ពលរដ្ឋជាង២០០គ្រួសារ រស់នៅភូមិព្រៃព្រិច លើកគ្នាតវ៉ាទាំងព្រឹក នៅសាលាសង្កាត់ប៉ោយប៉ែត រឿងដីធ្លី
ខេត្តបន្ទាយមានជ័យ៖យ៉ាងហោចណាស់ប្រជាពលរដ្ឋជាង ២០០គ្រួសារបានលើកមកតវ៉ានៅសាលាសង្កាត់ប៉ោយប៉ែតក្នុងគោលបំណងរបស់គាត់គឺមកធ្វើអន្តរាគមន៍ដល់ពលរដ្ឋផ្សេងទៀតដែលត្រូវអាជ្ញាធរកោះឲ្យមកបំភ្លឺ នឹងរកយុត្តិធម៌ជូនដល់ពួកគាត់តែប៉ុណ្ណោះ បែរជាអ្នកដែលមិនបានកោះហៅលើកគ្នាមកប្រសេកប្រសាចធ្វើឲ្យមានការភ្ញាក់ផ្អើលពេញក្រុងប៉ោយប៉ែតតែម្តង។
ករណីខាងលើនេះបានកើតនៅវេលាម៉ោងជាង៨ព្រឹក ក្នុងថ្ងៃទី០៣ ខែមិថុនា ឆ្នាំ២០១៩ នៅមុខសាលាសង្កាត់ប៉ោយប៉ែត ស្ថិតនៅក្នុងក្រុងប៉ោយប៉ែត ខេត្តបន្ទាយមានជ័យ ខណះដែលអាជ្ញាធរនិងមន្ត្រីជំនាញរបស់ក្រុមអធិការកិច្ចខេត្តនិងក្រសួង បានកោះអញ្ជើញប្រជាពលរដ្ឋផ្សេងទៀតដែលពាក់ព័ន្ធក្នុងរឿងដីធ្លីឲ្យចូលខ្លួនមកបំភ្លឺម្ដង៧ទៅ៨នាក់ ដើម្បីជួយរកយុត្តិធម៌ជូនដល់ជាពលរដ្ឋដែលរងគ្រោះ ដោយសារគេរំលោភយកដីធ្លីរបស់គាត់កន្លងទៅ តែបែរជាពួកគាត់ដែលមិនមានការពាក់ព័ន្ធក្នុងការកោះហៅនោះលើកគ្នាមកតវ៉ានឹងរារាំងការងាររបស់អាជ្ញាធរទៅវិញ។
តាមការលើកឡើងរបស់ប្រជាពលរដ្ឋដែលមកតវ៉ានោះបានបញ្ជាក់ថា ខ្លួនមិនមែនជាតំណាងឲ្យជនរងគ្រោះដោយសារដីធ្លីនោះទេ តែពួកគាត់មកពីភូមិព្រៃព្រិចមានគ្នាចំនួនជាង៥០០គ្រួសារឯណោះ ដែលរងគ្រោះដោយសារដីធ្លី កន្លងទៅហើយដីធ្លីរបស់ពួកគាត់នោះត្រូវបានអាជ្ញាធរមូលដ្ឋានចេញលិខិតកាន់កាប់ជូនពួកគាត់ស្របច្បាប់អស់ហើយ មិនត្រឹមតែប៉ុណ្ណោះមាន ស ជ ណ របស់រាជរដ្ឋាភិបាលកម្ពុជាបានសម្រេចប្រគល់ដីដែលមានបញ្ហាកន្លងទៅនោះជូនទៅដល់ប្រជាពលរដ្ឋធ្វើការគ្រប់គ្រងតាំងពីឆ្នាំ២០០០ រួចមកហើយផងដែរ ហើយលិខិតស្នាមដែលគាត់កាន់កាប់ដីធ្លីនោះ គឺពួកគាត់ធ្លាប់បានយកទៅដាក់នៅឯធនាគារផ្សេងៗ ដើម្បីយកលុយមកប្រើការបានរហូតដល់ពេលនេះទៀតផង។
ប៉ុន្តែស្រាប់តែមានអាជ្ញាធរចេញលិខិតកោះហៅតំណាងចំនួន៧នាក់នឹង៨នាក់មកសាកសួរនិងបំភ្លឺទាក់ទិនទៅនឹងករណីទំនាស់ដីធ្លីជាមួយនឹងក្រុមផ្សេងទៀត ទើបពួកគាត់លើកគ្នាមកជួយធ្វើអន្តរាគមន៍ខ្លាចអាជ្ញាធរចាប់ក្រុមតំណាងដែលបានកោះហៅនោះយកទៅឃុំខ្លួនបញ្ជូនទៅតុលាការ។
លោក ភោក លន ចៅសង្កាត់ប៉ោយប៉ែតបានបញ្ជាក់ថា ការពិតពួកគាត់ដែលមកតវ៉ានោះ គឺមិនត្រឹមត្រូវទេ អាជ្ញាធរបានធ្វើលិខអញ្ជើញពលរដ្ឋ ដែលរងគ្រោះដោយសារដីធ្លីជាមួយនឹងភាគីបង្ករផ្សេងទៀត ក្នុងគោលបំណងរកយុត្តិធម៌ជូនពួកគាត់ដោយមានក្រុមអធិការកិច្ចរបស់ខេត្តនិងក្រសួងបានអញ្ជើញចូលរួមនិងរកដំណោះស្រាយជូនពួកគាត់មិនមែនកោះហៅ ដើម្បីចាប់ពួកគាត់ដូចដែលពួកគាត់បានលើកឡើងនោះឡើយ។
លោកចៅសង្កាត់ខាងលើនោះក៏បានបន្តទៀតថា ក្នុងនាមអាជ្ញាធរដូចជាម៉ែឪអញ្ចឹង ហើយយើងខិតខំរកយុត្តិធម៌ជូនគាត់គ្រប់ពេលវេលាទាំងអស់ ជាពិសេសអាជ្ញាធរបានអនុវត្តតាមអនុសាសន៍ផ្ដាំផ្ញើដ៏ខ្ពង់ខ្ពស់របស់រាជរដ្ឋាភិបាលកម្ពុជាថា អាជ្ញាធរក្រោមថ្នាក់ជាតិត្រូវបម្រើរាស្ត្រឱ្យបានដិតដល់បំផុត ទាំងសេវាសាធារណៈនិងសេវាតម្រូវការ ជូនប្រជាពលរដ្ឋនៅតាមមូលដ្ឋានរបស់ខ្លួន ចុះហេតុអីបានជាពួកគាត់នាំគ្នាមកធ្វើបែបនេះមកលើអាជ្ញាធរហើយចោទអាជ្ញាធរចេញលិខិតកោះហៅពួកគាត់ដើម្បីចាប់ខ្លួនទៅវិញ៕
