អាជ្ញាធរខេត្តស្វាយរៀង(កម្ពុជា) និងអាជ្ញាធរខេត្តតៃនិញ(វៀតណាម) បើកកិច្ចប្រជុំ បូកសរុបការអនុវត្ត កិច្ចព្រមព្រៀង សហប្រតិបត្តិការ
ខេត្តស្វាយរៀង៖នាព្រឹកថ្ងៃសៅរ៍ ១២រោច ខែជេស្ឋ ឆ្នាំកុរ ឯកស័ក ព.ស. ២៥៦៣ ត្រូវនឹងថ្ងៃទី២៩ ខែមិថុនា ឆ្នាំ២០១៩នេះ ឯកឧត្ដម ម៉ែន វិបុល អភិបាល នៃគណៈអភិបាលខេត្តស្វាយរៀង អមដំណើរដោយឯកឧត្ដមសមាជិកក្រុមប្រឹក្សាខេត្ត អភិបាលរងខេត្តស្វាយរៀង ព្រមទាំងមេបញ្ជាការកងកម្លាំងទាំងបី ប្រធានមន្ទីរ-អង្គភាពជំនាញពាក់ព័ន្ធ អាជ្ញាធរក្រុង ស្រុកជាប់ព្រំដែន ប្រធានច្រកទ្វារព្រំដែន និងសមត្ថកិច្ចពាក់ព័ន្ធច្រើនរូប បានអញ្ជើញចូលរួមក្នុងកិច្ចប្រជុំបូកសរុបការអនុវត្តកិច្ចព្រមព្រៀង សហប្រតិបត្តិការរយ:ពេល១ឆ្នាំ នៅសាលប្រជុំសាលាស្រុកបេនកូវ ខេត្តតៃនីញ។
ចំណែកខាងប្រទេសវៀតណាមដឹកនាំដោយឯកឧត្តម ផាម វ៉ាន់តិន អនុលេខាបក្ស និងជាប្រធានគណៈកម្មាធិការប្រជាជនខេត្តតៃនិញ (វៀតណាម) អមដំណើរដោយលោកអនុប្រធានក្រុមប្រឹក្សាប្រជាជនខេត្ត អនុប្រធានគណៈកម្មាធិការប្រជាជនខេត្ត សមាជិកគណៈកម្មាធិការរណៈសិរ្សមាតុភូមិវៀតណាមខេត្តតៃនិញ ក្នុងនោះក៏មានការអញ្ជើញពីកម្លាំងទាំងបី ប្រធានមន្ទីរ-អង្គភាពជំនាញពាក់ព័ន្ធ អាជ្ញាធរក្រុង ស្រុកជាប់ព្រំដែន ប្រធានច្រកទ្វារព្រំដែន និងសមត្ថកិច្ចពាក់ព័ន្ធច្រើនរូបផងដែរ។
មានប្រសាសន៍ក្នុងឱកាសនេះ ឯកឧត្ដម ម៉ែន វិបុល អភិបាល នៃគណៈអភិបាលខេត្តស្វាយរៀង បានចាត់ទុកកិច្ចប្រជុំបូកសរុបការអនុវត្តកិច្ចព្រមព្រៀង សហប្រតិបត្តិការរយះពេល១ឆ្នាំកន្លងមកនេះ បានទទួលនូវលទ្ធផលល្អៗជាច្រើនដូចជា ជួយបង្កើននូវការពង្រឹងកិច្ចសហប្រតិបត្តិការកាន់រឹងមាំ និងល្អប្រសើរលើមូលដ្ឋានសមិទ្ធផលដែលខេត្ដទាំងពីរ(ស្វាយរៀង-តៃនិញ)។
ក្នុងនោះបានរួមគ្នាសម្រេចបាន ជាពិសេសលើបណ្ដាវិស័យនានា ដែលមានចែងក្នុងកិច្ចព្រមព្រៀង ដើម្បីជួយសម្រួល និងលើកកម្ពស់កម្រិតជីវភាពរស់នៅ របស់ប្រជាជនខេត្តទាំងពីរ ក៏ដូចជាជំរុញកំណើនសេដ្ឋកិច្ច និងការសម្រេចបាននូវចក្ខុវិស័យ នៃការប្រែក្លាយតំបន់ព្រំដែន ទៅជាតំបន់ដែលមានការអភិវឌ្ឍន៍ ប្រកបដោយសន្តិភាព សាមគ្គីភាព មិត្តភាព សហប្រតិបត្តិការ ភាតរភាព និងចីរភាព ស្របតាមស្មារតី នៃកិច្ចប្រជុំស្ដីពីកិច្ចសហប្រតិបត្តិការ និងការអភិវឌ្ឍន៍រវាងបណ្ដាខេត្តជាប់ព្រំដែន កម្ពុជា-វៀតណាម។ជាមួយគ្នានេះ ឯកឧត្ដមអភិបាលខេត្ត ក៏បានសម្ដែងនូវកោតសរសើរ និងវាយតម្លៃខ្ពស់ ចំពោះមន្ត្រីជំនាញពាក់ព័ន្ធរបស់ខេត្តទាំងពីរ ដែលបានខិតខំប្រឹងប្រែងសហការប្រកបដោយឆន្ទៈ ក្នុងការរៀបចំកិច្ចប្រជុំពិភាក្សាគ្រប់កម្រិត ក្នុងក្របខ័ណ្ឌថ្នាក់ដឹកនាំ និងក្របខ័ណ្ឌមន្ត្រីជំនាញបច្ចេកទេស ទាំងកិច្ចប្រជុំចង្អៀត និងទូលាយ នៅក្នុងខេត្តស្វាយរៀង និងខេត្តតៃនិញ។
ជាកិច្ចបញ្ចប់នៃកិច្ចប្រជុំឯកឧត្ដម ម៉ែន វិបុល អភិបាល នៃគណៈអភិបាលខេត្តស្វាយរៀង និងឯកឧត្តម ផាម វ៉ាន់តិន អនុលេខាបក្ស និងជាប្រធានគណៈកម្មាធិការប្រជាជនខេត្តតៃនិញ បានអញ្ជើញចុះហត្ថលេខារួមគ្នាលើរបាយការណ៍បូកសរុបលទ្ធផលកិច្ចព្រមព្រៀង សហប្រតិបត្តិការ ដោយមានការចូលរួមជាសក្ខីភាពពីថ្នាក់ដឹកនាំខេត្ត កម្លាំងសមត្ថកិច្ច និងអង្គភាពពាក់ព័ន្ធទាំងអស់របស់ខេត្តទាំងពីរ ក្រោមបរិយាកាសសប្បាយរីករាយ ប្រកបដោយមិត្តភាព សាមគ្គីភាព ភាពស្និទ្ធស្នាល និងកិច្ចសហប្រតិបត្តិការល្អប្រសើរ ៕
