ឃាត់ខ្លួនជនជាតិចិនម្នាក់ បន្ទាប់ពីរកឃេីញគ្រឿងញៀនជាង១ម៉ឺនគ្រាប់ ទម្ងន់ជាង៦គីឡូក្រាម នៅក្នុងរថយន្ត
រាជធានីភ្នំពេញ៖គ្រឿងញៀនជាង១ម៉ឺនគ្រាប់ ទម្ងន់ជាង៦គីឡូក្រាម ដែលជនជាតិចិនលាក់ទុកនៅក្នុងរថយន្ត ត្រូវបានសមត្ថកិច្ចរកឃើញ និងឃាត់ខ្លួន បន្ទាប់ពីបើករថយន្តបុករ៉ឺម៉កកង់៣បណ្តាលអោយបុរសម្នាក់ បណ្តាលឲ្យរងរបួសធ្ងន់ រហូតឈានដល់ការឆែរឆេរក៏ប្រទះឃើញគ្រឿងញៀន។
ករណីខាងលើនេះបានកើតឡើងកាលពីរសៀលថ្ងៃទី០៣ ខែមិថុនា ឆ្នាំ២០១៩ នៅចំណុចផ្លូវលេខ១៥៤ ទល់មុខរោងកុនលុច្ស ស្ថិតនៅសង្កាត់ផ្សារថ្មី៣ ខណ្ឌដូនពេញ រាជធានីភ្នំពេញ។
បើតាមសមត្ថកិច្ចបានឲ្យដឹងថា កាលពីរសៀលថ្ងៃ ខែខាងលើមានករណីគ្រោះថ្នាក់ចរាចរណ៍មួយបានកើតឡើង ដោយរថយន្តម៉ាក LEXUS ធុនកណ្តាល ពណ៌ខ្មៅ ពាក់ផ្លាកលេខភ្នំពេញ 2AW-4332 បើកបរដោយបុរសជនជាតិចិនម្នាក់ បានបើកទៅបុកម៉ូតូកង់បីមួយគ្រឿងបណ្តាលឲ្យបុរសម្នាក់របួសធ្ងន់ ហើយព្យាយាមបើករត់គេច។
ភ្លាមនោះកម្លាំងសមត្ថកិច្ចបានចុះអន្តរាគមន៍ទាន់ពេលវេលា បានធ្វើការឃាត់ខ្លួនជនបង្កដែលជាជនជាតិចិនឈ្មោះ អៅ មីង ភេទប្រុស អាយុ៣០ឆ្នាំ ព្រមទាំងរថយន្តផងដែរ។
ក្រោយពីបានធ្វើការត្រួតពិនិត្យ សមត្ថកិច្ចឃើញនៅក្នុងរថយន្តរបស់ជនបង្កមានការបូបយួរមួយក្នុងនោះមានកញ្ចប់កាហ្វេចំនួន៦ដុំ ដោយមានការសង្ស័យ សមត្ថកិច្ចបានហែកមើលឃើញមានថ្នាំគ្រាប់ពណ៌ទឹកសមុទ្រ រូបតុក្កតា សញ្ញាក្បាលខ្មោចច្រើនគ្រាប់ សង្ស័យជាសារធាតុញៀន។
ភ្លាមនោះសមត្ថកិច្ចបានសហការជាមួយការិយាល័យប្រឆាំងគ្រឿងញៀនដើម្បីធ្វើតេស្ត ជាលទ្ធផលឃើញថា ជាថ្នាំញៀនប្រភេទ M.A /M.D (អិចស្រ្តាស៊ី) ថ្នាំគ្រវី ។
ក្រោយមកសមត្ថកិច្ចបានសួរចម្លើយនិងពន្លាតដែនសមត្ថកិច្ចបន្តធ្វើការឆែកឆេរដល់លំនៅដ្ឋានជនសង្ស័យស្ថិតនៅខណ្ឌច្បារអំពៅ។
ជាមួយគ្នានោះដែរកម្លាំងសមត្ថកិច្ចបានចុះប្រតិបត្តិការណ៍បន្តរុករកនិងសួរចម្លើយដើម្បីរកបក្ខពួក តែជាលទ្ធផលជនជាតិចិនរូបនេះ មិនបានសារភាពប្រាប់អំពីបក្ខពួកនោះទេ។
បច្ចុប្បន្នជនសង្ស័យរួម និងវត្ថុតាងថ្នាំញៀនចំនួន១១,៦៨០គ្រាប់ ទម្ងន់ជាង៦គីឡូក្រាមត្រូវបានសមត្ថកិច្ចកំពុងបន្តសាកសួរ ដើម្បីរកបក្ខពួកនិងកសាងសំណុំរឿងចាត់ការបន្តតាមនីតិវិធី៕