន់ប្រតិបត្តិការសឹករងកំពង់ធំ ដែលជាអំណោយរបស់គណៈបញ្ជាការយោធាទីក្រុងហូជីមិញ នៃសាធារណរដ្ឋសង្គមនិយមវៀតណាម ដែលបានសាងសង់ជូនដល់ផ្នែកសឹករង ស្រុកក្រុងទាំង៨ និងវរសេនាតូចទាំង២ ចំណុះឲ្យបញ្ជាការដ្ឋានតំបន់ប្រតិបត្តិការសឹករងកំពង់ធំ។
នៅក្នុងពិធីសម្ពោធអគារនោះដែរក៏មានការអញ្ជើញចូលរួមពីសំណាក់ លោក គង់ វិមាន អនុរដ្ឋលេខាធិការក្រសួងសាធារណការ និងដឹកជញ្ជូន,លោក សុខ លូ អភិបាលខេត្តកំពង់ធំ,លោក ពៅ ហេង មេបញ្ជាការរងកងទ័ពជើងគោក មេបញ្ជាការយោធភូមិភាគទី៤ រួមទាំងអ្នកមុខអ្នកការប្រតិភូមិអមដំណើរគណៈអធិបតី ដែលមានមន្រ្តីរាជការ ប្រធាន អនុប្រធានមន្ទីរជុំវិញខេត្តចូលរួម កងកម្លាំងទាំង៣ប្រភេទ យុវជនកាកបាទក្រហម យុវជនកាយរិទ្ធ ប្រជាពលរដ្ឋ និងគ្រួសារយោធិន សរុបប្រមាណជាង១,០០០នាក់ ស្ថិតនៅភូមិតាឡែកថ្មី ឃុំសាលាវិស័យ ស្រុកប្រាសាទបល្ល័ង្ក ខេត្តកំពង់ធំ។
នៅក្នុងឱកាសនោះ ឧត្តមសេនីយ៍ឯក ហ៊ុន ម៉ាណែត បានថ្លែងអបអរសាទរ និងវាយតម្លៃខ្ពស់ចំពោះទំនាក់ទំនង មិត្តភាពសាមគ្គីភាព កិច្ចសហប្រតិបត្តិការល្អ និងស្មារតីជួយគ្នាទៅវិញទៅមក រវាងតំបន់ប្រតិបត្តិការសឹករងកំពង់ធំ និងបញ្ជាការដ្ឋានយោធាទីក្រុងហូជីមិញ ក្នុងរយៈកាលកម្លងមក លទ្ធផលក្នុងកិច្ចសហប្រតិបត្តិការល្អនេះ បានរួមចំណែកដ៏សំខាន់ក្នុងការទំនាក់ទំនង ចំណងមិត្តភាព ប្រពៃណីនៃកងទ័ព និងប្រជាជនទាំងពីរ ឲ្យកាន់តែស្និទ្ធរឹងមាំ និងប្រកបទៅដោយការ យោគយល់គ្នា និងការជឿទុកចិត្តគ្នា ធានាបាននូវតំបន់ព្រំដែនជាតំបន់មិត្តភាព សហប្រតិបត្តិការ និងការអភិវឌ្ឍ ទប់ស្កាត់បាននូវបទល្មើសឆ្លងដែនគ្រប់ប្រភទ និងបង្ករលក្ខណៈងាយស្រួល ដល់ប្រជាជនសុខសាន្តទាំងពីរ៕
