មន្រ្តីនគរបាលម្នាក់ ត្រូវរថយន្តកិនស្លាប់ បាត់បង់ជីវិតនៅនឹងកន្លែង បន្ទាប់ពីបើកម៉ូតូជែងខ្វះការប្រុងប្រយ័ត្ន
ខេត្តកណ្ដាល៖នាវេលាម៉ោង១៤នឹង៥៥នាទី ថ្ងៃសុក្រ ១២កើត ខែជេស្ឋ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី១៤ ខែមិថុនា ឆ្នាំ២០១៩ មានករណីគ្រោះថ្នាក់ចរាចរណ៍គួរឲ្យរន្ធត់មួយបានកើតឡើងរវាងរយន្ត នឹងម៉ូតូបណ្ដាលឲ្យបុរសម្នាក់ស្លាប់បាត់បង់ជីវិតនៅនឹងកន្លែងកើតហេតុ។
ហេតុការណ៍នេះបានកើតឡើងនៅចំណុចលើផ្លូវជាតិលេខ១ ក្នុងចន្លោះគីឡូម៉ែត្រលេខ១៨.១៩ ស្ថិតនៅក្នុងភូមិទួលក្របៅ ឃុំគគីរ ស្រុកកៀនស្វាយ ខេត្តកណ្ដាល។
បើតាមសមត្ថកិច្ចបានឲ្យដឹងថា នៅមុនពេលកើតហេតុមានម៉ូតូម៉ាកHONDA DREAM125ព័ណខ្មៅ ផលិតឆ្នាំ២០១៩ ពាក់ផ្លាកលេខ កណ្ដាល 1B-7072បើកបរដោយឈ្មោះ ស ចាន់ដារិទ្ធ ភេទប្រុស អាយុ៣៦ឆ្នាំ ជនជាតិខ្មែរ មុខរបរ ជាមន្រ្តីនរគបាល នៅក្រុងតាខ្មៅ មានទីលំនៅ ភូមិតាខ្មៅ សង្កាត់តាខ្មៅ ក្រុងតាខ្មៅ ខេត្តកណ្ដាល ដែលបើកបរក្នុងទិសដៅពីអ្នកលឿងទៅភ្នំពេញ តាមផ្លូវជាតិលេខ១។
ពេលបើកមកដល់កន្លែងកើតហេតុខាងលើ បានបើកជែងរថយន្តមិនស្គាល់អត្តសញា្ញណ ហើយកៀរ រថយន្តនោះបណ្ដាលអោយដួលម៉ូតូបោកទៅខាងឆ្វេង ទៅបុកជាមួយរថយន្ត០១គ្រឿងម៉ាកSTERLlNGព័ណស ប្រភេទសណ្ដោងពាក់ផ្លាកលេខភ្នំពេញ៣E- 1751 សណ្ដោងសឺមីរ៉ឺម៉ក ពាក់ផ្លាកលេខ ភ្នំពេញ៤A-១៥០០ បើកបរដោយជនមិនស្គាល់អត្តសញា្ញណ ដែលបើកក្នុងទិសដៅផ្ទុយគ្នា បណ្ដាលអោយអ្នកបើកបរម៉ូតូឈ្មោះ ស ចាន់ដារិទ្ធ ស្លាប់នៅនឹងកន្លែងកើតហេតុតែម្ដង។
ក្រោយពេលកើតហេតុសមត្ថកិច្ចជំនាញ បានមកដល់កន្លែងកើតហេតុ ធ្វើការវាស់វែង ហើយក៏យករថយន្ត នឹងម៉ូតូយកទៅរក្សាទុក្ខ នៅអរធិកាដ្ឋាននគរបាលស្រុកកៀនស្វាយ ដើម្បីអោយភាគីទាំងសងខាង មានឯកសារយកមកដោះស្រាយទៅតាមនិតិវិធីច្បាប់។ចំណែកសាកសពសមត្ថកិច្ចបានប្រគល់ជូន ទៅអោយក្រុមគ្រួសារ ដើម្បី យកទៅឆ្វើបុណ្យទៅតាមប្រពៃណី៕
