ប្រធានកាកបាទក្រហមកម្ពុជា ដឹកនាំមន្ត្រីក្រោមឱវាទ ចុះជួបសំណេះសំណាល សាកសួរសុខទុក្ខ និងផ្តល់អំណោយមនុស្សធម៌ ដល់កុមារពិការស្វិតដៃ-ជើង កុមារដែលមានសតិមិនគ្រប់គ្រាន់ សរុបចំនួន២២៥នាក់
រាជធានីភ្នំពេញ:សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ព្រឹកថ្ងៃពុធ ៣កើត ខែជេស្ឋ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី០៥ ខែមិថុនា ឆ្នាំ២០១៩ បានដឹកនាំមន្ត្រីបាទក្រហមកម្ពុជា ចុះជួបសំណេះសំណាល សាកសួរសុខទុក្ខ និងផ្តល់អំណោយមនុស្សធម៌កាកបាទក្រហមកម្ពុជា ដល់កុមារពិការស្វិតដៃ-ជើង កុមារដែលមានសតិមិនគ្រប់គ្រាន់សរុបចំនួន២២៥នាក់ ក្នុងនោះមានបុគ្គលិកជនបរទេសផងដែរ ដែលកំពុងរស់នៅក្នុងមជ្ឈមណ្ឌល «បុរីទារក និងកុមារជាតិ» នៃអង្គការទន្សាយ ដែលមានទីតាំងស្ថិតនៅភូមិដំណាក់៣ សង្កាត់ស្ទឹងមានជ័យខណ្ឌមានជ័យ រាជធានីភ្នំពេញ។
មជ្ឈមណ្ឌល «បុរីទារក និងកុមារជាតិ» គឺជាកន្លែងសម្រាប់មើលថែទាំកុមារទាំងការរស់នៅ ហូបចុក និងការមើលថែទាំជំងឺផ្សេងៗ ដល់កុមារតូចៗ សុទ្ធសឹងជាកុមារជាក្មេងអាណាថា បាត់បង់អាណាព្យាបាល ឬពិការភាពស្វិតដៃ-ជើងជាដើម។ដែលមានទីតាំងស្ថិតក្រោមការគ្រប់គ្រងរបស់នាយដ្ឋានសុខុមាលភាពកុមារ នៃអគ្គនាយកដ្ឋានបច្ចេកទេសរបស់ក្រសួងសង្គមកិច្ច អតីតយុទ្ធជន និងយុវនីតិសម្បទា។
មជ្ឈមណ្ឌល «បុរីទារក និងកុមារជាតិ» ត្រូវបានបង្កើតឡើងក្នុងឆ្នាំ១៩៨០ ដែលកាលពីអំឡុងនោះ គេហៅថា «មជ្ឈមណ្ឌលសង្គ្រោះទារក» លុះមកទល់នឹង ឆ្នាំ២០០៨ ទើបសម្រេចប្តូរឈ្មោះថា «បុរីទារក និងកុមារជាតិ» ជំនួសវិញ។
សូមបញ្ជាក់ថា អំណោយដែលផ្ដល់ជូនបុរីទារក និងកុមារជាតិ នៃអង្គការទន្សាយរួមមាន៖
អង្ករចំនួន៣តោន គ្រឿងឧបភោគ-បរិភោគ សម្ភារប្រើប្រាស់រទេះជនពិការចំនួន ៤០គ្រឿង និងថវិកាចំនួន ១០លានរៀល។
ឧបត្ថម្ភបុគ្គលិកចំនួន ៩០នាក់ដោយម្នាក់ៗទទួលបានអង្ករ ៣០គីឡូក្រាម ឃីតមួយកញ្ចប់ និងថវិកា ១០ម៉ឺនរៀល។
អ្នកស្ម័គ្រចិត្តបរទេសចំនួន២នាក់ម្នាក់ៗ ទទួលបានក្រមា និងថវិកា ១០ម៉ឺនរៀល ព្រមទាំងបានរៀបចំម្ហូបអាហារចំនួន៣០តុ ដែលសរុបការចំណាយអស់ ១៩,៧១៤ដុល្លារ៕
