សាខាកាកបាទក្រហមកម្ពុជា ខេត្តស្វាយរៀង អញ្ជើញជួបសំណេះសំណាល និងចែកអំណោយមនុស្សធម៌ ជូនដល់គ្រួសារចាស់ជរា ជនទីទល័ក្រ ជនពិការ អ្នកផ្ទុកមេរោគអេដស៍ និង កុមារកំព្រា នៅតាមបណ្តាឃុំនានាក្នុងស្រុកស្វាយជ្រំ
ខេត្តស្វាយរៀង:នាព្រឹកថ្ងៃសុក្រ ៤រោច ខែជេស្ឋ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី២១ ខែមិថុនា ឆ្នាំ២០១៩នេះ ឯកឧត្ដម ម៉ែន វិបុល អភិបាល នៃគណៈអភិបាលខេត្ត និងជាប្រធានគណៈកម្មាធិការសាខាកាកបាទក្រហមកម្ពុជាខេត្តស្វាយរៀង បានអញ្ជើញជួបសំណេះសំណាល និងចែកអំណោយមនុស្សធម៌កាកបាទក្រហមកម្ពុជាខេត្ត ជូនដល់គ្រួសារចាស់ជរា ជនទីទល័ក្រ ជនពិការ អ្នកផ្ទុកមេរោគអេដស៍ និង កុមារកំព្រា នៅតាមបណ្តាឃុំនានាក្នុងស្រុកស្វាយជ្រំសរុបចំនួន២៥២គ្រួសារ។
ពិធីនេះក៏មានការអញ្ជើញចូលរួមពីលោកជំទាវ ពៅ សុភាព ហេរញ្ញឹកគណៈកម្មាធិការសាខា លោក លោកស្រី ជាសមាជិក សមាជិកាគណៈកម្មាធិការសាខា លោកនាយក នាយករងសាខាកាកបាទក្រហមកម្ពុជាខេត្ត តំណាងកងកម្លាំងទាំងបី លោកអភិបាលស្រុកស្វាយជ្រំស្ដីទី ក្រុមប្រឹក្សាស្រុក លោកមេឃុំ ព្រមទាំងលោក លោកស្រីជាសមាជិក សមាជិកាគណៈកម្មាធិការអនុសាខាកាកបាទក្រហមកម្ពុជាស្រុកស្វាយជ្រំជាច្រើនរូបទៀត។
មានប្រសាសន៍ក្នុងឱកាសនោះ ឯកឧត្ដមអភិបាលខេត្ត និងជាប្រធានគណៈកម្មាធិការសាខាកាកបាទ ក្រហមកម្ពុជាខេត្តបានពាំនាំនូវប្រសាសន៍ផ្ដាំផ្ញើសួរសុខទុក្ខ និងសេចក្ដីនឹករលឹកពីសំណាក់សម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនដល់បងប្អូនប្រជាពលរដ្ឋ ដែលជានិច្ចកាលសម្ដេច លោកតែងតែគិតគូរពីសុខទុក្ខ និងជំរុញឲ្យមានការដោះស្រាយបញ្ហានានារបស់បងប្អូនប្រជាពលរដ្ឋគ្រប់ពេលវេលា និងគ្រប់ទីកន្លែង ។
ជាមួយនេះ ឯកឧត្ដម បានថ្លែងនូវការអរគុណចំពោះអាជ្ញាធរដែនដីពាក់ព័ន្ធ ក្រុមការងារយុវជន ស.ស.យ.ក ស្រុក និងកងកម្លាំងនៅមូលដ្ឋានទាំងអស់ ដែលតែងតែជួយអន្តរាគមន៍សង្គ្រោះ ប្រជាពលរដ្ឋនាពេលកន្លងមកបានទាន់ពេលវេលា ក្នុងនោះមានការជួយសាងសង់ផ្ទះ ដែលបានរងគ្រោះដោយសារខ្យល់កន្ត្រាក់ជាដើម ។
ទន្ទឹមនេះ ឯកឧត្ដមក៏ផ្ដាំផ្ញើដល់បងប្អូនប្រជាពលរដ្ឋទាំងអស់ ត្រូវមានការប្រុងប្រយ័ត្នខ្ពស់ពីសុវត្ថិភាពផ្ទាល់ ខ្លួន និងក្រុមគ្រួសារ ដោយត្រូវបិទទូរសព្ទ រកកន្លែងដែលមានសុវត្ថិភាព នៅពេលមានភ្លៀងធ្លាក់ ដែលងាយនឹងបង្កឲ្យមានគ្រោះថ្នាក់ដោយសាររន្ទះ ឬខ្យល់កន្ត្រាក់ ត្រូវមើលថែទាំកូនចៅឲ្យបានល្អ ជាពិសេសក្មេងតូចៗ កុំឲ្យលេងទឹកដែលអាចបង្កឲ្យមានគ្រោះថ្នាក់ ដោយករណីលង់ទឹក ត្រូវថែរក្សាសុខភាព ត្រូវបង្ការកាពារការឆ្លងជំងឺគ្រុនឈាមដែលកើតចេញពីមូសខ្លាខាំ ត្រូវគេងក្នុងមុង ជាពិសេសក្មេងតូចៗ ត្រៀមឧបករណ៍ សម្ភារ ពូជស្រូវជាដើម សម្រាប់ការងារបង្កបង្កើនផលនារដូវវស្សានេះ ឲ្យបានទាន់ពេលវេលា និងជួយអប់រំណែនាំកូនចៅឲ្យគោរពច្បាប់ចរាចរណ៍ និងចៀសឲ្យឆ្ងាយពីគ្រឿងញៀនគ្រប់ប្រភេទ។
សូមបញ្ជាក់ថា អំណោយដែលបានចែកជូនទាំង២៥២គ្រួសារ ក្នុង១គ្រួសារទទួលបាន អង្ករ៣០គ.ក្រ មី១កេស ទឹកស៊ីអ៊ីវ៦ដប ត្រីខ ១០កំប៉ុង កន្ទេលបត់១ ឃីត១កញ្ចប់ (មុង ភួយ សារុង ក្រមា) និងថវិកា៥០.០០០រៀល លោកជំទាវ ហៅ ច័ន្ទសិរីទេពី ចៅ ភិរុណ អនុប្រធានគណៈកម្មាធិការសាខា ឧបត្ថម្ភថវិកាបន្ថែមក្នុង១គ្រួសារ១០,០០០រៀល ផងដែរ៕