ប្រកាសផ្ទេរ និងចូលកាន់មុខតំណែង ប្រធានសាលាដំបូង ខេត្តបន្ទាយមានជ័យ ក្រោមអធិបតីភាព ឯកឧត្តម អង្គ វង្ស វឌ្ឍានា រដ្ឋមន្ត្រីក្រសួងយុត្តិធម៌
ខេតត្តបន្ទាយមានជ័យ៖នាព្រឹកថ្ងៃទី២៤ ខែមិថុនា ឆ្នាំ២០១៩ ឯកឧត្តម អង្គ វង្ស វឌ្ឍានា រដ្ឋមន្ត្រីក្រសួងយុត្តិធម៌ ឯកឧត្តម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ បានអញ្ជើញជាអធិបតីក្នុងពិធីប្រកាសផ្ទេរ និងចូលកាន់មុខតំណែង ប្រធានសាលាដំបូង ខេត្តបន្ទាយមានជ័យ នៅសាលប្រជុំសាលា ខេត្តបន្ទាយមាន័យ ដោយមានការអញ្ជើញចូលរួមពីមន្ត្រីជាន់ខ្ពស់ មន្ត្រីជាន់ខ្ពស់មកពីក្រសួងយុត្តិធម៍ អង្គភាពអាវុធហត្ថ អង្គភាពនគរបាល អង្គភាពយោធា រដ្ឋបាលសាលាខេត្ត រដ្ឋបាលស្រុក ក្រុង និងអ្នកពាក់ព័ន្ធជាច្រើននាក់ទៀត។
យោងតាមព្រះរាជក្រឹត្យលេខ នស/រកត/០៦១៩/៨១១ ចុះថ្ងៃទី១៣ ខែមិថុនា ឆ្នាំ២០១៩ បានត្រាស់បង្គាប់តែងតាំង និងផ្ទេរមុខតំណែង លោក ជឺ សុខ ប្រធានសាលាដំបូង ខេត្តបន្ទាយមានជ័យ ត្រូវបានផ្ទេរមុខតំណែងឲ្យមកបម្រើការងារ ជាប្រធានសាលាដំបូង ខេត្តសៀមរាប
លោក ងួនណារ៉ា ប្រធានសាលាដំបូង ខេត្តសៀមរាប ត្រូវបានផ្ទេរមុខតំណែងឲ្យមកបម្រើការងារជាប្រធានសាលាដំបូង ខេត្តបន្ទាយមានជ័យ។
លោកជឺ សុខ ប្រធានសាលាដំបូង ខេត្តបន្ទាយមានជ័យ ដែលត្រូវផ្លាស់ចេញបានមានប្រសាសន៍ថា អស់រយះដែលកាន់កាប់៥ឆ្នាំកន្លងមកនេះ លោកបានខិតខំបំពេញតួនាទីភារកិច្ចតាមការទទួលខុសត្រូវ ដោយបានធ្វើការរួមជាមួយព្រះរាជអាជ្ញា ចៅក្រម ព្រះរាជអាជ្ញារង ក្រឡាបញ្ជី និងមន្ត្រីក្នុងស្ថាប័ន ក្រៅស្ថាប័ន។
ក្នុងនោះ សំណុំរឿងប្រចាំឆ្នាំ២០១៨ សំណុំរឿងសល់ពីមុន៩០១រឿង សំណុំរឿងចូលថ្មី៦៥២រឿង ក្នុងនោះសំណុំរឿងចាត់ការរួចចំនួន៧៧៨រឿង កំពុងចាត់ការ៧៧៥រឿង និងក៏មានសំណុំរឿងព្រហ្មទ័ណ្ឌជំនុះជម្រះ សំណុំរឿងរដ្ឋប្បវេណី សំណុំរឿងអនុវត្តជាច្រើនទៀត។
លោកបានបន្តថា ក្រៅពីនោះ ទាំងអស់គ្នាក្នុងសាលាដំបូង និងអយ្យការអមសាលាដំបូង ក៏បានសង់អគារ១ខ្នងកម្ពស់២ជាន់សម្រាប់មន្ត្រីធ្វើការសាលសវនាការឃ្លាំងសម្ភារ: និងសម្រាប់រក្សាឯកសារវត្ថុតាង។
លោក ងួន ណារ៉ា ប្រធានថ្មីសាលាដំបូង ខេត្តបន្ទាយមានជ័យ បានថ្លែងអំណរគុណចំពោះថ្នាក់លើក្នុងការបន្តការតែងតាំងរូបលោក ហើយលោកសូមប្តេជ្ញាចិត្តខិតខំទ្វេរដង ដើម្បីបំពេញការងារតាមតួនាទីភារកិច្ចឲ្យបានលទ្ធផល និងមានប្រសិទ្ធភាពល្អប្រកបដោយការទទួលខុសត្រូវ។
ក្នុងនោះឯកឧត្តម អ៊ុំ រាត្រី អភិបាល នៃគណៈអភិបាល ខេត្តបន្ទាយមានជ័យទទួលស្គាល់លទ្ធផលការងាររបស់ប្រធានចាស់ ហើយសង្ឃឹមថា ប្រធានថ្មីសាលាដំបូងខេត្តនេះ នឹងបន្តស្នាដៃឲ្យកាន់តែល្អ ពិសេសសហការ និងរកយុត្តិធម៍ជូនពលរដ្ឋជាភាគីក្តី។
ឯកឧត្តម អង្គ វង្សវឌ្ឍនា មានប្រសាសន៍ថា ថ្វីត្បិតការផ្លាស់ប្តូរកន្លែង តួនាទីភារកិច្ចរបស់មន្ត្រីជាដំណើរប្រព្រឹត្តិទៅធម្មតា នៃរដ្ឋបាលការងារប៉ុន្តែវាក៏ដើម្បីពង្រឹងលទ្ធផល និងប្រសិទ្ធិភាពការងារផងនិងលើកទឹកចិត្តមន្ត្រីដែលខិតខំធ្វើការផង ។
ឯកឧត្តមមរដ្ឋមន្ត្រីក្រសួងយុត្តិធម៍ បានផ្តាំផ្ញើនិងណែនាំការងារមួយចំនួន ហើយជម្រុញឲ្យចៅក្រមម្នាក់ កាត់ក្តីយ៉ាងហោចអោយបាន១ទៅ២រឿងក្នុង១ថ្ងៃៗ ពោលគឺ១ឆ្នាំឲ្យបានប្រមាណ២០៥រឿងចៅក្រមម្នាក់ៗក្នុងការពន្លឿនការកាត់ក្តីសំណុំរឿងគ្រឿងញៀនដែលកើនខ្ពស់រាល់ថ្ងៃដូចដែលសម្តេចក្រឡាហោមស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃបានស្នើឡើង៕