បុរសម្នាក់ចិត្តខ្លាំង យកសាំងចាក់ដុតសម្លាប់ខ្លួនឯង មិនដឹងមូលហេតុ
រាជធានីភ្នំពេញ៖នារសៀលថ្ងៃទី២៧ ខែមិថុនា ឆ្នាំ២០១៩ មានករណីភ្ញាក់ផ្អើលមួយបានកើតឡើង ដោយបុរសម្នាក់ បានយកសាំងចាក់ដុតសម្លាប់ខ្លួនឯង បណ្តាលឲ្យស្លាប់យ៉ាងអណោចអធ័មបំផុត មិនដឹងពីមូលហេតុ។
ករណីនេះបានកើតឡើងនៅចំណុចដីឡូមួយកន្លែង តាមបណ្ដោយផ្លូវបេតុងក្នុងក្រុម១៤ ស្ថិតនៅក្នុងភូមិស្ពានខ្ពស់ សង្កាត់គីឡូម៉ែត្រលេខ៦ ខណ្ឌឫស្សីកែវ រាជធានីភ្នំពេញ។
ក្រោយកើតហេតុភ្លាមៗ កម្លាំងសមត្ថកិច្ចមូលដ្ឋានក្រោមការបញ្ជាកម្លាំងផ្ទាល់ពីលោកវរសេនីយ៍ទោ គល់ យី អធិការនគរបាលខណ្ឌឬស្សីកែវ សហការជាមួយកម្លាំងជំនាញ របស់ការិយាល័យចក្ខុកោសល្យវិច័យ នៃស្នងការដ្ឋាននគរបាល រាជធានីភ្នំពេញ ដើម្បីធ្វើការហ៊ំព័ទ្ធទីតាំងកើតហេតុ និងបើកការត្រួតពិនិត្យ និងធ្វើការស្រាវជ្រាវរកមូលហេតុ នៃការចាក់សាំងដុតធ្វើអត្តឃាតសម្លាប់ខ្លួនឯងនេះ។
បើតាមប្រភពព័ត៌មាននៅកន្លែងកើតហេតុ បានឲ្យដឹងថា បុរសដែលធ្វើអត្តឃាតសម្លាប់ខ្លួនឯង ដោយចាក់សាំងដុតនេះមានឈ្មោះ សុក្រ ទើបតែមកពីធ្វើការងារនៅឯប្រទេសថៃ និងប្រើប្រាស់គ្រឿងញៀនផងដែរ ហើយករណីខាងលើនេះដែរសង្ស័យអាចបណ្ដាលមកពីបែកថ្នាំ។
បច្ចុប្បន្នសព ក្រោយពីធ្វើកោសល្យវិច័យរួច ប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី៕