រដ្ឋបាលខេត្តព្រះសីហនុ៖ ករណីបាក់រលំអគារសាងសង់កម្ពស់០៧ជាន់ គិតមកត្រឹមម៉ោង១០ព្រឹកនេះអ្នកស្លាប់ចំនួន៣នាក់ និងរងរបួស១៨នាក់
ខេត្តព្រះសីហនុ៖ករណីបាក់រលំអគារសាងសង់កម្ពស់០៧ជាន់ មានទីតាំងស្ថិតនៅភូមិ៣ សង្កាត់លេខ៤ ក្រុងព្រះសីហនុ ខេត្តព្រះសីហនុ កាលពីវេលាម៉ោង០៤ទៀបភ្លឺ ថ្ងៃទី២២ ខែមិថុនា ឆ្នាំ២០១៩ នេះ គិតមកត្រឹមម៉ោង១០ព្រឹកថ្ងៃ ខែដដែលបណ្ដាលឲ្យមនុស្សស្លាប់បាត់បង់ជីវិតចំនួន៣នាក់ (ស្រី១នាក់) និងរងរបួសចំនួន១៨នាក់ (ជាកម្មករសំណង់ស្នាក់នៅក្នុងការដ្ឋាននោះ)។
នេះបើយោយតាមសេចក្តីប្រកាសព័ត៌មាន របស់រដ្ឋបាលខេត្តព្រះសីហនុ។
សេចក្តីប្រកាសព័ត៌មាន របស់រដ្ឋបាលខេត្តព្រះសីហនុបានបញ្ជាក់ថា៖សំណង់អគារនេះមានទំហំទទឹង១៥ម៉ែត្រ បណ្ដោយ៣០ម៉ែត្រ និងកំពុងដំណើរការសាងសង់ បានប្រមាណ៧០ ទៅ៨០ភាគរយ។មកដល់ពេលនេះថ្នាក់ដឹកនាំខេត្ត កម្លាំងសមត្ថកិច្ច និងមន្ត្រីអាជ្ញាធរមូដ្ឋានកំពុងសហការគ្នា យ៉ាងមមាញឹក ដើម្បីជួយសង្គ្រោះជនរងគ្រោះដែលកំពុងនៅក្នុងគំនរសំណង់បាក់បែក នៃការដ្ឋាននោះ និងបានបង្កើតក្រុមការងារប្រចាំការជួយសង្គ្រោះបន្ទាន់ផងដែរ។
បច្ចុប្បន្នសមត្ថកិច្ចបានធ្វើការឃាត់ខ្លួនថៅកែម៉ៅការសំណង់ និងអ្នកដែលជាប់ពាក់ពន្ឋ័ចំនួន០៤នាក់ទៅសួរនាំ។
ការដ្ឋានសំណង់នេះមានម្ចាស់ឈ្មោះ Chen Kun ភេទប្រុស អាយុ៣៩ឆ្នាំ បានជួលដីសម្រាប់សាងសង់អគារពីឈ្មោះ ញឹក ហ៊ុយ ភេទប្រុស ជនជាតិខ្មែរ អាយុ៦៥ឆ្នាំ បានម៉ៅការសាងសង់ដោយក្រុមហ៊ុន XI GANG TANG GONG GOU JI HAISAO មានថៅកែម៉ៅការសាងសង់ឈ្មោះ DENG XING GUI ភេទប្រុស អាយុ៤៨ឆ្នាំ និងអ្នកម៉ៅការបូកជញ្ជាំងអគារឈ្មោះ GAO YU ភេទប្រុស អាយុ២៩ឆ្នាំ៕
