សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ អញ្ជើញជាអធិបតីក្នុងពិធី ប្រកាសផ្ទេរតំណែងអភិបាល ខេត្តព្រះសីហនុ
ខេត្តព្រះសីហនុ៖នាព្រឹកថ្ងៃសៅរ៍ ១២រោច ខែជេស្ន ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី២៩ ខែមិថុនា ឆ្នាំ២០១៩ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអញ្ជើញជាអធិបតីក្នុងពិធីប្រកាសផ្ទេរមុខតំណែងអភិបាល នៃគណៈអភិបាលខេត្តព្រះសីហនុ។
ក្នុងនោះក៏មានការអញ្ជើញចូលរួមពីឯកឧត្តម លោកជំទាវ សមាជិកព្រឹទ្ធភា រដ្ឋសភា ឯកឧត្តម លោកជំទាវ ក្រុមការងារថ្នាក់ជាតិចុះជួយក្រុង ស្រុក ក្នុងខេត្តព្រះសីហនុ ឯកឧត្តម ប្រធានក្រុមប្រឹក្សាខេត្ត សមាជិកក្រុមប្រឹក្សាខេត្ត អភិបាលរងខេត្ត មន្ទីរ អង្គភាព កងកម្លាំង ជុំវិញខេត្ត អាជ្ញាធរស្រុកយ៉ាងច្រើនកុះករផងដែរ។
សូមជំរាបដែរថា៖ការប្រកាសផ្ទេរមុខតំណែងអភិបាល នៃគណៈអភិបាល ខេត្តព្រះសីហនុនាពេលនេះក្រោយរលំបាក់អគារកម្ពស់៧ជាន់ ដែលសាងសង់គ្មានច្បាប់ នៅក្រុងព្រះសីហនុ បណ្តាលឱ្យមនុស្សស្លាប់ចំនួន២៨នាក់ និងរងរបួស២៦នាក់ ក្រោយមកអភិបាលខេត្តបានចេញមុខសុំទោសសាធារណជន ព្រមទាំងបានលាលែងចេញពីតំណែង បន្ទាប់មកប្រមុខរាជរដ្ឋាភិបាលកម្ពុជា បានសម្រេចផ្ទេរ ឯកឧត្តម គួច ចំរើន ពីអភិបាលខេត្តកំពង់ចាម មកជាអភិបាលខេត្តព្រះសីហនុ ចំណែក ឯកឧត្តម អ៊ុន ចាន់ដា អភិបាលខេត្តព្រះវិហារ ត្រូវបានផ្ទេរមកជាអភិបាល ខេត្តកំពង់ចាម។
ក្នុងឱកាសនោះដែរសម្តេចបានក្រើនរំលឹក និងដាស់តឿនដល់ថ្នាក់ដឹកនាំខេត្តព្រះសីហនុថា ការអភិវឌ្ឍខេត្តមួយនេះ ត្រូវរក្សាឱ្យបាននូវអត្តសញ្ញាណជាតិ ពោលគឺចង់ឱ្យការរៀបចំស្លាកសញ្ញាផ្សេងៗ ត្រូវតែដាក់អក្សរខ្មែរពីលើជានិច្ច ហើយអក្សរបរទេសត្រូវដាក់ពីខាងក្រោម ពីព្រោះកន្លងមកធ្លាប់មានការប្រត្តិកម្មយ៉ាងច្រើនចំពោះការលើកស្លាកសញ្ញានានា នៅក្នុងខេត្តព្រះសីហនុ ដែលបង្ហាញអក្សរចិនពីលើ ហើយពេលខ្លះសរសេរអក្សរខ្មែរខុសឆ្គងជាច្រើនផងដែរ។
ជាមួយគ្នានេះដែរ ឯកឧត្តម គួច ចំរើន អភិបាលខេត្តថ្មី បានថ្លែងប្តេជ្ញាដើម្បីជាសក្ខីភាពឆ្លើយតប នឹងការផ្តល់នូវការគាំទ្រ និងជំនឿជឿជាក់ប្រកបដោយទំនុកចិត្តពី ប្រមុខរាជរដ្ឋាភិបាលកម្ពុជា និងសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្រ្តីក្រសួងមហាផ្ទៃ ក្នុងការបំពេញភារកិច្ចកសាងអភិវឌ្ឍន៍ជូនប្រជាជនក្នុងខេត្តព្រះសីហនុ កាន់តែល្អប្រសើរតបតាមការ ចង់បាន និងកំពុងសម្លឹងមើល ពីគ្រប់មជ្ឈដ្ឋានលើទឹកដីខេត្តទេសចរណ៍ដ៏ស្មុគស្មាញមួយនេះ៕
