បុរសម្នាក់ ខឹងសុំលុយម្តាយមិនបាន បែរជាបង្កហិង្សា បណ្តាលឱ្យម្តាយស្លាប់បាត់បង់ជីវិត ត្រូវ សមត្ថកិច្ចឃាត់ខ្លួន
ខេត្តកំពត៖សមត្ថកិច្ចស្រុកអង្គរជ័យ ចាប់ឃាត់ខ្លួនបុរសម្នាក់ បញ្ជូនទៅកាន់ស្នងការដ្ឋាននគរបាល ខេត្តកំពត ក្រោយពីជនសង្ស័យរូបនោះ បានបង្កហិង្សាទៅលើម្តាយរបស់ខ្លួន បណ្តាលឱ្យស្លាប់បាត់បង់ជីវិត ព្រោះតែខឹងសុំលុយចាយមិនបាន។
ករណីហិង្សាខាងលើបានកើតឡើងនៅវេលាម៉ោង១៧និង៣០នាទីល្ងាច ថ្ងៃទី២៥ ខែមិថុនា ឆ្នាំ២០១៩ ស្ថិតក្នុងភូមិត្រពាំងខ្យង ឃុំអង្គភ្នំតូច ស្រុកអង្គរជ័យ ខេត្តកំពត។
ជនរងគ្រោះ ដែលស្លាប់ដោយសារទារុណកម្មរបស់កូនប្រុសបង្កើតរហូតដល់ស្លាប់នេះ មានឈ្មោះ សេង នាង ភេទស្រី អាយុ៧២ឆ្នាំ រស់នៅក្នុងភូមិ ឃុំ កើតហេតុខាងលើ។
ពាក់ព័ន្ធនឹងករណីនេះ សមត្ថកិច្ចខេត្តកំពតបានប្រាប់ឱ្យដឹងថា កាលពីវេលាដូចខាងលើ ជនសង្ស័យ ឈ្មោះ ផាត់ ដារា ភេទប្រុស អាយុ២៧ឆ្នាំ ដែលជាមនុស្សសតិមិនល្អ បានទៅសុំលុយម្តាយ ដែលជាជនរងគ្រោះចាយ ប៉ុន្តែខណៈនោះម្តាយរបស់ជនសង្ស័យប្រាប់ថា គាត់អត់មានលុយទេ ទើបធ្វើឱ្យជនសង្ស័យខឹងសម្បារយ៉ាងខ្លាំង ហើយបុរសជាកូនក៏ធ្វើសកម្មភាពវាយ និងយកកាំបិតកាប់ទៅលើម្តាយរបស់ខ្លួន បណ្តាលឱ្យគាត់រងរបួសធ្ងន់ធ្ងរ ហើយត្រូវបានសាច់ញាតិដឹកទៅសង្គ្រោះភ្លាមៗ ប៉ុន្តែដោយសាររបួសធ្ងន់ពេក ជនរងគ្រោះជាម្តាយបានដាច់ខ្យល់ស្លាប់បាត់បង់ជីវិតនៅតាមផ្លូវតែម្តង។
បច្ចុប្បន្នជនសង្ស័យត្រូវបានសមត្ថកិច្ចការិយាល័យ ព្រហ្មទណ្ឌកម្រិតធ្ងន់ កសាងសំណុំរឿងដើម្បីចាត់ការតាមនីតិវិធីច្បាប់៕
