ជនសង្ស័យ២នាក់ ដែលជាប់ពាក់ព័ន្ធករណីជួញដូរថ្នាំញៀន ត្រូវបានសមត្ថកិច្ចចាប់វាយខ្នោះ
ខេត្តពោធិ៍សាត់:ដោយមានបទបញ្ជាពីស្នងការដ្ឋាននគរបាល ខេត្តពោធិ៍សាត់ កម្លាំងសមត្ថកិច្ចស្រុកក្រគរ បានចុះធ្វើការល្បាត និងស្រាវជ្រាវ រហូតឈានដល់ការបង្ក្រាប និងចាប់ឃាត់ខ្លួនជនសង្ស័យបានចំនួន២នាក់ ពាក់ព័ន្ធករណីជួញដូរគ្រឿងញៀនខុសច្បាប់
នៅត្រង់ចំណុចព្រំប្រទល់ឃុំឈើតុំ ស្វាយស ក្នុងផ្ទះសំណាក់យីហោ"សុខម៉េង"ស្ថិតក្នុងភូមិត្រពាំងស្នួល ឃុំស្វាយស ស្រុកក្រគរ ខេត្តពោធិ៍សាត់ កាលពីវេលាម៉ោងជាង១០ព្រឹក ថ្ងៃទី២៨ ខែមិថុនា ឆ្នាំ២០១៩។
បើតាមសមត្ថកិច្ចបានឲ្យដឹងថា ជនសង្ស័យទាំង២នាក់ ដែលត្រូវបានសមត្ថកិច្ចចាប់ឃាត់ខ្លួននោះមាន ឈ្មោះ ព្រីម សីលា (ហៅផើង) ភេទប្រុស អាយុ៣៤ឆ្នាំ ជនជាតិខ្មែរ បច្ចុប្បន្ន រស់នៅភូមិកំពង់សំបួរ ឃុំសំរោងក្នុង ស្រុកឯកភ្នំ ខេត្តបាត់ដំបង និងម្នាក់ទៀត
ឈ្មោះ សុន មុំ ភេទស្រី អាយុ២៧ឆ្នាំ ជនជាតិខ្មែរ បច្ចុប្បន្ន រស់នៅភូមិទួលត្បែង ឃុំឈើតុំ ស្រុកក្រគរ ខេត្តពោធិ៍សាត់។
ក្រោយពេលឃាត់ខ្លួនម្លាំងសមត្ថកិច្ចបានធ្វើការដកហូតនូវវត្ថុតាង និងសម្ភារៈមួយចំនួនរួមមាន:ម្សៅក្រាមព័ណសថ្លា សង្ស័យជាសារធាតុញៀនចំនួន០៦កញ្ចប់តូច ចំនួន ០២កញ្ចប់ធំល្មម ចំនួន០២កញ្ចប់ និងធំចំនួន០២កញ្ចប់,អាវុធខ្លី០១ដើមមានលេខ 021311 និងគ្រាប់ចំនួន០៣គ្រាប់,លុយចំនួន១០,៥០០០រៀល,លុយបាតចំនួន ១២២០បាត និងលុយដុល្លាចំនួន២៣៥ដុល្លាអាមេរិច,ទូរស័ព្ទ និងរថយន្តកាម៉ារីចង្កូតស្តាំ ១គ្រឿងផងដែរ។
បច្ចុប្បន្នជនសង្ស័យទាំង២នាក់ រួមនិងវត្ថុតាងត្រូវបានកម្លាំងសមត្ថកិច្ចកសាងសំណុំ បញ្ជូនបន្តទៅការិយាល័យជំនាញ នៃស្នងការដ្ឋាននគរបាលខេត្តពោធិ៍សាត់ ដើម្បីចាត់ការបន្តតាមនិតិវិធី៕