ចាប់វាយខ្នោះបុរស២នាក់ បន្ទាប់ពីចូលលួចឆក់ត្រី នៅក្នុងតំបន់អភិរក្សការពារ នៅស្រុកកូនមុំ
ខេត្តរតនគិរី៖នាវេលាម៉ោងជាង៥ព្រឹក ថ្ងៃទី២៦ ខែមិថុនា ឆ្នាំ២០១៩ កម្លាំងអធិការនគរបាលស្រុកកូនមុំ សហការជាមួយកម្លាំងប៉ុស្តិ៍រដ្ឋបាល ឃុំត្រពាំងច្រេស និងកម្លាំងសហគមន៍នេសាទ បានចុះចាប់ឃាត់ខ្លួនបុរសពីរនាក់ បន្ទាប់ពីចូលលួចប្រព្រឹត្តបទល្មើស ឆក់ត្រី នៅក្នុងតំបន់អភិរក្សការពារ នៅត្រង់ចំណុចព្រំប្រទល់អភិរក្សកោះសំពៅ ស្ថិតនៅក្នុងភូមិ៥ ឃុំត្រពាំងច្រេស ស្រុកកូនមុំ ខេត្តរតនគិរី។
ជនសង្ស័យដែលត្រូវបានឃាត់ខ្លួនមានឈ្មោះ ផេង ឡន ភេទប្រុស អាយុ២២ឆ្នាំ ជនជាតិឡាវ និងឈ្មោះ កែវ ធិ ភេទប្រុស អាយុ១៩ឆ្នាំ ជនជាតិឡាវ អ្នកទាំងពីរមានទីលំនៅភូមិស្រែពកតូច ឃុំស្រែពក ស្រុកកូនមុំ ខេត្តរតនគីរី។
ក្រោយការឃាត់ខ្លួនសមត្ថកិច្ចដកហូតបាននូវវត្ថតាំងរូមមាន៖ទូកម៉ាស៊ីនចំនួន០២គ្រឿង,ក្បាលឆក់ត្រីចំនួន០២,អាគុយ៧០ចំនួន១,អាគុយ៥០ចំនួន២ និងក្បាលឆក់ត្រី១ បានលិចបាត់ទៅក្នុងទឹកទន្លេ រកមិនឃើញ។
បច្ចុប្បន្នជនសង្ស័យទាំងពីរនាក់ រួមនិងវត្ថុតាងបទល្មើស ត្រូវបានកម្លាំងអធិការនគរបាល ស្រុកកូនមុំ បានប្រគល់ទៅឲ្យមន្ត្រីជំនាញរដ្ឋបាលជលផលខេត្ត ដើម្បីចាត់ការបន្តទៅតាមនិតិវិធីច្បាប់៕