មន្រ្តីយោធាម្នាក់ ព្រមប្រគល់ខ្លួន ឲ្យអាវុធហត្ថខេត្តកណ្តាល បន្ទាប់ពីបាញ់៤គ្រាប់ នៅខារ៉ាអូខេ B Gold នៅក្រុងតាខ្មៅ បង្កឲ្យមានការភ្ញាក់ផ្ញើល
ខេត្តកណ្តាល៖មន្រ្តីយោធាម្នាក់ដែលប្រើអាវុធម៉ាកឡុកបាញ់៤គ្រាប់នៅខារ៉ាអូខេ B Gold នៅក្រុងតាខ្មៅ បង្កឲ្យមានការភ្ញាក់ផ្ញើលឥឡូវព្រមប្រគល់ខ្លួនឲ្យអាវុធហត្ថខេត្តកណ្តាលដើម្បីបន្តតាមនិតិវិធីហើយ។
សូមជំរាបដែរថា៖ករណីដែលបង្កឲ្យមានការភ្ញាក់ផ្អើលនេះបានកើតឡើងនៅវេលាម៉ោង៨និង៣០នាទីយប់ ថ្ងៃទី០២ ខែមិថុនា ឆ្នាំ២០១៩ នៅចំណុចខារ៉ាអូខេ B-Gold ស្ថិតនៅភូមិព្រែករាំង សង្កាត់កំពង់សំណាញ់ ក្រុងតាខ្មៅ ខេត្តកណ្តាល។
សមត្ថកិច្ចបានឲ្យដឹងថា៖ជនទំនើងមានឈ្មោះ សាន សុច ភេទប្រុស អាយុ៣៨ឆ្នាំ មុខរបរយោធា មានទីលំនៅភូមិព្រែកហូរលិច សង្កាត់ព្រែកហូរ ក្រុងតាខ្មៅ ខេត្តកណ្តាល។ក្រោយពីឃាត់ខ្លួនកម្លាំងសមត្ថកិច្ចរឹបអូសបាននូវវត្ថុតាងមួយចំនួននៅកន្លែងកើតហេតុ រួមមាន៖ស្រោមកាំភ្លើងពណ៌ខ្មៅចំនួន០១,សោរម៉ូតូ១ចង្កោម (កូនសោរម៉ូតូ១,កូនសោររថយន្ត១ តេឡេរថយន្ត១)។
សមត្ថកិច្ចបញ្ជាក់ថា៖នៅមុនកើតហេតុបុរសខាងលើបានជិះម៉ូតូ C125 ពណ៌ខ្មៅ ស៊េរី២០១៩ ចូលផឹកស៊ីច្រៀងខារ៉ាអូខេ B Gold បន្ទប់លេខ888 ជាមួយមិត្តភក្តិប្រុស០២នាក់ទៀត មិនស្គាល់ឈ្មោះ។បន្ទាប់មកក៏បានឈ្លោះប្រកែកគ្នាហើយ គេឃើញជនសង្ស័យដើរចេញមកក្រៅហាងចាក់កែបម៉ូតូយកកាំភ្លើងខ្លីម៉ាកឡុក ពណ៌ខ្មៅ យកដើរចូលទៅបាញ់ ក្នុងហាងខាងលើ ចំនួន០៣គ្រាប់ ពេលនោះជនសង្ស័យបានស្រែកថា «អញឈ្មោះ អាសុច អាណាខ្លាំងចេញមកអញ បាញ់ឲ្យងាប់!! រួចហើយក៏ជិះម៉ូតូតាមផ្លូវ១១៥ ទៅទិសខាងលិច រួចក៏បាញ់ឡើងលើ០១គ្រាប់ទៀត គេចខ្លួនបាត់តែម្តង»។
បើតាមលោកឧត្តមសេនីយ៍ត្រី សំ តុលា មេបញ្ជាការអាវុធហត្ថខេត្តកណ្តាលបានថ្លែង នៅព្រឹកថ្ងៃទី០៣ ខែមិថុនា ឆ្នាំ២០១៩នេះថា មន្ត្រីយោធាម្នាក់ដែលផឹកស្រាស្រវឹង ហើយដកកាំភ្លើងខ្លី ម៉ាកឡុកបាញ់ចំនួន៤គ្រាប់ផ្អើលនៅខារ៉ាអូខេ B Gold ដែលស្ថិតនៅក្រុងតាខ្មៅ ខេត្តកណ្តាលយប់មិញនោះ ពេលនេះបានយល់ព្រមប្រគល់ខ្លួនឲ្យអាវុធហត្ថខេត្តកណ្តាល ដោយសារភាពពីទោសកំហុសរបស់ខ្លួនហើយ។
លោកឧត្តមសេនីយ៍បន្តថា នៅពេលនេះមន្ត្រីអាវុធហត្ថក្រុងតាខ្មៅ កំពុងធ្វើការសួរនាំមន្ត្រីយោធាដែលបាញ់បោះសេរី ដើម្បីចាត់វិធានការកសាងសំណុំរឿងបញ្ជូនទៅកាន់តុលាការ៕