កូនជាងកាត់សក់ យកម៉ូតូរបស់មេជាង ទៅលក់បាន១.០០០ដុល្លា ចាយអស់ហើយកុហក់មេជាងថាគេខ្ចីបន្ត ត្រូវអាវុធហត្ថឃាត់ខ្លួន
ខេត្តបន្ទាយមានជ័យ:ជនសង្ស័យម្នាក់ជាកូនជាងកាត់សក់ ដែលមេជាងទុកម៉ូតូឲ្យជិះ១គ្រឿងជិះចុះជិះឡើង បែកគំនិតយកម៉ូតូរបស់មេជាងយកទៅលក់បាន១.០០០ដុល្លាចាយអស់ហើយកុហក់មេជាងថាគេខ្ចីបន្ត
ត្រូវមេជាងប្តឹងអាវុធហត្ថក្រុងប៉ោយប៉ែត ដឹកនាំដោយលោកវរសេនីយ៍ទោ អ៊ុំ សាខន នាយរងសេនាធិការ ប្រចាំការមូលដ្ឋានកងរាជអាវុធហត្ថក្រុង ចុះឃាត់ខ្លួនជនសង្ស័យបាននៅវេលាម៉ោង០៣រសៀលថ្ងៃទី១១ ខែមិថុនា ឆ្នាំ២០១៩ នៅចំណុចផ្សារដើមពុទ្រា ស្ថិតក្នុងភូមិក្បាលស្ពាន១ សង្កាត់ប៉ោយប៉ែត ក្រុងក្រុងប៉ោយប៉ែត ខេត្តបន្ទាយមានជ័យ បន្ទាប់ពីធ្វើការឃាត់ខ្លួនកម្លាំងជំនាញបានបញ្ជូនជនសង្ស័យនិងវត្ថុតាងមកទីបញ្ជាការដ្ឋានកងរាជអាវុធហត្ថខេត្តដើម្បីចាត់ការបន្ត។
លោកវរសេនីយ៍ទោ ព្រហ្ម ថេង ប្រធានមន្ទីរយុត្តិធម៌បានឲ្យដឹងថា យោងតាមបណ្តឹងរបស់ជនរងគ្រោះឈ្មោះ លឹម ជីម៉េង ភេទប្រុស អាយុ៣៥ឆ្នាំ មុខរបរ ជាងកាត់សក់ មានទៅលំនៅភូមិមិត្តភាព សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ បានបំភ្លឺឲ្យដឹងថា នៅថ្ងៃកើតហេតុ ជនសង្ស័យឈ្មោះ សេង វីស្សា ភេទ ប្រុស អាយុ២១ឆ្នាំ រស់នៅភូមិសង្កាត់ជាមួយគ្នា ជាកូនជាងក្នុងហាងកាត់សក់របស់ខ្លួនហើយខ្លួនបានទិញម៉ូតូម៉ាកឃ្លិក ពណ៌ស ស៊េរីឆ្នាំ២០១៩ ០១គ្រឿងទុកសម្រាប់ជិះបម្រើការងារក្នុងហាងកាត់សក់។
ចំណែកជនសង្ស័យជិះម៉ូតូនោះជារៀងរាល់ថ្ងៃ រហូតដល់ថ្ងៃកើតហេតុជនសង្ស័យបានជិះដើរលេងបាត់ជាច្រើនថ្ងៃ លុះត្រឡប់មកវិញមិនឃើញម៉ូតូពេលមេជាងសួរជនសង្ស័យឆ្លើយថា ម៉ូតូត្រូវបានមិត្តភ័ក្តគេខ្ចីបន្តបាត់ហើយដោយសង្ស័យជនរងគ្រោះបានមកដាក់ពាក្យបណ្តឹងតែម្តង។
លោកវរសេនីយ៍ទោ ព្រហ្ម ថេង បានបញ្ជាក់ទៀតថា កម្លាំងជំនាញបានសាកសួរចម្លើយរបស់ ជនសង្ស័យបានឆ្លើយសារភាពថា ម៉ូតូរបស់ជនរងគ្រោះដែលខ្លួនជិះនោះបានយកទៅលក់នៅឯខេត្តសៀមរាបក្នុងតម្លៃ ១.០០០ដុល្លា ហើយចាយអស់ហើយផ្អែកលើចម្លើយសារភាពរបស់ជនសង្ស័យឃើញថាមានតម្រុយពិរុទ្ធភាព នៃបទល្មើសយ៉ាងជាក់លាក់ ជនសង្ស័យខាងលើអាចត្រូវចោទពីបទ រំលោភលើទំនុកចិត្តកម្លាំងជំនាញកងរាជអាវុធហត្ថខេត្ត បានកសាងសំណុំរឿងបញ្ជូនជនសង្ស័យ រួមជាមួយវត្ថុតាង ទៅតុលាការ ដើម្បីចាត់ការទៅតាមច្បាប់៕