ជនសង្ស័យចំនួន១០នាក់ ដែលពាក់ព័ន្ធនឹងករណី វាយប្លន់ម៉ូតូអ្នកដំណើរ ត្រូវសមត្ថកិច្ចបញ្ជូន ទៅសាលាដំបូង ខេត្តកំពត
ខេត្តកំពត៖នៅព្រឹកថ្ងៃទី២៦ ខែមិថុនា ឆ្នាំ២០១៩ សមត្ថកិច្ចខេត្តកំពត បានកសាងសំណុំរឿងបញ្ជូនជនសង្ស័យចំនួន១០នាក់ ទៅកាន់សាលាដំបូងខេត្តកំពត ដើម្បីចាត់ការតាមនិតិវិធី ពាក់ព័ន្ឋករណីធ្វើសកម្មភាពស្ទាក់ វាយ ប្លន់ម៉ូតូអ្នកដំណើរ ស្ថិតក្នុងភូមិសាស្ត្រឃុំបឹងទូក ស្រុកទឹកឈូ ខេត្តកំពត កាលពីវេលាម៉ោង១១និង៣០នាទីព្រឹក ថ្ងៃទី២៣ ខែមិថុនា ឆ្នាំ២០១៩កន្លងទៅ។
ទាក់ទិននឹងករណីខាងលើសមត្ថកិច្ចការិយាល័យព្រហ្មទណ្ឌកម្រិតធ្ងន់ នៃស្នងការដ្ឋាននគរបាលខេត្តកំពត បានឱ្យដឹងថា ជនសង្ស័យដែលត្រូវបញ្ជូនទៅកាន់សាលាដំបូងខេត្ត គឺជាប់ពាក់ព័ន្ធ នឹងករណីស្ទាក់ វាយ ប្លន់ម៉ូតូម៉ាកC125 ផលិតឆ្នាំ២០១៩ មួយគ្រឿងរបស់ជនរងគ្រោះជិះគ្នាបីនាក់ ១.ឈ្មោះ ជឹម វាសនា ភេទប្រុស អាយុ១៩ឆ្នាំ,២.ឈ្មោះ ជឹម សិត ភេទប្រុស អាយុ១៧ឆ្នាំ និងទី៣.ឈ្មោះ ច្រឹក ឡុង ភេទប្រុស អាយុ២២ឆ្នាំ(ត្រូវជាបងប្អូននឹងគ្នា) ដែលកំពុងធ្វើដំណើរតាមដងផ្លូវជាតិលេខ៣(កំពត-វាលរេញ) ចំណុចខាងលិចផ្លូវឡើងទៅរមណីយដ្ឋាន ឋានសួគ៌បូកគោ ស្ថិតក្នុងភូមិរលួស ឃុំបឹងទូក ស្រុកទឹកឈូ ខេត្តកំពត។
ដោយសកម្មខាងលើ ក្រុមសង្ស័យបានជិះម៉ូតូកៀរ រួចធាក់ផ្តួលម៉ូតូជនរងគ្រោះឱ្យដួល រួចយកដំបង ដំថ្មវាយទៅលើជនរងគ្រោះ ហើយប្លន់ម៉ូតូជិះឆ្ពោះទៅទិសខាងលិច ហើយក្រោយពីមានបណ្តឹងរបស់ម្ចាស់ម៉ូតូ ទើបកម្លាំងសមត្ថកិច្ចសហការគ្នា ឃាត់ខ្លួនជនសង្ស័យបាននៅម្តុំស្ពានកំពង់ស្មាច់ ឃុំទឹកល្អក់ ស្រុកព្រៃនប់ ខេត្តព្រះសីហនុ រួចនាំខ្លួនជនសង្ស័យមកកាន់ស្នងការដ្នាននគរបាលខេត្តកំពតតែម្តង។
សមត្ថកិច្ចបានបន្តថា ការបង្ក្រាបជនសង្ស័យ១០នាក់នេះ កម្លាំងស្នងការដ្ឋាននគរបាលខេត្តកំពត បានសហការជាមួយកម្លាំងអធិការដ្ឋាននគរបាលស្រុកទឹកឈូ និងអធិការដ្ឋាននគរបាលស្រុកព្រៃនប់ ខេត្តព្រះសីហនុ ដោយប្រតិបតិ្តការនេះកម្លាំងបានដកហូតម៉ូតូរបស់ជនសង្ស័យចំនួន៥គ្រឿង ដែលគេជិះឌុបគ្នាធ្វើសកម្មភាពផងដែរ។
សមត្ថកិច្ចបានបញ្ជាក់ទៀតថា ក្រុមជនសង្ស័យទាំង១០នាក់រួមមាន៖១/-ឈ្មោះ ឡុង បញ្ញា ភេទប្រុស អាយុ១៦ឆ្នាំ រស់នៅភូមិទឹកថ្លា សង្កាត់ទឹកថ្លា ខណ្ឌសែនសុខ រាជធានីភ្នំពេញ,២/-ឈ្មោះ វី សុខយី ភេទប្រុស អាយុ១៦ឆ្នាំ រស់នៅភូមិកប់ស្រូវតូច សង្កាត់កូករកា ខណ្ឌព្រែកព្នៅ រាជធានីភ្នំពេញ,៣/-ឈ្មោះ ឈួន សិលា ហៅឡា ភេទប្រុស អាយុ១៦ឆ្នាំ រស់នៅផ្ទះជួល ភូមិក្រោលគោ សង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ,៤/-ឈ្មោះ គឹម រិទ្ធី ហៅធី ភេទប្រុស អាយុ១៦ឆ្នាំ នៅសង្កាត់ក្រាំងធ្នង់ ខណ្ឌពោធិសែនជ័យ រាជធានីភ្នំពេញ,៥/-ឈ្មោះ សេង វីរៈ ហៅប៉ក់ ភេទប្រុស អាយុ១៦ឆ្នាំ នៅភូមិស្ពានខ្ពស់ សង្កាត់គីឡូម៉ែត្រលេខ៦ ខណ្ឌឫស្សីកែវ រាជធានីភ្នំពេញ,៦/-ឈ្មោះ សុផាត សុបញ្ញា ភេទប្រុស អាយុ១៦ឆ្នាំ នៅភូមិគីឡូម៉ែត្រ៧ សង្កាត់ច្រាំងចំរេះ ខណ្ឌឫស្សីកែវ រាជធានីភ្នំពេញ,៧/-ឈ្មោះ រីម ដារ៉ាចាន់ ភេទប្រុស អាយុ១៧ឆ្នាំ នៅភូមិ៦ សង្កាត់ឃ្មួញ ខណ្ឌសែនសុខ រាជធានីភ្នំពេញ,៨/-ឈ្មោះ អ៊ុំ សែនឧត្តម ភេទប្រុស អាយុ១៦ឆ្នាំ នៅភូមិគីឡូម៉ែត្រកេខ៧ សង្កាត់ច្រាំងចំរេះ ខណ្ឌឫស្សីកែវ រាជធានីភ្នំពេញ ,៩/-ឈ្មោះ សាត ភារ៉ុង ភេទប្រុស អាយុ១៥ឆ្នាំ នៅភូមិឃ្មួញ សង្កាត់ឃ្មួញ ខណ្ឌសែនសុខ រាជធានីភ្នំពេញ,១០/-ឈ្មោះ នី ស្រីខួច ភេទស្រី អាយុ១៧ឆ្នាំ នៅតាស្គរ សង្កាត់ពន្សាំង ខណ្ឌព្រែកព្នៅ រាជធានីភ្នំពេញ។
ក្រោយពីសាកសួរ ជនសង្ស័យ រួមជាមួយវត្ថុតាង សមត្ថកិច្ចបានកសាងសំណុំរឿង បញ្ជូនទៅកាន់សាលាដំបូងខេតតកំពត ដើម្បីចាត់ការតាមផ្លូវច្បាប់៕