កម្លាំងអធិការដ្ឋាននគរបាល ក្រុងប៉ោយប៉ែត ចាប់ក្របួចករណីគ្រឿងញៀន បានចំនួន៤ករណីផ្សេងគ្នា ដោយឃាត់ខ្លួនជនសង្ស័យបានចំនួន០៥នាក់
ខេត្តបន្ទាយមានជ័យ៖កម្លាំងប្រឆាំងបទល្មើសគ្រឿងញៀន នៃអធិការដ្ឋាននគរបាលក្រុងប៉ោយប៉ែត ដែលដឹកនាំដោយលោកវរសេនីយ៍ឯក ធិន ស៊ិនដេត អធិការដ្ឋាននគរបាលក្រុងប៉ោយប៉ែត និងដោយមានបទបញ្ជាដ៏ខ្ពង់ខ្ពស់ពីលោកឧត្តមសេនីយ៍ទោ អាត់ ខែម ស្នងការដ្ឋាននគរបាល ខេត្តបន្ទាយមានជ័យ កម្លាំងបានចុះប្រតិបត្តិការបង្ក្រាប ករណីគ្រឿងញៀនបានចំនួន០៤ករណីផ្សេងគ្នា ក្នុងថ្ងៃតែមួយ ដោយចាប់ឃាត់ខ្លួនជនសង្ស័យបានចំនួន០៥នាក់ រួមនិងវត្ថតាងមួយចំនួន។
ជាក់ស្តែងកាលពីវេលាម៉ោង១៦ និង០០នាទី នៅថ្ងៃទី០៤ ខែឧសភា ឆ្នាំ២០១៩ កម្លាំងប្រឆាំងបទល្មើសគ្រឿងញៀន នៃអធិការដ្ឋាននគរបាលក្រុងប៉ោយប៉ែត បានចុះល្បាតក្នុងភូមិសាស្រ្តក្នុងក្រុងប៉ោយប៉ែត លុះទៅដល់ចំនុចក្រោយកាស៊ីណូឡាកគី ស្ថិតនៅភូមិប៉ោយប៉ែត សង្កាត់/ក្រុងប៉ោយប៉ែត ខេត្តបន្ទាយមានជ័យ ក៏បានប្រទះឃើញមុខសញ្ញាសង្ស័យជួញដូរថ្នាំញៀនម្នាក់មានឈ្មោះ សុខ រស់ ភេទប្រុស អាយុ៣៧រស់នៅភូមិក្បាលកោះ សង្កាត់/ក្រុងប៉ោយប៉ែត ខេត្តបន្ទាយមានជ័យ។
ភ្លាមនោះកម្លាំងក៏សុំធ្វើការត្រួតពិនិត្យលើដងខ្លួន រកឃើញវត្ថុតាងរួមមាន៖ម្សៅក្រាមពណ៌សថ្លាចំនួន០៤កូនថងតូច,ម្សៅក្រាមសថ្លាលាយជាមួយថ្នាំគ្រាប់ពណ៌ផ្កាឈូកមួយគ្រាប់ៗចំនួន០៤កូនថង់,សំបកថង់សម្រាប់ច្រកថ្នាំមួយចំនួន។
នាវេលាម៉ោង១៥ និង១៥ នាទីនៅថ្ងៃទី០៤ ខែឧសភា ឆ្នាំ២០១៩ កម្លាំងប្រឆាំងគ្រឿងញៀន នៃអធិការដ្ឋាននគរបាលក្រុងប៉ោយប៉ែត បានចុះល្បាតក្នុងភូមិសាស្រ្ត លុះទៅដល់ចំនុចផ្លូវខាងកើតកាស៊ីណូឡាកគី ស្ថិតនៅក្នុងភូមិប៉ោយប៉ែត សង្កាត់/ក្រុងប៉ោយប៉ែត ខេត្តបន្ទាយមានជ័យ បានប្រទះឃើញមុខសញ្ញាសង្ស័យប្រើប្រាស់ថ្នាំញៀនចំនួន០២នាក់
១/ឈ្មោះសួម សាន់ ភេទប្រុស អាយុ១៦ឆ្នាំរស់នៅភូមិឈូក ឃុំចង្ហា ស្រុកអូរជ្រៅ ខេត្តបន្ទាយមានជ័យ និង២/ឈ្មោះ រិទ្ធិ ណារុង ភេទប្រុស អាយុ២៥ឆ្នាំរស់នៅភូមិ ឈូក ឃុំ ចង្ហា ស្រុកអូរជ្រៅ ខេត្ត បន្ទាយមានជ័យ។
ក្រោយពីឃាត់ខ្លួនកម្លាំងក៏សុំធ្វើការត្រួតពិនិត្យលើដងខ្លួនជនសង្ស័យរកឃើញវត្ថុតាងរួមមាន៖បំពងកែវមួយកំណាត់,ដែកកេះ១។
នាថ្ងៃទី០៤ ខែឧសភា ឆ្នាំ២០១៩ វេលាម៉ោង២០ និង១៥នាទីដោយមានការរាយការណ៍ពីប្រជាពរដ្ឋ ថាមានបុរសម្នាក់បានអុកឡុក ស្ថិតនៅក្នុងភូមិសាមគ្គីមានជ័យ សង្កាត់/ក្រងប៉ោយប៉ែត ខេត្តបន្ទាយមានជ័យ ភ្លាមនោះកម្លាំងប្រចាំបញ្ជាផែនចរាចណ៍ នៃអធិការដ្ឋាននគរបាលក្រុងប៉ោយប៉ែតបានចុះទៅដល់គោលដៅក៏បានធ្វើការឃាត់ខ្លួនបុរសម្នាក់មានឈ្មោៈ សន គឹមសាន ភេទប្រុស អាយុ៤០ឆ្នាំ
សង្សយ័ប្រើថ្នាំញៀនជ្រុល(បែកថ្នាំ)។
វត្ថុតាងដែលដកហូតបានរួមមាន៖ស្នាប់ដៃ១,លិខិតឆ្លងដែនចំនួន១ ហើយបាននាំមកអធិការដ្ឋាន ដើម្បីធ្វើតេស្ត៍ស្វែងរកសារធាតុញៀនជាលទ្ធផល(វិជ្ជមាន)។
នាវេលាម៉ោង១៨ និង០០នាទី ថ្ងៃអង្គារ ២កើត ខែជេស្ឋ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី០៤ ខែមិថុនា ឆ្នាំ២០១៩ កម្លាំងសមត្ថកិច្ចបានចាប់ឃាត់ខ្លួនជនសង្ស័យ០១នាក់ បន្ទាប់ពីប្រជាពលរដ្ឋរាយការណ៍ថា មានករណីជួញដូរ ដោយខុសច្បាប់នូវសារធាតុញៀន នៅចំណុចផ្លូវជាតិ 258Dស្ថិតក្នុងភូមិនិមិត្ត២ សង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ ភ្លាមនោះកម្លាំងប៉ុស្តិ៍រដ្ឋបាលសង្កាត់និមិត្ត បានចុះទៅដល់កន្លែងកើតហេតុ បានធ្វើការឃាត់ខ្លួនជនសង្ស័យបាន០១នាក់ឈ្មោះ សុ ធុនឡាស មុនទ្រី ភេទប្រុស អាយុ៥៥ ឆ្នាំ ជនជាតិខ្មែរ មុខរបរ កម្មករ មានស្រុកកំណើតឃុំកូប ស្រុកអូរជ្រៅ ខេត្តបាត់ដំបង ទីលំនៅបច្ចុប្បន្នភូមិខៃដន ឃុំកូប ស្រុកអូរជ្រៅ ខេត្តបន្ទាយមានជ័យ។
ក្រោយពីឃាត់ខ្លួនកម្លាំងសមត្ថកិច្ចដកហូតបាននូវវត្ថុតាងមួយចំនួនរួមមាន៖ម្សៅក្រាមពណ៌សថ្លា០១កញ្ចប់តូច,ដែកកេះចំនួន០១។
បច្ចុប្បន្នជនសង្ស័យទាំង០៥នាក់ រួមនិងវត្ថុតាងសមត្ថកិច្ចប្រឆាំងបទល្មើសគ្រឿងញៀន នៃអធិការដ្ឋាននគរបាលក្រុងប៉ោយប៉ែត កំពុងធ្វើការសាកសួ និងកសាងសំណុំរឿង ដើម្បីចាត់ការបន្តតាមតិតិវិធី៕
