ប្រកាសបិទផ្សាយជាសាធារណៈ នូវឯកសារនៃការវិនិច្ឆ័យ លើការចុះបញ្ជីដីធ្លីមានលក្ខណៈជាប្រព័ន្ធ នៅស្រុករលាប្អៀរ
ខេត្តកំពង់ឆ្នាំង៖រដ្ឋបាលដីធ្លីខេត្តកំពង់ឆ្នាំង នាព្រឹកថ្ងៃសុក្រ ១១រោច ខែជេស្ឋ ឆ្នាំកុរ ឯកស័កព.ស ២៥៦៣ ត្រូវនឹងថ្ងៃទី២៨ ខែមិថុនា ឆ្នាំ២០១៩ បានរៀបចំពិធីប្រកាសបិទផ្សាយជាសាធារណៈ នូវឯកសារ នៃការវិនិច្ឆ័យ លើការចុះបញ្ជីដីធ្លីមានលក្ខណៈជាប្រព័ន្ធ ភូមិទ្រាត្បូង ឃុំស្រែថ្មី ស្រុករលាប្អៀរ ខេត្តកំពង់ឆ្នាំង ដែលមានក្បាលដីសរុប១៥៧២ក្បាលដី ក្រោមអធិបតីលោក ង៉ែត សុវុធ្ធា អនុប្រធានមន្ទីរ តំណាងលោក លី សុភា ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្តកំពង់ឆ្នាំង និងជានាយកចាត់ការកម្មវិធីអនុវិស័យរដ្ឋបាលដីធ្លីខេត្ត លោក សេង វិចិត្រ អភិបាលរងស្រុករលាប្អៀរ។
សមាសភាពដែលអញ្ជើញចូលរួមមាន មន្ទីរ អង្គភាពពាក់ព័ន្ធ,គ្រឹស្ថានមីក្រូហិរញ្ញវត្ថុ,ក្រុមការងារចុះបញ្ជីដីធ្លីមានលក្ខណៈជាប្រព័ន្ធ(ក្រុម២),អាជ្ញាធរភូមិ ឃុំ និងប្រជាពលរដ្ឋចូលរួម សរុបប្រមាណ ២០០នាក់ (ស្រី១២២នាក់)។
ក្នុងឱកាសនេះ លោក ង៉ែត សុវុធ្ធា បានមានប្រសាសន៍ថា៖ការបិទផ្សាយនេះ មានរយៈពេល១៥ ថ្ងៃដោយរាប់បញ្ចូលទាំងថ្ងៃឈប់សម្រាក គិតចាប់ពីថ្ងៃទី២៨ ខែមិថុនា ដល់ថ្ងៃទី១២ ខែកក្កដា ឆ្នាំ២០១៩ ហេតុនេះសូមប្រជាពលរដ្ឋម្ចាស់ដី និងអ្នកពាក់ព័ន្ធនឹងក្បាលដីទាំងអស់ ចូលរួមពិនិត្យផ្ទៀតផ្ទាត់ ដើម្បីបញ្ជាក់ពីភាពត្រឹមត្រូវ ឬខុសឆ្គង ត្រូវកែតម្រូវ ឬទំនាស់លើទិន្នន័យទាំងនោះ មុននឹងគណៈកម្មការរដ្ឋបាលសម្រេចចេញវិញ្ញាបនបត្រសម្គាល់ម្ចាស់អចលនវត្ថុ(ប័ណ្ណកម្មសិទ្ធ) ជូនម្ចាស់ក្បាលដី៕