រដ្ឋបាលស្រុកកំពង់ត្រាច នាំយកអំណោយ របស់ក្រសួងសង្គមកិច្ច និងអតីតយុទ្ធជនជូនក្រុមគ្រួសារ សពកម្មករសំណង់ ដែលស្លាប់បាត់បង់ជីវិត នៅស្រុកកំពង់ត្រាច
ខេត្តកំពត៖លោក ជួន សុភា អភិបាលរងស្រុក តំណាងលោក អូន ខន អភិបាល នៃគណៈអភិបាលស្រុក រួមជាមួយអាជ្ញាធរឃុំ ភូមិ និងក្រុមការងារមកពីមន្ទីរសង្គមកិច្ចអតីតយុទ្ធជនយុវនិតិសម្បទា ខេត្តកំពត អមដំណើរ លោក នៃ គង់ អភិបាលរងនៃគណៈអភិបាលខេត្តកំពត កាលពីព្រឹកថ្ងៃព្រហស្បតិ៍ ១០រោច ខែជេស្ឋ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី២៧ ខែមិថុនា ឆ្នាំ២០១៩ បានអញ្ជើញនាំយកអំណោយ ជាថវិការបស់ក្រសួងសង្គមកិច្ច និងអតីតយុទ្ធជនដល់ក្រុមគ្រួសារ នៃសពកម្មករសំណង់បានស្លាប់បាត់បង់អាយុជីវិតចំនួន៦នាក់ ស្ថិតនៅក្នុងភូមិបឹងធំខាងកើត និងភូមិព្រៃទទឹង ឃុំអង្គសុរភី ស្រុកកំពង់ត្រាច ខេត្តកំពតដែលរងគ្រោះដោយឧបទ្ទវហេតុបាក់រលំអគារសំណង់នៅខេត្តព្រះសីហនុកន្លងទៅ។
អំណោយជាថវិការបស់ក្រសួងសង្គមកិច្ចនិងអតីយុទ្ធជន បានប្រគល់ជូនក្រុមគ្រួសារសពទាំង៦ ដោយគ្រួសារនីមួយៗទទួលបានថវិកាចំនួន២,០០០,០០០រៀល សរុប១២,០០០,០០០រៀល។
បន្ទាប់មកនៅវេលាម៉ោង១១ព្រឹកនាថ្ងៃដដែល រដ្ឋបាលស្រុកកំពង់ត្រាច បានចូលរួមជាមួយលោក វណ្ណ សុភានោ អគ្គនាយកក្រុមហ៊ុនRF3 World Cambodia រួមជាមួយប្រតិភូ បាននាំយកអំណោយជាថវិកាជូនដល់ក្រុមគ្រួសារសពទាំង៦ នៅភូមិឃុំខាងលើ ដើម្បីចាត់ចែងធ្វើបុណ្យតាមប្រពៃណី។
អំណោយជាថវិការបស់ក្រុមហ៊ុន RF3 World Cambodia ផ្តល់ជូនគ្រួសារសពទាំង៦ ដោយក្នុងមួយគ្រួសារៗទទួលបានថវិកាចំនួន២៥០$ សរុបរួម ១៥០០$៕
