រដ្ឋបាលខេត្តសៀមរាប រៀបចំកិច្ចប្រជុំសាមញ្ញលើកទី១ របស់ក្រុមប្រឹក្សាខេត្តសៀមរាប អាណត្តិទី៣
ខេត្តសៀមរាប៖នាព្រឹកថ្ងៃទី២៦ ខែមិថុនា ឆ្នាំ២០១៩នេះ ឯកឧត្តម អ៊ឹង ហឿន ប្រធានក្រុមប្រឹក្សាខេត្ត និងឯកឧត្តម ទៀ សីហា អភិបាល នៃគណៈអភិបាលខេត្តសៀមរាប បានដឹកនាំកិច្ចប្រជុំសាមញ្ញលើកទី១ របស់ក្រុមប្រឹក្សាខេត្តសៀមរាប អាណត្តិទី៣ នៅរដ្ឋបាលសាលាខេត្តសៀមរាប ដើម្បីពិនិត្យពិភាក្សា ទៅលើរបាយការណ៍ លទ្ធផលការងាររបស់រដ្ឋបាលខេត្ត ក្រុមប្រឹក្សាខេត្តអាណត្តិទី២ ដែលនៅសេសសល់រយៈពេលបីខែ ដែលអនុម័ត ដោយក្រុមប្រឹក្សាខេត្ត និងធ្វើការផ្សព្វផ្សាយសេចក្តីណែនាំលេខ ០១៥ សណន របស់ក្រសួងមហាផ្ទៃ ស្តីពីការរៀបចំបទបញ្ជាផ្ទៃក្នុង និងគំរូបទបញ្ជាផ្ទៃក្នុងរបស់ក្រុមប្រឹក្សា និងការពិនិត្យ ពិភាក្សាការរៀបចំសេចក្តីព្រាងប្រតិទិន កិច្ចប្រជុំរបស់ក្រុមប្រឹក្សាខេត្ត រយៈពេល១២ខែ និងលើកឡើងនូវបញ្ហាផ្សេងៗ។
ក្នុងនោះដែរក៏មានការអញ្ជើញចូលរួមពីសំណាក់ឯកឧត្តម លោកជំទាវ ជាសមាជិកក្រុមប្រឹក្សាខេត្ត គណៈអភិបាលខេត្ត អាជ្ញាធរជាតិអប្សរា និងអស់លោក លោកស្រី ថ្នាក់ដឹកនាំមន្ទីរ ស្ថាប័ន អង្គភាពជុំវិញខេត្តយ៉ាងច្រើនកុះករផងដែរ។
បន្ទាប់ពីការពិនិត្យកូរ៉ុម សមាសភាពសមាជិកក្រុមប្រឹក្សាខេត្ត ចូលរួមប្រជុំមានវត្តមាន២៧រូប លើ២៧រូប រួចមក ឯកឧត្តម អ៊ឹង ហឿន បានមានប្រសាសន៍ បើកកិច្ចប្រជុំសាមញ្ញលើកទី១ អាណត្តិទី៣ របស់ក្រុមប្រឹក្សាខេត្ត រួចមក សមាជិកអង្គប្រជុំទាំងមូលក៏បានធ្វើការពិភាក្សា ពិនិត្យ និង អនុម័តទៅលើរបៀបរវារៈកិច្ចប្រជុំរួចមក ព្រមទាំងបានអនុញ្ញាតឲ្យធ្វើការពិនិត្យរបាយការណ៍ ស្តីពីលទ្ធផល និងសកម្មភាពការងារអនុវត្ត បានរបស់រដ្ឋបាលខេត្តសៀមរាប ដែលអនុម័ត ដោយក្រុមប្រឹក្សាខេត្ត និង នៅសេសសល់រយៈពេល០៣ខែឆ្នាំ២០១៩។
ក្នុងនោះដែរឯកឧត្តម ទៀ សីហា ក៏បានអនុញ្ញាតឲ្យលោក សុខ ថុល នាយករដ្ឋបាលសាលាខេត្ត អាននូវរបាយការណ៍លទ្ធផលការងារ និងទិសដៅ ដែលត្រូវអនុវត្តបន្តរបស់រដ្ឋបាលខេត្តសៀមរាប ដែលនៅសេសសល់ក្នុងអាណត្តិទី២ របស់ក្រុមប្រឹក្សាខេត្ត និងការ អាននូវសេចក្តីណែនាំ របស់ក្រសួងមហាផ្ទៃ ស្តីពីការរៀបចំបទបញ្ជាផ្ទៃក្នុង និងគំរូបទបញ្ជាផ្ទៃក្នុងរបស់ក្រុមប្រឹក្សា និងការពិនិត្យ ពិភាក្សាការរៀបចំសេចក្តីព្រាងប្រតិទិន កិច្ចប្រជុំរបស់ក្រុមប្រឹក្សាខេត្ត រយៈពេល១២ខែ នៃអាណត្តិទី៣។ក្នុងនោះដែរសមាជិកក្រុមប្រឹក្សា ក៏បានធ្វើការពិនិត្យ ពិភាក្សា ទៅលើខ្លឹមសារ នៃសេចក្តីព្រាងបទបញ្ជាផ្ទៃក្នុងរបស់ក្រុមប្រឹក្សា ទៅតាមជំពូកនិមួយៗ យ៉ាងល្អិតល្អន់ និងស៊ីជម្រៅទៅលើខ្លឹមសារទាំងនោះ ព្រមទាំងសេចក្តីព្រាងប្រតិទិននៃកិច្ចប្រជុំសាមញ្ញរបស់ក្រុមប្រឹក្សាខេត្តទាំង១២ខែផងដែរ ។
ឯកឧត្តម ទៀ សីហា ក៏បានបញ្ជាក់ជូនដល់កិច្ចប្រជុំសាមញ្ញលើកទី១ របស់ក្រុមប្រឹក្សាខេត្ត អាណត្តិទី៣ ឲ្យបានជ្រាបច្បាស់ អំពីឋានានុក្រម ពីតួនាទីភារកិច្ចរបស់ក្រុមប្រឹក្សាខេត្ត គណៈអភិបាលខេត្ត ក្នុងនិតិបញ្ញាត និង និតិប្រតិបត្តិ ។ឯកឧត្តមក៏បានលើកឡើងផ្តោតទៅលើការងារធនធានរ៉ែ និង សំណង់ គឺមន្ទីរជំនាញគឺត្រូវយកចិត្តទុកដាក់ខ្ពស់ ចំពោះបញ្ហាសំណង់នៅក្នុងក្រុង ស្រុង ទាំង ចាស់ ទាំងថ្មី អំពីបទដ្ឋានបច្ចេកទេសសំណង់ ក្នុងពេលសាងសង់បានត្រឹមត្រូវទៅតាមបទដ្ឋានបច្ចេកទេស ព្រមទាំងមានច្បាប់អនុញ្ញាតឲ្យ សាងសង់ហើយឬនៅ តែបើរាល់សំណង់ទាំងឡាយណាគ្នាច្បាប់ត្រឹមត្រូវ ហើយខុសទៅនឹងបទដ្ឋានបច្ចេកទេសសាងសង់ គឺត្រូវបញ្ឈប់ ជាបន្ទាន់ ឬធ្វើការរុះរើ ដើមី្បធានាដល់សន្តិសុខ សុវត្ថិភាពជាសាធារណៈ ដើមី្បជៀសវាងកុំឲ្យមានកើតឡើងដូចនៅខេត្តព្រះសីហនុ៕