រដ្ឋបាលក្រុងប៉ោយប៉ែត ប្រារព្ធពិធីទិវាបរិស្ថានជាតិ និងបរិស្ថានពិភព លោកក្រោមប្រធានបទ«ការបំពុលខ្យល់»
ខេត្តបន្ទាយមានជ័យ៖លោកជំទាវ ម៉ម ថានី រដ្ឋលេខាធិការក្រសួងបរិស្ថាន តំណាងដ៏ខ្ពង់ខ្ពស់ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន ,លោក គឹង វណ្ណៈ អភិបាលរងខេត្តបន្ទាយមានជ័យ,លោក គាត ហ៊ុល អភិបាល នៃគណៈអភិបាលក្រុងប៉ោយប៉ែត បានអញ្ជើញជាអធិបតីក្នុងពិធីទិវាបរិស្ថានជាតិ និងបរិស្ថានពិភពលោក ក្រោមប្រធានបទ«ការបំពុលខ្យល់»។
សូមជម្រាបដែរថា៖ពិធីនេះបានប្រព្រឹត្តទៅនាវេលាម៉ោង០៨ព្រឹក ថ្ងៃពុធ ៣កើត ខែជេស្ន ឆ្នាំកុរ ឯកស័ក ពស.២៥៦៣ ត្រូវនឹងថ្ងៃទី០៥ ខែមិថុនា ឆ្នាំ២០១៩ នៅសាលាបឋមសិក្សាព្រហ្មនិមិត្ត ក្រុងប៉ោយប៉ែត ខេត្តបន្ទាយមានជ័យ ដោយមានការចូលរួមពីគណៈអធិបតី មន្ត្រីរាជការ កម្លាំងប្រដាប់អាវុធជាច្រើនស្ថាប័ន លោកគ្រូ អ្នកគ្រូ និងសិស្សានុសិស្សជាច្រើនកុះករផងដែរ។
ក្នុងឱកាសនោះដែរលោកជំទាវ ម៉ម ថានី រដ្ឋលេខាធិការក្រសួងបរិស្ថាន បានមានមតិសំណេះសំណាលជាមួយលោកគ្រូ អ្នកគ្រូ និងសិស្សានុសិស្ស ព្រមទាំងមានការចោទជាសំណួរ ចម្លើយ ដើម្បីប្រគល់រង្វាន់ជូន ព្រមទាំងថតរូបជាអនុស្សាវរីយ៍ទៀតផង។
បន្ទាប់ពីនេះលោកជំទាវ បានដឹកនាំ ក្រុមការងារ លោកគ្រូ អ្នកគ្រូ និងសិស្សានុសិស្ស ដាំដើមឈើចំនួន២៦ដើមនៅក្នុងបរិវេណសាលារៀនព្រហ្មនិមិត្ត រួចបន្តធ្វើសកម្មភាពជិះកង់ដង្ហែក្បួនយុទ្ធនាការផ្សព្វផ្សាយការយល់ដឹងពីបរិស្ថាន នៅតាមដងផ្លូវនានា រហូតទៅដល់រង្វង់មូលច្រកទ្វារអន្តរជាតិប៉ោយប៉ែត ដើម្បីជាកិច្ចបញ្ចប់នៃកម្មវិធី៕