ពង្រឹងជើងទំនប់អាងជើងគ្រុះ ហើយសាកល្បងដាំដូងក្រអូប រាប់រយដើមនៅមាត់អាង
ខេត្តបន្ទាយមានជ័យ៖ក្រុមការងារសមាគមនារីកម្ពុជា ដើម្បីសន្តិភាព និងអភិវឌ្ឍន៍ ខេត្តបន្ទាយមានជ័យ ដឹកនាំដោយលោកជំទាវម៉ៅ ម៉ាល័យ កែ គឹមយ៉ាន និងឯកឧត្តម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ កាលពីថ្ងៃទី២៥ ខែមិថុនាឆ្នាំ ២០១៩ បានដាក់គ្រឿងចក្រស្ថាបនាពង្រឹង ពង្រីកសមត្ថភាពទំនប់អាងជើងគ្រុះ និងសាកល្បងដាំដូងក្រអូប រាប់រយពាន់ដើម នៅមាត់អាងដែលស្ថិតនៅភូមិគោកសំរោងលិច ឃុំបន្ទាយឆ្មារ ស្រុកថ្មពួកខេត្ត បន្ទាយមានជ័យ។
លោកប្រាក់ សារ៉ាក់ សមាជិកក្រុមការងាររបស់លោកជំទាវម៉ៅ ម៉ាល័យ កែ គឹមយ៉ាន បានឲ្យដឹងថា ទំនប់អាងជើងគ្រុះដែលក្រុមការងារដាក់គ្រឿងចក្របាននឹងកំពុងពង្រឹងពង្រីកសមត្ថភាពនៅមានប្រវែង៣.០០០ម៉ែត្រ បន្ថែមលើទទឹង៤ម៉ែត្រគុណនឹង២ និងជើងទេរ៨ម៉ែត្រពោល គឺដើម្បីទាញយកសក្កានុពលស្រោចស្រពនេះលើវិស័យកសិកម្ម ក៏ដូចជាការគាំទ្របន្ថែមទៀត លើគម្រោងរមនីយ៍ដ្ឋានធម្មជាតិបៃតងអាងជើងគ្រុះនេះ ហើយកន្លងមកអាងទឹកបុរាណមានទំហំ៤.០០០ម៉ែត្រគុណ គុណ៦.០០០ម៉ែត្រ ដែលជាអាងបុរាណ និងពង្រីកបន្ថែមក្នុងសម័យកម្ពុជាប្រជាធិបតេយ្យមួយនេះ ត្រូវបានស្តារ និងជួសជុលឡើងវិញ ដើម្បីទាញយកទឹកស្រោចស្រព ដោយអង្គការអីខិនដិនកម្ពុជា ក្រោមមូលនិធិការីដូរី និងស្ថានទូតចក្រភពអង់គ្លេស។
លោកបន្តថា ក្នុងតំបន់អាងនេះលោកជំទាវ ម៉ៅ ម៉ាល័យ បានគាំទ្រ និងឧបត្ថម្ភមូលនិធី១០០.០០០.០០រៀលរៀបចំសហគមន៍ឱឡឹកអាងជើងគ្រុះ ផ្ទៃដី៣០០ហិចតា ដោយអនុវត្តជំហាន១ ចំនួន៣៨ហិចតា។
ចំណែកលោក គឹម សុជាតិ អ្នកបច្ចេកទេស នៃក្រុមហ៊ុនផលិតពូជស្រូវ និងដំណាំនៅខេត្តបន្ទាយមានជ័យឲ្យដឹងថា ក្នុងនាមជាដៃគូជាមួយក្រុមការងារលោកជំទាវ លោកបាន នឹងកំពុងសាកល្បង ដាំដុះតាមបច្ចេកទេស នូវដូងក្រអូបរាប់រយពាន់ដើមលើដី នៅមាត់អាងជើងគ្រុះនេះ ។
លោកជំទាវ ម៉ៅ ម៉ាល័យ កែ គឹមយ៉ាន និងឯកឧត្តម អ៊ុំ រាត្រី បានជម្រុញឲ្យកម្មវិធីអភិវឌ្ឍន៍ នៅអាងជើងគ្រុះនេះ ដើម្បីការរីកចម្រើននៅមូលដ្ឋាន ក៏ដូចជាលើកកម្ពស់ជីវភាពពលរដ្ឋផងដែរ ៕
