បញ្ជូនខ្លួនជនសង្ស័យម្នាក់ ទៅកាន់តុលាការរួមជាមួយគ្រឿងញៀនចំនួន១២កញ្ចប់
ខេត្តក្រចេះ៖ជនសង្ស័យម្នាក់ រួមជាមួយគ្រឿងញៀនចំនួន១២កញ្ចប់ ត្រូវបានកម្លាំងនគរបាលការិយាល័យប្រឆាំងគ្រឿងញៀននៃស្នងការដ្ឋាននគរបាលខេត្តបញ្ជូនបានទៅកាន់សាលាដំបូងខេត្តក្រចេះ នារសៀលថ្ងៃទី១២ ខែមិថុនា ឆ្នាំ២០១៩។
សមត្ថកិច្ចបានឲ្យដឹងថា ជនសង្ស័យដែលជាប់ពាក់ព័ន្ធទៅនឹងករណីជួញដូរគ្រឿងញៀន ត្រូវបានសមត្ថកិច្ចស្រុកឆ្លូង ចាប់ឃាត់ខ្លួនកាលពីល្ងាចថ្ងៃទី១១ ខែមិថុនា ឆ្នាំ២០១៩នៅចំណុចភូមិដងក្តោង ឃុំពង្រ ស្រុកឆ្លូង ខេត្តក្រចេះ ។
ជនសង្ស័យមានឈ្មោះ ហាក់ ម៉ុងហ៊ួត ភេទប្រុស អាយុ៤៥ឆ្នាំ មានទីលំនៅភូមិឃុំកើតហេតុខាងលើ។ក្រោយពីឃាត់ខ្លួនកម្លាំងសមត្ថកិច្ចដកហូតបាននូវវត្ថុតាងមួយចំនួនរួមមាន៖ម្សៅក្រាមពណ៌សថ្លា ជាគ្រឿងញៀនចំនួន១២កញ្ចប់,ថង់សម្រាប់វិចខ្ចប់មួយចំនួន,ទូរស័ព្ទដៃចំនួន១គ្រឿង។
តាមកាបញ្ជាក់ពីលោក ឆុង តូរ៉ាន់ អធិការនគរបាលស្រុកឆ្លូង បានឲ្យដឹងថា ការចុះប្រតិបត្តិការបង្ក្រាបនេះកម្លាំងជំនាញផ្នែកគ្រឿងញៀន នៃអធិការដ្ឋាននគរបាលស្រុកឆ្លូង នឹងកម្លាំងប៉ុស្តិ៍រដ្ឋបាលឃុំពង្រ សហការណ៍ជាមួយកម្លាំងប្រជាការពារភូមិ ដោយមានការចង្អុលណែនាំពីលោកផ្ទាល់ បានចុះតាមប្រម៉ាញ់មុខសញ្ញាជួញដូរ គ្រឿងញៀន រហូតឈានដល់ការឃាត់ខ្លួនជនសង្ស័យម្នាក់ រួមជាមួយគ្រឿងញៀនចំនួន ១២កញ្ចប់ នឹងវត្ថុតាងមួយចំនួន។
លោក ស៊ាង សុភ័ក្ត្រ ប្រធានការិយាល័យប្រឆាំងជួញដូរគ្រឿងញៀនបានឲ្យដឹងថាដែរថាជនសង្សយ័ខាងលើរួមនិងវត្ថុតាងត្រូវបានបញ្ជូនទៅកាន់សាលាដំបូងខេត្ត ដើម្បីចាត់ការបន្តតាមនីតិវិធីច្បាប់៕