យុវសិស្សម្នាក់ ក្នុងចំណោមមិត្តរួមថ្នាក់៦នាក់រៀន នៅសាលាអនុវិទ្យាល័យឬស្សីកែវ បានលង់ទឹកស្រះក្នុងវត្តស្លាប់ យ៉ាងអាណោចអាធ័ម
រាជធានីភ្នំពេញ៖កាលពីវេលាម៉ោង២និង៤០នាទីរសៀល ថ្ងៃទី១២ ខែមិថុនា ឆ្នាំ២០១៩មានករណីដែលគួរឲ្យភ្ញាក់ផ្អើលមួយបានកើតឡើង ដោយមានយុវសិស្សម្នាក់ ក្នុងចំណោមមិត្តរួមថ្នាក់៦នាក់រៀន នៅសាលាអនុវិទ្យាល័យឬស្សីកែវ បានលង់ទឹកស្រះក្នុងវត្តស្លាប់យ៉ាងអាណោចអាធ័ម ទោះជាប្រជាពលរដ្ឋ សមត្ថកិច្ច ក្រុមគ្រួសារ ព្យាយាមចុះរាវយក ស្រង់បានមកវិញភ្លាមយ៉ាងណាក៏មិនអាចសង្គ្រោះអាយុជីវិតបានដែរ បន្ទាប់ពីយុវជនសិស្សរងគ្រោះ រួមជាមួយមិត្តភ័ក្រ ឆ្លៀតម៉ោងទំនេរនាំគ្នាទិញផ្លែឈេីគ្រឿងម្ជូរទៅហូបនៅមាត់ស្រះទឹក ក្នុងវត្តឧត្តរាវត្តី ភូមិមិត្តភាព សង្កាត់ឬស្សីកែវ ខណ្ឌឬស្សីកែវ។
យុវសិស្សរងគ្រោះមានឈ្មោះ អៀត សំរិទ្ធបញ្ញា អាយុ១៤ឆ្នាំ ជាសិស្សរៀនថ្នាក់ទី៧ EDនៃអនុវិទ្យាល័យឬស្សីកែវ មានទីលំនៅភូមិសាមគ្គី សង្កាត់ឬស្សីកែវ ខណ្ឌឬស្សីកែវ រាជធានីភ្នំពេញ។
តាមប្រភពព័ត៍មាននៅកន្លែងកើតហេតុបានឲ្យដឹងថា មុនកើតហេតុយុវសិស្សរងគ្រោះ និងមិត្តរួមថ្នាក់សរុបមានគ្នា៦នាក់ឆ្លៀតម៉ោងទំនេរ ព្រោះសាលាក៏នៅជាប់ទីរបងវត្ត ក៏បាននាំគ្នាទិញគ្រឿងម្ជូរ ទៅអង្គុយហូបនៅមាត់ស្រះក្នុងបរិវេណវត្ត កន្លែងកើតហេតុហូបបណ្តើរជជែកគ្នាលេងបណ្តើរ មិនទាន់ទាំងអស់ផង ជនរងគ្រោះដោះអាវ ស្រាតខោជើងវែង លោតចុះងូតទឹកស្រះតែម្នាក់ឯង
ស្រាប់តែលង់លិចបាត់ផ្លឹបតែម្តង រកតែជួយមិនទាន់ផងទើបបង្កឲ្យផ្អើលឆោឡោ ប្រជាពលរដ្ឋសមត្ថកិច្ច ក្រុមគ្រួសារនាំគ្នាចុះរាវ ស្រង់ឡើងគោកវិញ ដើម្បីសង្គ្រោះលើករលាក់ យ៉ាងណាក្តីក៏មិនអាចដឹងខ្លួនឡើងវិញ។
ក្រោយពីជួយសង្គ្រោះបឋមរួចក៏បានបញ្ជូនទៅមន្ទីពេទ្យកាល់ម៉ែត្រ ហេីយត្រូវគ្រូពេទ្យប្រាប់ថាស្លាប់បាត់ទៅហេីយ ក្រោយមកសមត្ថកិច្ចបានធ្វើការពិនិត្យកោសល្យវិច័យជាក់ស្តែង ឃើញថាស្លាប់ដោយសារលង់ទឹកពិតមែន ក្រុមគ្រួសារបានត្រឹមបង្ហូរទឹកភ្នែកទាំងក្តីអាណិតតែប៉ុណ្ណោះ។
បើតាមលោក តា អាចារ្យ បានឲ្យដឹងថា ស្រះទឹកមុខព្រះវិហារខាងលើ មានជម្រៅរហូតដល់ទៅ៣ម៉ែត្រឯណោះ។
បច្ចុប្បន្នសពត្រូវបានយកមកដំកល់ទុកនៅវត្តសារ៉ាវតី ប្រគល់ឲ្យក្រុមគ្រួសារៀបចំធ្វើបុណ្យតាមប្រពៃណី៕
