អាជ្ញាធរខេត្តសៀមរាប អញ្ជើញជាអធិបតីក្នុងពិធី ទិវាបរិស្ថានជាតិ និងបរិស្ថានពិភពលោក ៥មិថុនា ក្រោមប្រធានបទ «ការបំពុលខ្យល់»
ខេត្តសៀមរាប៖កូនឈើចម្រុះចំនួន៥៥០០ដើម បានការឧបត្ថម្ភពីអាជ្ញាធរជាតិអប្សរា ត្រូវបានអាជ្ញាធរខេត្ត ដែលដឹកនាំដោយឯកឧត្តម ទៀ សីហា អភិបាល នៃគណៈអភិបាលខេត្តសៀមរាម បានដាំ និងប្រគេនជូនដល់វត្តចំនួន៥ ព្រមទាំងចែកជូនដល់សាលាវិទ្យាល័យ អនុវិទ្យាល័យក្នុងស្រុកប្រាសាទបាគង ខេត្តសៀមរាប នាព្រឹកថ្ងៃទី២៧ ខែ មិថុនា ឆ្នាំ២០១៩ ក្នុងពិធីទិវាបរិស្ថានជាតិ និងបរិស្ថានពិភពលោក ៥មិថុនា ក្រោមប្រធានបទ «ការបំពុលខ្យល់»នៅសាលាវិទ្យាល័យ អនុវិទ្យាល័យ ក្នុងស្រុកប្រាសាទបាគង ខេត្តសៀមរាប។
សូមជំរាបដែរថា ក្នុងពិធីនោះដែរក៏មានការអញ្ជើញចូលរួមពីសំណាក់ ឯកឧត្តក លោកទំទាវ លោក លោកស្រី អភិបាលរងខេត្ត និងកម្លាំងប្រដាប់អាវុធ ប្រធាន អនុប្រធានមន្ទីរអង្គភាពនានាជុំវិញខេត្ត យ៉ាងច្រើនកុះករផងដែរ។
ការប្រារព្ធពិធីនេះឡើង ដោយផ្តោតសំខាន់ទៅលើការថែទាំភពផែនដី និងធនធានទឹក ស្រទាប់អូហ្សូន ការផ្លាស់ប្តូរអាកាសធាតុ រហោស្ថានកម្ម និងអភិវឌ្ឍន៍ប្រកបដោយចីរភាព ។
ឯកឧត្តម ទៀ សីហា អភិបាល នៃគណៈអភិបាលខេត្តសៀមរាម បានបញ្ជាក់ថា ការប្រារព្ធទិវាបរិស្ថានជាតិ និងទិវាបរិស្ថានពិភពលោក គឺក្នុងគោលបំណងពញ្ញាក់ស្មារតីមនុស្សគ្រប់ៗរូបឲ្យមានការ គិតគូរពីហានិភ័យបរិស្ថាននានា ដែលតែងតែកើតមានមកលើសង្គមមនុស្ស និង ជួយដាស់តឿនដល់សហគមន៍ជាតិ យើងទាំងអស់ឲ្យយកចិត្តទុកដាក់ពីបញ្ហាបរិស្ថាន ដើម្បីផលប្រយោជន៍មនុស្សគ្រប់រូប គ្រួសារនីមួយៗ និងសេដ្ឋកិច្ច-សង្គមជាតិយើងទាំងមូល។
មនុស្សគ្រប់រូបមានសិទ្ធិសេរីភាព ក្នុងការទទួលយកពីធម្មជាតិនូវខ្យល់ស្អាតសម្រាប់ដកដង្ហើម ទឹកស្អាតសម្រាប់ទទួលទាន មានដីស្អាតសម្រាប់ការបង្កបង្កើនផល និងមានសមធម៌ក្នុងការបែងចែកភោគផលពីធម្មជាតិ ហើយមនុស្សម្នាក់ៗមានសិទ្ធិចូលរួមអនុវត្តវិធានការការពារថែរក្សាបរិស្ថាន ទាំងគុណភាព និងបរិមាណ ហើយត្រូវចាត់ទុកថា ការរស់នៅប្រកបដោយចីរភាព ការអភិរក្សជីវចម្រុះ និងកិច្ចគាំពារបរិស្ថានជាភារកិច្ចយើងទាំងអស់គ្នា។
ជាមួយគ្នានោះដែរឯកឧត្តម ក៏បានលើកនូវភាពជាក់ស្តែងមួយ ស្តីពីការចោលសំរាម តាមប្រព័ន្ធលូទឹកស្អុយ ផ្លូវថ្នល់ ទីសាធារណៈ និងការដឹកសំរាមទៅចាក់ចោលពុំចំគោលដៅកំណត់ ធ្វើឲ្យទីប្រជុំជនបាត់សោភ័ណភាព ប៉ះពាល់ដល់មោទនភាពរបស់ខេត្តយើង ដែលជាខេត្តទេសចរណ៍ និង មានកិត្តិសព្ទល្បីរន្ទឺទៀតផង។
ម្យ៉ាងទៀតការបង្ហូរទឹកស្អុយ សំណល់រាវតាមលំនៅដ្ឋាន សណ្ឋាគារ រមណីយដ្ឋាន រោងចក្រ សហគ្រាស សិប្បកម្មនានា ដោយគ្មានអាងចម្រោះ ក៏ធ្វើឲ្យមានការបំពុលទឹកផងដែរ។ឯកឧត្តម ទៀ សីហា ក៏បានលើកផងដែរ អំពីអត្ថប្រយោជន៍នៃដើមឈើ គឺបានផ្តល់ជាប្រភពទឹក ទីម្រកដល់មនុស្សសត្វរស់នៅ និងបង្កើតឲ្យមានខ្យល់បរិសុទ្ធទៀតផង។
បច្ចុប្បន្ននេះភ្នំគូលែន ដែលជាតំបន់ទេសចរណ៍ធម្មជាតិ ក៏បានត្រូវរងគ្រោះដោយបាត់បង់ធនធានធម្មជាតិ ដែល បង្កឡើងដោយអំពើមនុស្ស ហើយភ្នំគូលែនជាទីប្រភពទឹកដែលផ្តល់មកស្ទឹងប្រវត្តិសាស្ត្រសៀមរាប ។
ដោយកត្តានៃអំពើទាំងនេះ ហើយដែលធ្វើឲ្យសោភណ្ឌភាពនៃស្ទឹងប្រវត្តិសាស្ត្រ ទទួលរងគ្រោះ ហើយតំបន់មួយចំនួនក៏មានការខ្វះខាតទឹកទៀតផង ម៉្យាង ទៀតបឹងទន្លេសាប ក៏បានទទួលរងគ្រោះផងដែរ ដែលធ្វើឲ្យជីវៈចម្រុះមួយចំនួនត្រូវបានបាត់បង់ ទាំងនេះក៏កើតឡើងពីអំពើនៃ មនុស្សដែលបង្កឲ្យមានគ្រោះមហន្តរាយទាំងនេះ ដោយការបាត់បង់ព្រៃលិចទឹក និង ការកាប់ទន្ទ្រានព្រៃលិចទឹកយកដីធ្វើស្រែ និងការបោះចោលសម្រាមឲ្យហូរចូលទៅបឹងទន្លេសាប ដែលធ្វើឲ្យប៉ះពាល់ដល់ធនធានមច្ឆាជាតិទៀតផង៕
