ឯកឧត្តម យន្ត មីន អភិបាលខេត្តព្រះសីហនុ បានអញ្ជើញជាអធិបតីភាព ក្នុងពិធីប្រកាសដាក់ឱ្យដំណើរការ ច្រកចេញចូលតែមួយ ស្រុកស្ទឹងហាវ
ខេត្តព្រះសីហនុ៖នារសៀលថ្ងៃព្រហស្បតិ៍ ៣រោជ ខែជេស្ន ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី២០ ខែមិថុនា ឆ្នាំ២០១៩ ឯកឧត្តម យន្ត មីន អភិបាល នៃគណៈអភិបាលខេត្តព្រះសីហនុបានអញ្ជើញជាអធិបតីភាព ក្នុងពិធីប្រកាសដាក់ឱ្យដំណើរការ ច្រកចេញចូលតែមួយ នៅសាលាស្រុកស្ទឹងហាវ ។
ក្នុងពិធីនោះដែរក៏មានការអញ្ជើញចូលរួមពីមន្រ្តីរាជការ កងកម្លាំងប្រដាប់អាវុធ សិស្សានុសិស្ស និងប្រជាពលរដ្ឋយ៉ាងច្រើនកុះករ ផងដែរ។
លោក ឆាយ សុគន្ធដា អភិបាលស្រុកស្ទឹងហាវបានឱ្យដឹងថា៖ការិយាល័យច្រកចេញ ចូលតែមួយ និងការិយាល័យប្រជាពលរដ្ឋស្រុកស្ទឹងហាវបានដាក់ឱ្យដំណើរការនារសៀលនេះ ដើម្បីផ្តល់សេវាសាធារណៈជូនប្រជាពលរដ្ឋ ដើម្បីភាពងាយស្រួលកាត់បន្ថយការចំណាយពេលវេលា បង្កើនទំនុកចិត្តដល់ប្រជាពលរដ្ឋ និងបង្ខិតសេវាមកជិតប្រជាពល រដ្ឋ។
ជាក់ស្ដែងក្នុងឆ្នាំ២០១៨ ស្រុកបានផ្ដល់សេវាបានចប់សព្វគ្រប់ចំនួន៤.៣៨៨ច្បាប់ មានប្រជាពលរដ្ឋមកទទួលសេវាសរុប២.១០៦នាក់។
ឯកឧត្តម យន្ត មីន អភិបាលខេត្តព្រះសីហនុ បានមានប្រសាសន៍ថា ការដាក់ឲ្យដំណើរការការិយាល័យច្រក ចេញចូលតែមួយ និងការិយាល័យប្រជាពលរដ្ឋស្រុកស្ទឹងហាវនាពេលនេះ គឺជាការផ្ដល់សិទ្ធិសម្រេចក្នុងការទទួលខុសត្រូវដល់ក្រុមប្រឹក្សា និងគណៈអភិបាលស្រុក ដែលជាតំណាងរាជរដ្ឋាភិបាលនៅថ្នាក់ស្រុក ក្នុងការផ្ដល់សេវារដ្ឋបាលជូនប្រជា ពលរដ្ឋចំនួន១៤វិស័យ ក្នុងនោះមានវិស័យជំនាញចំនួន១០ ដែលក្រសួង ស្ថាប័នពាក់ព័ន្ធបានធ្វើប្រតិភូកម្ម និងវិស័យផ្ទាល់ចំនួន៤។
ឯកឧត្តមបន្តថា ក្នុងវិស័យទាំង១៤ មានសេវារហូតដល់២១១សេវា ដែលរដ្ឋបាលស្រុក ត្រូវអនុវត្តផ្ដល់សេវារដ្ឋបាលដោយផ្ទាល់ ដើម្បីឆ្លើយតបទៅ នឹងតម្រូវការរបស់ប្រជាពលរដ្ឋនៅមូលដ្ឋាន។
ចំពោះការិយាល័យប្រជាពលរដ្ឋនៅរដ្ឋបាលថ្នាក់ស្រុក គឺដើម្បីលើកកម្ពស់អភិបាលកិច្ចល្អ ក្នុងការផ្ដល់សេវា និងការអភិវឌ្ឍន៍នៅមូលដ្ឋានតាមរយៈពង្រឹងតួនាទី ភារកិច្ចរបស់រដ្ឋបាលស្រុក ក្នុងការទទួល និងសម្រុះសម្រួលដោះ ស្រាយបណ្ដឹងក្រៅប្រព័ន្ធតុលាការពាក់ព័ន្ធ នឹងការផ្ដល់សេវាសាធារណៈ និងការគ្រប់គ្រងរដ្ឋបាលប្រកបដោយតម្លាភាពគណនេយ្យភាព ប្រសិទ្ធភាព សំដៅបង្កើនជំនឿទុក ចិត្តប្រជាពលរដ្ឋនៅក្នុងមូលដ្ឋាន៕
